Փաստ ինֆո

«Բանդայի» գործով այսօրվա նիստում դատարանն սկսեց հարցաքննել ամբաստանյալներին:

Առաջինը ցուցմունք տվեց ամբաստանյալ Արթուր Մանուկյանը, ով հայտնեց, որ իրեն ձերբակալել են 2011թ. սեպտեմբերի 23-ին, վթարի ենթարկելուց անմիջապես հետո` հայտարարելով, որ ինքը ոչ մի հանցանք չի գործել և առաջադրված մեղադրանքի հետ ոչ մի առնչություն չունի:

Ամբաստանյալի ձեռքում էր իբրև թե իր կողմից գրված առաջին ցուցմունքը,  որը, պարզվեց,  գրվել է նրա ձերբակալվելուց մեկ օր առաջ: Ա. Մանուկյանի խոսքով՝ չնայած դրա տակ ինքն է ստորագրել, սակայն պնդեց, թե ստորագրել է առանց կարդալու եւ կարծել է, թե  դրանք բժշկական բնույթի փաստաթղթեր են,  քանի որ իրեն այդպես էին ասել:

Ամբաստանյալի խոսքով՝ իրեն ձերբակալելուց 2 օր անց ինքը ցուցմունք է տվել, որը գրված է իր ձեռքով, սակայն այդ ցուցմունքը ինքը գրել է 2 օր խոշտանգվելուց հետո: Նա հայտարարեց, թե  «դույլը  հագցրել են իր գլխին և դուբինկայով հարվածել թե՛ գլխին և թե՛ ոտքերի տակ»: Ամբաստանյալը հայտարարեց, որ իր առողջական վիճակը վատ է եղել, անգամ բերանից արյուն է եկել, սակայն այդ ամենի մասին արձանագրությունը բացակայում է գործի նյութերում:

Մեղադրողի այն հարցին, թե, արդյոք, տեսել է իրեն խոշտանգողներին` ամբաստանյալը նշեց, որ նրանք դիմակավորված են եղել, սակայն տեսել է նրանցից մեկի դեմքը, բայց անունը չգիտի: Ինչ վերաբերում է «Բանդայի» անդամներին, ապա Մանուկյանը նշեց, որ նրանցից ոչ մեկի չի ճանաչել և նրանց հետ որևէ առնչություն չի ունեցել:

Հայտնաբերված զենքի կապակցությամբ էլ  ամբաստանյալը նշեց, որ ինքը ձախլիկ է, իսկ այդ զենքի վրա կա միայն իր մատնեմատի հետքը, որը, ըստ նրա, ձեռք են բերել իրեն խոշտանգելու ժամանակ:

Ըստ ամբաստանյալի՝ ինքը ավազակային հարձակումներ կատարելու համար ստեղծված խմբի ղեկավարող Արտուշ Հակոբյանին չի ճանաչել, իսկ Գուրգեն Հայրապետյանի հետ, ով ներկայումս ողջ չէ, ծանոթներ են եղել: Ձերբակալվելու օրը, ըստ ամբաստանյալի,  Գուրգեն Հայրապետյանի հետ գնացել են հաց ուտելու և մինչև լուսաբաց` ժամը 05-ը, միասին են եղել: Նրա ներկայացմամբ` իրենք վթարի են ենթարկվել և նա փախուստի է դիմել վախենալով, որ մեքենան կարող է պայթել, սակայն մեքենայից ոչ շատ հեռու ոստիկանության աշխատակիցները նրան ձերբակալել են:

Ամբաստանյալը նաև նշեց, որ իրեն ձերբակալելուց հետո 1 տարի շարունակ գտնվել է ԱԱԾ-ում՝ զրկված լինելով հարազատների հետ տեսակցություններից և հեռախոսազանգերից:

Դատական նիստը նախագահող դատավոր Մեսրոպ Մակյանը հայտարարեց, որ ամբաստանյալի նախաքննական և դատաքննական ցուցմունքներում առկա են էական հակասություններ և որ հաջորդ դատական նիստին կշարունակվի ամբաստանյալի հարցաքննությունը ինչպես նաև կհրապարակվի նրա նախաքննական ցուցմունքը:

Հիշեցնենք, որ ամբաստանյալ Արթուր Մանուկյանին մեղադրանք է առաջադրվել այն բանի համար, որ նա 2011թվականի սեպտեմբերին անդամագրվել է անձանց նկատմամբ ավազակային հարձակումներ կատարելու նպատակով Արտուշ Հակոբյանի և Գուրգեն Հայրապետյանի կողմից ստեղծված և ղեկավարվող, ապօրինի կերպով ձեռք բերված հրազեն հանդիսացող 9մմ տրամաչափի ինքնաշեն ատրճանակ-գնդացիրով, 5,45մմ տրամաչափի «ԱԿ-74» տեսակի «ԱՎ 312939. համարի ինքնաձիգով, 7,62մմ տրամաչափի «ՏՕԶ-49» տեսակի «ԻՔՍ-Ն 1105» համարի թմբուկավոր ատրճանակով, 9մմ տրամաչափի «Մակարով» տեսակի «ՍԿ 3540 Պ» համարի ատրճանակով, 7,62մմ տրամաչափի «ՏՏ» տեսակի «ՕԳ 34» համարի ատրճանակով, նույն տրամաչափի «ՏՏ» տեսակի առանց գործարանային համարի ատրճանակով, «ԲԼՈՈւ Ց 06» տեսակի «7-012348» համարի մարտականի ձևափոխված հրազեն հանդիսացող ձայնագազային ատրճանակով և դրանցից կրակոցներ արձակելու համար նախատեսված, ռազմամթերք հանդիսացող փամփուշտներով զինված, կայուն կազմակերպված խմբին` բանդային, ապա բանդայի կազմում մասնակցել է 2011 թվականի սեպտեմբերի լույս 23-ի գիշերը բանդայի կողմից կատարվելիք ավազակային հարձակման նախապատրաստությանը: