Փաստ ինֆո

Ֆուտբոլի առաջնության E խմբում վերջին տուրից առաջ ստեղծվել էր մի իրավիճակ, երբ ֆրանսիացիները գործնականում ապահովել էին 1/8 եզրափակչին մասնակցելու իրավունքը, իսկ երկրորդ ուղեգիրը հեռակա պայքարում վիճարկեցին Էկվադորի և Շվեյցարիայի թիմերը:

Շատ ավելի դյուրին էր ալպյան երկրի ներկայացուցիչների խնդիրը, որոնց անհրաժեշտ էր ցանկացած հաշվով հաղթել քառյակի հետնապահ հոնդուրասցիներին և հուսալ, որ էկվադորցիները չեն հաղթի ֆրանսիացիներին:

Օտմար Հիտցֆելդի և նրա սաների ակնկալիքները լիարժեք արդարացան: Իրենցից հասանելիքը շվեյցարացիները կատարեցին անթերի՝ կարողանալով Ջերդան Շաքիրիի հեթ-տրիկի շնորհիվ հաղթել 3:0 հաշվով Հոնդուրասի հավաքականին: Գնդակները Նոյել Վալյադարեսի պաշտպանած դարպասում հայտնվեցին 6-րդ, 31-րդ և 71-րդ րոպեներին:

Իսկ հավասարման երկրորդ հատվածի լուծումն ապահովեցին արդեն էկվադորցիները, որոնք ավելի քան 90 րոպեների ընթացքում այդպես էլ հաղթական նկրտումներ չդրսևորեցին: Դարպասը գրավելու 1-2 պահ ունեցան, բայց անփութորեն վատնեցին: Ասենք, այդ պահերն էլ ոչ թե կազմակերպված գործողությունների արգասիք էին, այլ արագ հակագրոհ անցկացնելու պատահական հնարավորության արդյունք: Էկվադորցիները պարզապես չէին տիրապետում Ֆրանսիայի հավաքականին հաղթելու բանաձևին: Մի խոսքով՝ Ֆրանսիա - Էկվադոր խաղն ավարտվեց 0:0:

Ահաև ամփոփիչ մրցաշարային աղյուսակը. Ֆրանսիա՝ 7, Շվեյցարիա՝ 6, Էկվադոր՝ 4, Հոնդուրաս՝ 0 միավոր:

Այդպիսով, 1/8 եզրափակչի հերթական զույգերը կազմեցին Ֆրանսիան և Նիգերիան, Արգենտինան և Շվեյցարիան: Հիշեցնենք, որ այդ փուլում իրար հետ մրցելու են նաև Բրազիլիան ու Չիլին, Հոլանդիան ու Մեքսիկան, Կոլումբիան և Ուրուգվայը, Կոստա Ռիկան և Հունաստանը: Վերջին երկու զույգերը կորոշվեն այսօր: Ընդ որում, արդեն իսկ պարզ է, որ Բելգիան շարունակելու է պայքարը: Թափուր է մնում 3 տեղ: