Փաստ ինֆո

Դատարանում մեղադրանքը պաշտպանող դատախազը պահանջում է 6,5 տարվա ազատազրկման դատապարտել պահեստազորի գնդապետ Վոլոդյա Ավետիսյանին։ Նման միջնորդությամբ դատախազը հանդես է եկել այսօր տեղի ունեցած դատական նիստում։

Ինչպես արդեն նշել ենք, որ այսօրվա դատական նիստում մեղադրող դատախազի միջնորդությամբ նախ վերսկսվեց դատաքննությունը եւ հրապարակվեցին որոշ փաստաթղթեր, որից հետո  դատարանն անցավ դատական վիճաբանությունների փուլ։ Մեղադրական ճառով հանդես եկավ դատախազը՝ լիովին հիմնավորված համարելով Վ.Ավետիսյանին առաջադրված մեղադրանքները։ Հիշեցնենք, որ Վոլոդյա Ավետիսյանը մեղադրվում է խարդախությամբ հափշտակություն կատարելու մեջ։

Նախաքննական մարմնի վարկածի համաձայն՝  Վոլոդյա Ավետիսյանը, հանդիսանալով պահեստազորի գնդապետ, չարաշահել է իր՝ որպես նախկին զինվորական ծառայողի նկատմամբ Երևան քաղաքի բնակիչ Ալբերտ Մաթոսյանի վստահությունը և վստահեցրել, թե զինվորական բարձրաստիճան պաշտոնատար անձանց միջոցով կարող է կարգավորել նրա՝ ԼՂՀ պաշտպանության բանակի թիվ N զորամասում ժամկետային զինվորական ծառայության նշանակված որդուն նույն զորամասում համակարգչային օպերատոր նշանակելու հարցը։

Ըստ քննության՝ չունենալով նման պայմանավորվածություն՝ 2013թ.հուլիսի 29-ին՝ ժամը 14:00-ի սահմաններում, Երևան քաղաքի Թումանյան 54 հասցեում գտնվող Ալեքսանդր Սպենդիարյանի անվան օպերայի և բալետի ազգային թատրոնի հարակից Ազատության հրապարակի տարածքում Ալբերտ Մաթոսյանից պահանջել է դրա դիմաց իրեն տրամադրել զգալի չափերի՝ 205.150 ՀՀ դրամին համարժեք 500 ԱՄՆ դոլար գումար, սակայն Ալբերտ Մաթոսյանը հրաժարվել է օգտվել Վոլոդյա Ավետիսյանի ծառայությունից, որի պատճառով վերջինս, իր կամքից անկախ հանգամանքներով, հանցագործությունն ավարտին չի հասցրել:

Բացի այդ, Ավետիսյանը, խարդախությամբ հափշտակություն կատարելու դիտավորությամբ, կաշառք ստանալու պատրվակով՝ Շիրակի մարզի բնակիչ Հենրիկ Սարդարյանին վստահեցրել է, թե կարող է որոշ պաշտոնատար անձանց միջոցով՝ 5000 ԱՄՆ դոլարի դիմաց, նրա թոռանն ազատել պարտադիր ժամկետային զինծառայությունից։ Մեղադրանքի համաձայն՝ 2013թ. օգոստոսի 13-ին Արմավիր-Աշտարակ ավտոմայրուղում Հենրիկ Զաքարյանից Ավետիսյանը վերցրել է խոշոր չափի հասնող՝ 2000 ԱՄՆ դոլար և հափշտակել այն՝ գումարն օգտագործելով իր անձնական կարիքների համար:

Պահեստազորի գնդապետին մեղադրանք է առաջադրվել երկու հոդվածներով՝ ՀՀ քրեական օրենսգրքի 34-178 –րդ հոդվածի 2-րդ մասի 5-րդ կետով և 178-րդ հոդվածի 2-րդ մասի 2,5 կետով:

Մեղադրող դատախազը Հենրիկ Պապիկյանը միջնորդեց Վ. Ավետիսյանին դատապարտել ազատազրկման՝ 6 տարի 6 ամիս ժամկետով, իսկ Վ. Ավետիսյանի կողմից հափշտակված 2000 ԱՄՆ դոլար գումարը, որը հանդիսանում է կաշառքի առարկան, բռնագանձել հօգուտ պետության, իսկ գույքի վրա դրված կալանքը պահպանել գումարը բռնագանձելու նպատակով:

Ճառով հանդես եկավ նաև պաշտպանական կողմը. Վ. Ավետիսյանի պաշտպան Արա Զաքարյանը հայտարարեց, որ իր պաշտպանյալին վերագրվող գործողությունները դատաքննության ընթացքում չեն հաստատվել, իսկ նախաքննության ընթացքում վկաների նկատմամբ ճնշումներ են գործադրվել՝ այդպիսով կորզելով ցուցմունքներ:

«Վ. Ավետիսյանին 6, 5 տարվա ազատազրկման դատապարտելը և, հաշվի առնելով նրա ընտանիքի ծանր սոցիալական պայմանները և անչափահաս երեխաների առկայությունը, նրանից 2000 ԱՄՆ դոլար բռնագանձելն ուղղակի մեր իշխանության շնորհակալությունն է այն ամենի համար, ինչը Վ. Ավետիսյանը ժամանակին մատուցել է մեր պետությանը»,- ասաց պաշտպանը:

Պաշտպանական կողմը դատարանին միջնորդեց կայացնել արդարացման դատավճիռ, իսկ եթե, այնուամենայնիվ, դատարանը կգտնի, որ իր պաշտպանյալը  մեղավոր է, ապա նրա նկատմամբ նշանակել մեղմ պատիժ, որը չի գերազանցի 5 տարին և համաներման ակտի կիրառմամբ նրան ազատել պատժի կրումից:

Պաշտպանական ճառով հանդես եկավ նաև Վ. Ավետիսյանը՝ նշելով, որ նախորդ տարվանից նախաձեռնած շարժումը հենց այնպես չի սկսել, ինքը ցանկացել է պայքարել, որ Հայաստանը օրենքով երկիր դառնա, և  մարդն իր աշխատավարձով և կենսաթոշակով կարողանա ապրի:

Ավետիսյանը նշեց, որ ինքը մեկ անգամ արդեն ապացուցել է իր նվիրվածությունը հայ ժողովրդին և մասնակցել է պատերազմին, և պատրաստ է «նստելու» նաեւ 10 տարի,  միայն հայ ազգը փրկվի, իսկ պետությունը՝ պետություն դառնա: «Ես չեմ ուզում, որ այս նոր դավաճանները այս երկիրը հանձնեն չգիտեմ ում, ես իմ արարքներում ոչ մի հանցագործություն չեմ տեսնում, այս ամեն ինչն սարքած է, կոչ եմ անում անօրինական, բռնապետական իշխանություններից ազատվել»,- ասաց Վ. Ավետիսյանը: