Փաստ ինֆո

Նոր սերնդի ՀԴՄ-ների ներդրման ժամկետը 1 ամսով հետաձգվում է` նախատեսված հուլիսի 1-ի փոխարեն մինչև օգոստոսի 1-ը:

Հարկ վճարողների առանձին խմբերի համար նոր սերնդի ՀԴՄ-ների ներդրման ժամկետներ են սահմանել օգոստոսի 1-ը, հոկտեմբերի 1-ը և 2015 թվականի համար հունվարի 1-ը:

Այսօր կայացրած այս որոշմամբ կառավարությունը փորձում է աջակցել Փոքր ու միջին ձեռնարկատերերին: Այս նույն նպատակով կառավարությունը նաև էժանացրել է ՀԴՄ-ների գինը` կախված գործարարի տարեկան շրջանառության չափից:

Կառավարության հայտարարության համաձայն՝ ՀԴՄ-ների իրական արժեքը 150 000 դրամ է: Բայց, ինչպես այսօր նախագծի ներկայացման ժամանակ հայտարարեց ֆինանսների նախարար Գագիկ Խաչատրյանը, 5-10 մլն. դրամ հասույթ ունեցող գործարարներին այն կվաճառվի առավելագույնը 80 000 դրամով, իսկ մինչև 5 մլն դրամ հասույթ ունեցողներին` 60 000 դրամով:

Ի դեպ, կառավարությունը տարբերակված մոտեցում է ցուցաբերել նաև գյուղական բնակավայրերում և, հատկապես, սահմանամերձ գյուղերում աշխատող գործարաների համար:

Գյուղերում աշխատող գործարարները ՀԴՄ-ները ձեռք կբերեն 50 % զեղչով, իսկ սահմանամերձ գյուղերում աշխատողները` անվճար:

Ի դեպ, նոր սերնդի ՀԴՄ-ների ներդրման ժամկետի հետաձգումը, ՀՀ վարչապետ Հովիկ Աբրահամյանի խոսքով, «4 մլրդ 380 մլն դրամի բեռ է առաջացնում բյուջեի համար», և այդ բեռը մնալու է պետության «ուսերին»: