Փաստ ինֆո

Աղջկա՝ Սուսաննա Գեւորգյանի մահվան դեպքի առթիվ 7 տարի առաջ հարուցված քրեական գործով թույլ տրված խախտումների վերաբերյալ Մասիս քաղաքի բնակչուհի Սաթենիկ Գեւորգյանի բողոքներին արձագանքել է ՀՀ հատու քննչական ծառայությունը՝ հարուցելով նոր քրեական գործ։

Հատուկ քննչական ծառայությունից տեղեկացնում ենք, որ Սաթենիկ Գեւորգյանը հաղորդում է ներկայացրել, աղջկա մահվան դեպքի առթիվ 2007 թվականին հարուցված քրեական գործով վարույթն իրականացրած պաշտոնատար անձինք խեղաթյուրելով իրական փաստերը թաքցրել են դստերը ֆիզիկական և սեռական բռնության ենթարկելու, այնուհետև սպանելու հանգամանքները` վերջինիս մահը ներկայացնելով որպես ավտովթարի հետևանք, որի արդյունքում հիշյալ հանցավոր արարքները կատարած անձը խուսափել է պատժից: ՀՀ հատուկ քննչական ծառայությունում նախապատրաստված նյութերով հարուցվել է քրեական գործ՝ ՀՀ քրեական օրենսգրքի 308-րդ հոդվածի 2-րդ մասի հատկանիշներով: Կատարվում է նախաքննություն:

Քրեական գործի նյութերի համաձայն՝ 7 տարի առաջ մարտի 9-ին երեկոյան 22:45-ին Նորամարգ-Մասիս ավտոճանապարհին Մասիսի բնակիչ Արարատ Կաֆյանի վարած Օպել-Վեկտրա մակնիշի ավտոմեքենան (որում գտնվել է Մասիսի բնակչուհի 19-ամյա Սուսաննա (Սյուզի) Գևորգյանը), բախվելով հողաթմբին, վթարի է ենթարկվել: Սուսաննան ստացած վնասվածքներից մահացել է: Աղջկա մայրը չի հավատում վթարի վարկածին. նա կարծում է, որ Սուսաննային ենթարկել են սեռական բռնության, իսկ ավտովթարն ուղղակի բեմականացված է եղել։ Իսկ գործի հանգամանքները խեղաթյուրելուն, ըստ տիկին Սաթենիկի, օգնել է Կաֆյանի հարազատն, ով աշխատում էր ոստիկանությունում։