Փաստ ինֆո

«Այն խոստումները, որոնք տրվել էին գազի գնի թանկացման հետ կապված, չեն արվել, սա էլ չի արվելու»:Ոչ իշխանական քառյակի ներկայացուցիչներն այսօր նման կարծիք հայտնեցին  էլեկտրաէներգիայի թանկացման որոշումից հետո ՀՀ նախագահ Սերժ Սարգսյանի՝ վարչապետին տրված հանձնարարականի մասին լրագրողների հարցին պատասխանելով:
 
ԲՀԿ ներկայացուցիչ Միքայել Մելքումյանն էլ սոցիալապես անապահով ընտանիքներին տրվելիք փոխհատուցման վերաբերյալ որոշակի հաշվարկներ ներկայացրեց:
 
Դրանց համաձայն՝ փոխհատուցում ստացող ընտանիքների թիվը 105 000 է, յուրաքանչյուր ընտանիք կփոխհատուցվի ամսական 200 ԿՎ/ժամ-ի սակագնի ավելացած գնի հաշվով:
 
Այսինքն՝ ամսական շուրջ 1000 դրամի չափով: Մինչդեռ, էլեկտրաէներգիայի թանկացումը, բանախոսների կարծիքով, չի սահմանափակվում զուտ հոսանքի թանկացմամբ, այն իր հետևից բերելու է նաև առաջին անհրաժեշտության ապրանենրի թանկացում, որն անխուսափելիորեն ազդելու է հանրապետությունում կենսամակարդակի վրա, ընդ որում՝ ոչ միայն անապահով խավի:
 
«Այս ամենից հետո տեղի է ունենալու գնաճ, այսինքն՝ նրանք ովքեր այս պահին աղքատ չեն, հետո են դառնալու աղքատ»,- հայտարարեց Արմեն Ռուստամյանը:
 
Ռուբիկ Հակոբյանն էլ հավելեց, թե, իրենց համոզմամբ, «իշխանությանը փող էր պետք, և այդ մութ արդարացումներով ժողովրդից փորձում են հավելյալ գանձումներ անել»:
 
Իսկ ինչ են առաջարկում ոչ իշխանական ուժերը արդեն ստեղծված իրավիճակում հարցին  քռյակի ներկայացուցիչները պատասխանեցին, որ շարունակելու են պայքարը, բայց թե ինչ մեթոդներով, դեռ իրենք էլ հստակ չգիտեն:
 
«Չենք հսցրել քննարկել մեր անելիքների ցանկը: Մենք լուծումներ դեռ չունենք՝ քայլերի հետ կապված, մենք ունենք փաստարկված առաջարկ, որ կարելի է այս թանկացումը չանել, իշխանությանը համոզելու, որ այս քայլին չգնան: Մեր խնդիրը իշխանությանը ջարդելը չէ, այլ՝ համոզելը, որպեսզի մարդիկ այս երկրից չգնան»,- ասաց  Արամ Մանուկյան:
 
«Փորձելու ենք մինչև օգոստոսի մեկը մեր առաջարկները ներկայացնել մասկագիտական փաստարկներով, որ հնարավոր էր այս թանկացումը չանել»,- ավելացրեց Միքայել Մելքումյանը: