Փաստ ինֆո

Զինվորական ծառայությունից զորացրելու նպատակով կաշառք ստանալու և  տալու գործով ամբաստանյալ Դավիթ Գալեչյանը, ով ծառայությունից ազատվել է հիվանդության պատճառով այսօր ազատ արձակվեց դատարանի դահլիճում: Դատարանը փոխեց նրա նկատմամբ որպես խափանման կիրառված կալանքը եւ  գրավի դիմաց դատարանի դահլիճից ազատ արձակեց:

Այդպիսով Երևանի Էրեբունի և Նուբարաշեն վարչական շրջանների ընդհանուր իրավասության դատարանը  բավարարեց ամբաստանյալի պաշտպան Հարություն Բաղդասարյանի միջնորդությունը՝ խափանման միջոց ընտրված կալանքը փոխարինել ստորագրությամբ կամ եթե հնարավոր չէ, ապա գրավով:

Ամբաստանյալն իր հերթին նշեց, որ ինքը կատարած «հանցագործությունից» հետո աշխատել է դպրոցում երեխաների հետ, կա բնութագիր, ինչը «օդից» չի տրվել և որ ունի առողջական խնդիրներ, իսկ կալանքից ազատվելու պարագայում` ցանկանում է բուժվել:

Նշենք, որ դատախազը դեմ  էր ամբաստանյալի ազատ արձակմանը եւ առարկեց  միջնորդությանը` այն համարելով ժամանակավրեպ: Ավելին, դատախազը հայտարարեց, թե  հիմնավոր կասկածներ կան, որ ամբաստանյալը կարող են ազդել քրեական գործով այլ մասնակիցների՝ մասնավորապես վկաների վրա: Ըստ մեղադրողի, նախաքննության փուլում եղել է այդպիսի բան, ինչը  պարզել են գաղտնալսման միջոցով:

Մեղադրող դատախազին հակադարձեց գործով մյուս ամբաստանյալի պաշտպան Արմեն Ֆերոյանը` նշելով, որ իր պաշտպանյալը տվել է ինքնախոստովանական ցուցմունքներ՝ նշելով որ վերցրել է 6000 դոլարը: Փաստաբանը նաեւ նշեց, որ, եթե մեղադրող կողմն այդքան անհանգստացած է, որ ամբաստանյալներն ազատության մեջ գտնվելով կարող են ազդել մեկը մյուսի վրա, ապա այդ դեպքում անհասկանալի է, թե դատախազությանն ինչու չի մտահոգում, որ 2 ամբաստանյալներն էլ գտնվում են «Նուբարաշեն» ՔԿՀ-ում, յուրաքանչյուր նիստին դատարան են ուղեկցվում նույն մեքենայով եւ կարող են խոսել միմյանց հետ:

Չնայած դատախազի առարկությանը` դատարանը բավարարեց պաշտպանի միջնորդությունը՝ ամբաստանյալ Գալեչյանի նկատմամբ  որպես գրավի սահմանելով 700 000 ՀՀ դրամ գումար:  Դատական նիստի ավարտին ամբաստանյալ ազատ արձակվեց:

Նույնաբովանդակ միջնորդությամբ հանդես եկավ նաև ամբաստանյալ, բժիշկ Հակոբ Մելիքյանի պաշտպան  Արմեն Ֆերոյանը` նշելով, որ իր պաշտպանյալի կալանավորումը կրում է բացահայտ ապօրինի բնույթ: Բացի այդ` պաշտպանը նշեց, որ իր պաշտպանյալն ունի 3 մանկահասակ երեխա, նրա խնամքին են նաև ծնողները:

Պաշտպանը նաև նշեց, որ նախաքննության սկզբնական փուլում իր պաշտպանյալը չի գտնվել կալանքի տակ եւ այդ ընթացկում չի փորձել փախուստի դիմել,  նախաքննական մարմնի կանչով միշտ ներկայացել է:

Պաշտպանը նկատեց նաեւ, որ Հ. Մելիքյանն ստացել է պատվոգիր` բազմաթիվ զինվորների կյանքեր փրկելու համար: Դատախազը նույն պատճառաբանություններով առարկեց նաեւ այս միջնորդությանը: Դատարանն այս միջնորդության քննարկումը թողեց հաջորդ` հուլիսի 4-ին կայանալիք նիստին:

Դատարանում այսօր ցուցմունք տվեց «Խնամքի և հոգեկան առողջության կենտրոն» տնօրեն Արսեն Պետրոսյանը, ով Կենտրոնական ռազմաբժշկական հանձնաժողովի նախագահն է եղել, երբ  ներկայացվել են ամբաստանյալ Դավիթ Գալեչյանի հիվանդության պատմության վերաբերյալ տվյալները եւ  վկան ստորագրել է, որով էլ ծառայության մեջ գտնվող, ներկայումս ամբաստանյալ Գալեչյանը ճանաչվել է ծառայությանը ոչ պիտանի:

Վկան նշեց, որ ցանկացած զինվորի վերաբերյալ իրենց ներկայացվում են հիվանդության պատմությունը և կատարված հետազոտությունների փաստաթղթերը, իսկ հանձնաժողովը, որի կազմում ներառված են ոլորտի տարբեր մասնագետներ, ուսումնասիրում են դրանք:

Վկան նշեց որ ամբաստանյալ բժիշկը երբևէ իրեն չի խնդրել կամ միջամտել, որ Դավիթ Գաչեչյանը ազատվի ծառայությունից:

Վկան նաև նշեց, որ հիվանդ զինվորի թղթերը իրենց ուղարկում է ոչ թե բժիշկը, այլ հոսպիտալի ռազմաբժշկական հանձնաժողովը.  բժիշկը չի որոշում որ փաստաթղթերը ներկայացնի, իսկ որոնք` ոչ: Վկան պնդեց, որ բժիշկը  պետք է զբաղվի միայն հիվանդի բուժմամբ և հետազոտմամբ:

Ավելի վաղ «Փաստինֆո»-ն տեղեկացրել է, որ կենտրոնական կլինիկական զինվորական հոսպիտալի նյարդավիրաբուժական բաժանմունքի ավագ օրդինատորը մեղադրվում է դասակի հրամանատար Դավիթին զորացրելու համար 6000 ԱՄՆ դոլար կաշառք է ստանալու մեջ:

Ըստ գործի նյութերի՝ 39-ամյա Մելիքյանը հանդիսանալով ՀՀ ՊՆ N զորամասի` ՀՀ ՊՆ կենտրոնական կլինիկական զինվորական հոսպիտալի նյարդավիրաբուժական բաժանմունքի ավագ օրդինատոր, նախորդ տարի հունվարին բաժանմունք ընդունված զինծառայող Դավիթ Գալեչյանին զորացրելու համար, ընդառաջ գնալով վերջինիս առաջարկին 2013թ ապրիլ-մայիս ամիսների ընթացքում անձամբ 3 փուլով ստացել է առանձնապես խոշոր չափերի հասնող 6000 ԱՄՆ դոլար գումար կաշառք:

Հակոբ Մելիքյանին մեղադրանք է առաջադրվել ՀՀ քրեական օրենսգրքի 311-րդ հոդվածի 4-րդ մասի 2-րդ կետով, իսկ Դավիթ Գալեչյանին՝ ՀՀ քրեական օրենսգրքի 312-րդ հոդվածի 3-րդ մասի 1-ին մասով, նրանց երկուսի նկատմամբ որպես խափանման միջոց է ընտրվել կալանքը: