Փաստ ինֆո

Ֆուտբոլի աշխարհի առաջնության 1/8 եզրափակիչի հերթական մասնակիցները դարձան Գերմանիայի և ԱՄՆ-ի հավաքականները:

G խմբում ընդգրկված այդ թիմերի առերես մրցավեճում Թոմաս Մյուլերի՝ 55-րդ րոպեին խփած գոլի շնորհիվ 1:0 հաշվով հաղթեցին գերմանացիները: Պարտությունը, սակայն, ամերիկացիներին չզրկեց պայքարը շարունակելու հնարավորությունից, քանի որ զուգահեռ խաղում նրանց համար գրանցվեց նպաստավոր արդյունք:

Պորտուգալացիները թեպետ 2:1 հաշվով հաղթեցին գանացիներին և միավորներով հավասարվեցին Միացյալ Նահանգների թիմին, բայց վերջինիս զիջեցին խփած և բաց թողած գոլերի տարբերությամբ: Աշխարհի առաջնությունում մնալու համար Պորտուգալիային եւ Գանային ձեռնտու էր միայն խոշոր հաշվով հաղթանակը: Դրա նախադրյալը եվրոպական բրազիլացիները ստացան 31-րդ րոպեին, երբ Միգել Վելոուզի փոխանցումից հետո գանացի Ջոն Բոյը անզգուշաբար գրավեց սեփական դարպասը: Այնուհանդերձ, 57-րդ րոպեին Ասամոա Գյանը վերականգնեց հավասարակշռությունը: Պորտուգալացիներին հաջողվեց միայն 81-րդ րոպեին Քրիշտիանու Ռոնալդուի ջանքերով ոչինչ չտվող հաղթանակ կորզել:

Այդպիսով, գերմանացիները վաստակեցին 7, ամերիկացիներն ու պորտուգալացիները՝ 4-ական, իսկ գանացիները՝ 1 միավոր: Ընդ որում, ԱՄՆ-ի հավաքականը մրցաշարի ընթացքում խփեց և բաց թողեց 4-ական գոլ, իսկ Պորտուգալիան մրցակիցների դարպասն ուղարկեց 4՝ սեփականն ընդունելով 7 գնդակ:

1/8 եզրափակչի վերջին ուղեգիրն իրար դեմ խաղում վիճարկելու են Ռուսաստանի և Ալժիրի հավաքականները, որոնք խաղադաշտ դուրս կգան ուղիղ կեսգիշերին: