Փաստ ինֆո

Ավազակային հարձակման, անչափահաս աղջկան  ու նրա  մորը առևանգելու, ապա վերջինիս բռնաբարելու մեջ մեղադրվող նախկին ոստիկան Էդգար Վարագյանի գործով այսօր հրապարակվեցին դատարան չներկայացած վկա Գևորգ Չթեյանի նախաքննական ցուցմունքները: Այս վկան է  ամբաստանյալին ներգրավել տուժողի առանձնատան ներքին հարդարման աշխատանքները կատարելու համար:

Վկան հայտնել է, որ Վարագյանը որևէ անձնական կապ չի ունեցել տուժողի հետ, տուժողը ամուսնացած, շատ բարոյական կին է, ուստի բացառել է որևէ մեկի հետ սեռական կապ ունենալու հնարավորությունը: «Տուժողը նույնիսկ առիթ չի տվել նման բան մտածելու»,- նշել է վկան:  Նա հերքել է Վարագյանի պնդումներն առ այն, որ տուժողը ամբաստանյալին պարտք է մնացել 250 հազար դրամ`  շինանյութի  և 150 հազար դրամ՝ աշխատանքի համար.  Էդգարը ստում է, գումարն ամբողջությամբ տուժողը տվել է իրեն, ինքն էլ՝ Էդգարին:

Վկան հայտնել է, որ Էդգարից վատ բան չի տեսել, բացի նրանից, որ աշխատանքի մի քանի օր չէր ներկայացել, հետո իմացել էին, որ ամուսնանալու նպատակով աղջիկ էր փախցրել, սակայն չէր ամուսնացել:

Ամբաստանյալի պաշտպան Արայիկ Ալվանդյանը հայտարարեց, որ այս ցուցմունքը չի կարող դրվել մեղադրանքի հիմքում, քանի որ բավականին հարցեր կան, որոնք կարող են ճշտվել առերես հարցաքննության ընթացքում, ուստի անհրաժեշտ է, որպեսզի միջոցներ ձեռնարկվեն վկային դատարանում հարցաքննելու համար:

Պաշտպանական կողմը նաև կասկածի տակ դրեց գործի քննությամբ ձեռք բերված ապացույցները. ըստ կողմի, մասնավորապես, գործում չկա որևէ ապացույց առ այն, որ Էդգարը մետաղյա ձող է բերել տուժողի պատուհանի ապակին կոտրելու համար: Մեղադրող Գևորգ Գևորգյանը հակառակ կարծիքին էր՝ «դա հիմնավորված է գործի մյուս ապացույցներով»:  Պաշտպանական կողմը   կասկածի տակ դրեց նաև մի շարք առարկաների ճանաչման ներկայացնելու 4 արձանագրությունները՝ դատավարական գործողությանը մասնակցել են միևնույն ընթերակաները: Դատարանը որևէ առերևույթ խախտում չարձանագրեց՝ հաշվի առնելով, որ բոլոր 4 գործողությունները կատարվել են նույն օրը: Ըստ պաշտպան Ալվանդյանի, իր պաշտպանյալի հեռախոսի մեջ  հայտնաբերված մերկ կանանց լուսանկարները չեն կարող որպես ապացույց գնահատվել, քանի էր «դա իր անձնական կյանքն է»:

Այսօր ավարտվեց գործի գրավոր ապացույցների հետազոտումը, իսկ հաջորդ դատական նիստում դատարանում կհարցաքննվի մի լրացուցիչ կին-վկա, ում հարցաքննությունը,  ըստ պաշտպանական կողմի, կարող է հիմնավորել  ամբաստանյալի այլուրեքությունը: Հաջորդ դատական նիստին նախատեսվում է նաև, որ ցուցմունքներ կտա ամբաստանյալը:

Այսօրվա դատական նիստում տուժողն անակնկալ պահվածք դրսևորեց՝ առանց դատարանից թույլտվություն հարցնելու, հեռախոսը վերցրեց ու խրոխտ քայլքով  հեռացավ դատարանի դահլիճից: Դատարանը հարկադրված էր ընդմիջել դատական նիստը, ապա ի վերջո դատական նիստերի դահլիճ վերադարձած տուժողին հայտնեց, որ նման պահվածքի կրկնվելու դեպքում նրա նկատմամբ դատական սանկցիա կկիրառվի: Դատարանն ընդգծեց, որ դա ոչ միայն  դատավարական կարգի, այլև տարրական էթիկայի խախտում է: Ամբաստանյալն իր հերթին «թև առնելով» տեղի ունեցածից՝  վիրավորական բառեր հնչեցրեց տուժողի հասցեին և արժանացավ դատարանի նախազգուշացմանը: