Փաստ ինֆո

«Բանդայի» գործով այսօրվա դատական նիստում ամբաստանյալները  հայտարարեցին նախաքննության ընթացքում իրենց  նկատմամբ կիրառված խոշտանգումների մասին։

 Մասնավորապես ամբաստանյալ Արթուր Մանուկյանը նշեց, որ որպես կասկածյալ իր նախաքննական ցուցմունքը ստորագրել է խոշտանգումների արդյունքում՝ առանց դրանք ընթերցելու: Ըստ ամբաստանյալի, ինքը նախաքննության ընթացքում խոշտանգումների մասին չի հայտնել, որովհետև մտածել է, որ նորից ծեծի կենթարկեն, ուստի սպասել ու այդ մասին հայտնում է դատարանում: Միաժամանակ, ըստ նրա, «թղթերը բերել են, ես խոշտանգված, 5 հոգի գլխիս կանգնած, ասում էին՝ ստորագրիր, թողնում ենք գնաս, մեղավոր չես»: 

«Ի՞նչ վնասվածքներ եք ստացել» հարցին ամբաստանյալը պատասխանեց՝ «հայելու մեջ տեսա դեմքս, չճանաչեցի»:

Ամբաստանյալը հերքեց իր նախաքննական ցուցմունքն առ այն, որ տուժող Կարեն Ջինանյանին ճանաչել է  որպես բժիշկ. իր ընկերուհու հղիությունն ընդհատելու առնչությամբ եղել է հիվանդանոցում ու մի քանի անգամ նրա տանը եւ  եկել եզրահանգման՝ «այս տանը կլինեն փողեր»:   Ամբաստանյալը հերքեց նաև հիշյալ նախաքննական ցուցմունքի մասն առ այն, որ չորսով դիմակներն ու ձեռնոցները հագան, ապա լսեցին մեքենայի սիգնալ,  վտանգավոր էր, ուստի որոշեցին «չայցելել» տուժողին: Ամբաստանյալը հավելեց, որ փոխադարձաբար չի ճանաչում բժշկին, չգիտե, թե որտեղ է գտնվում Ձերժինսկու դպրոցը, չի եղել «Այգեստան» թաղամասում: Ամբաստանյալը վստահ է, որ անգամ զենքի արգասիքները իր հագուստի վրա նույնպես  քննիչների կողմից են կազմակերպված:  Նա հայտնեց, որ չի ճանաչել ամբաստանյալ Քյարամ Ամոյանին, իսկ ամբաստանյալ Դավիթ Գալստյանին ճանաչել է հոգեբուժարանից՝ «կողքի բաժանմունքում բուժվում էր»:

Իր նկատմամբ կիրառված խոշտանգումների մասին բարձրաձայնեց նաև ամբաստանյալ Սամվել Դավթյանը: Ըստ նրա, ինքը կանգնած էր երկընտրանքի առջև՝ կամ զրպարտել ինքն իրեն և Գուրգենին կամ իր «կյանքը փրկել», թմրամիջոցը ոստիկաններն են գցել իր գրպանը, իսկ մատնահետքերը վերցրել գետնին գցած շշի վրայից:  Խոշտանգողները սև շորերով էին, նրանց շարքում կային նաև քաղաքացիական հագուստով անձինք: Գուրգենին ու Դավիթին ճանաչել է կալանավայրից, իսկ Արտուշ Հակոբյանին չի ճանաչել մինչև դատավարությունը:  Հերքելով բանդային ու ավազակային հարձակումներին մասնակցելու մեղադրանքը՝ ամբաստանյալը նշեց, որ եթե ոստիկանապետը գիտե, թե ինչպես է կիսվել ավարը, թող ասի, ինքն էլ իմանա «որքան է իր փայը»:

Ըստ ամբաստանյալի, ինքը գնացել է Գուրգենի տուն՝ իր մեքենայի անսարքության համար փող խնդրելու, ապա իմանալով, որ  Գուրգենը վթարի է ենթարկվել, գնացել են վթարի վայր, որտեղից էլ բերման են ենթարկվել ոստիկանություն: Ըստ մեղադրական եզրակացության, Արտուշ Հակոբյանը Գուրգեն Հայրապետյանի հետ միասին ստեղծել և ղեկավարել է կազմակերպված, զինված կայուն խումբ` բանդա՝ Գուրգեն Հայրապետյանը՝  փորձելով ազատվել ոստիկանության աշխատակիցների հետապնդումներից, դիմել է փախուստի և բարձրանալով Մյասնիկյան պողոտային հարակից ժայռի վրա, վայր է ընկել և մահացել: