Փաստ ինֆո

Դրամատիկ հանգուցալուծում ունեցավ ֆուտբոլի աշխարհի առաջնության C խմբի Հունաստան-Կոտ դ'Իվուար որոշիչ հանդիպումը, որի վերջին վայրկյաններին եվրոպացիները 11-մետրանոց հարվածով հաղթանակ կորզելու շնորհիվ անցան 1/8 եզրափակիչ:

Խմբային փուլի եզրափակիչ հանդիպումից առաջ ստեղծված մրցաշարային իրավիճակն ավելի նպաստավոր էր աֆրիկացիների համար, որոնց կբավարարեր նաև ոչ-ոքի արդյունքը: Մինչդեռ, հույներին ձեռնտու էր միմիայն հաղթանակը: Հենց այդ տրամաբանությամբ էլ ընթացավ մրցամարտը: 43-րդ րոպեին իվուարցիներն անհաջող խաղարկելով գնդակը դաշտի կենտրոնամերձ հատվածում՝ կորցրեցին այն և հույն ֆուտբոլիստները ձեռնարկելով արագ հակագրոհ՝ բացեցին հաշիվը: Գեորգիոս Սամարասը հարվածային դիրք դուրս բերեց Անդրեաս Սամարիսին, որն էլ սառնասրտորեն գրավեց դարպասը: Հատկանշական է, որ գոլի հեղինակը փոխարինման էր մտել դրանից կես ժամ առաջ, երբ խաղադաշտը թողեց վնասվածք ստացած Պանայոտիս Կոնեն:

Ընդմիջումից հետո աֆրիկացիները, բնականաբար, փորձեցին փոխել խաղի ընթացքը: Սակայն, շատ հաճախ ապավինելով անհատական վարպետությանը և, հատկապես, գրոհի ավարտական փուլում դրվագն ինքնուրույն հանգուցալուծելու մղմանը՝ վատնում էին նպաստավոր պահերը: Պետք է ասել, որ հույներն էլ ամուր պատնեշ էին ստեղծել սեփական տուգանային հրապարակում:
1:0 հաշիվը պահպանվեց մինչև 74-րդ րոպեն, երբ իվուարցիները վերջապես խելամիտ գրոհ կազմակերպեցին, որը, ճակատագրի հեգնանքով, դիպուկ հարվածով եզրափակեց երեկվա խաղում նրանց վատագույն ֆուտբոլիստներից մեկը՝ Վիլֆրիդ Բոնին: Այդ գոլը ուժերի հարաբերակցությունը փոխեց աֆրիկացիների օգտին: Նրանց ֆրանսիացի մարզիչ Սյաբրի Լյամուշին նույնիսկ շտապեց փոխարինել իր առաջատարներին և… սխալվեց:

Իսկ լարված մրցակցությունը հանգուցալուծվեց վերջին վայրկյաններին, երբ Ջովանի Սիոն սեփական տուգանային հրապարակում հարվածելով Սամարասի ոտքերին՝ 11-մետրանոց հարված «բերեց» իր դարպասին: Այն սառնասրտորեն իրացրեց և Հունաստանին 2:1 հաշվով հաղթանակ պարգևեց հենց Սամարասը: Ահա այդպես նախախնամությունը վարձահատույց եղավ հույներին, որոնց հարվածից հետո գնդակը մինչ այդ երեք անգամ անդրադարձել էր դարպասաձողից:

Մյուս խաղում կոլումբիացիները 4:1 հաշվով ջախջախեցին ճապոնացիներին: Խուան Կուադրադոյի (17-րդ րոպեին՝ 11-մետրանոց հարված), Ջեքսոն Մարտինեսի (55, 82) և Խամես Ռոդրիգեսի (89) գոլերին, ասիացիները պատասխանեցին Սինձի Օկաձակիի (45+1) հաշվենկատ հարվածով:

Այդպիսով, Կոլումբիան վաստակեց 9-ը, Հունաստանը՝ 4, Կոտ դ'Իվուարը՝ 3, իսկ Ճապոնիան՝ 1 միավոր:

1/8 եզրափակիչում հույները կմրցեն Կոստա Ռիկայի, իսկ կոլումբիացիները՝ Ուրուգվայի հավաքականի հետ: Հիշեցնենք, որ այդ փուլի մյուս զույգերը կազմել են Բրազիլիան և Չիլին, Հոլանդիան և Մեքսիկան: