Փաստ ինֆո

Աֆրիկյանների շենքի օտարման և տեղափոխման մասին կառավարության և Երևանի քաղաքապետարանի որոշումներն առ ոչինչ ճանաչելու հայցով դատարան դիմած Հայաստանի հելսինկյան կոմիտեի իրավաբան Անի Վարդանյանը «Փաստինֆո»-ի հետ զրույցում հայտնեց, որ դատարանը խախտել է օրենքով սահմանված ժամկետը:

Բանն այն է, որ ներկայացրած հայցադիմումին զուգահեռ, հայցվոր կողմը` Հայաստանի հելսինկյան կոմիտեն և «Ուրբան լաբ» քաղաքաշինական ՀԿ-ն համատեղ դատարան նաև հավելյալ միջնորդություն են ներկայացրել որպես հայցի ապահովման միջոց կասեցնել շենքի ապամոնտաժումը։

«Միջնորդությանը պատասխանելու համար օրենքով նախատեսված 2 օրը երեկ լրացել է, բայց մինչև հիմա մենք դատարանից պատասխան չենք ստացել, հուսով ենք այսօր օրվա ընթացքում գոնե կստանանք»,- մեզ հետ զրույցում ասաց Անի Վարդանյանը:

Ինչ վերաբերում է Աֆրիկյանների տունը քանդելու և տեղափոխելու մասին ՀԿ-ների ներկայացրած բուն հայցին, ապա այն վարույթ ընդունելու  կամ մերժելու դիրքորոշում հայտնելու համար դատարանին օրեքով տրված ժամկետը լրանում է ուրբաթ օրը` հունիսի 27-ին:

Իսկ մինչ դատարանը կհայտնի իր դիրքորոշումը, Աֆրիկյանների տան մոտ շարունակվում են ամենօրյա բողոքի ակցիաները: Կառուցապատող ընկերությունն էլ իր հերթին փորձում է քանդել շենքը:

Ի դեպ, մամուլում տեղեկություններ էին տարածվել նաև այն մասին, որ ապամոնտաժումը դադարեցնելու հայցով դատարան է դիմել նաև մշակույթի նախարարությունը: Նախարարության Հասարակայնության հետ կապերի բաժնի պետ Ալվարդ Սերոբյանը, սակայն, «Փաստինֆո»-ին հայտնեց, որ նախարարությունը, կամ նախարարության համապատասխան գործակալությունները դատարան հայց չեն ներկայացրել:

Փոխարենը, հունիսի 23-ին Մշակույթի նախարարության պատմության և մշակույթի հուշարձանների պահպանության գործակալության ներկայացուցիչը Աֆրիկյանների շենքի ապամոնտաժումն իրականացնող կազմակերպությունից պահանջել էր անհապաղ դադարեցնել շենքի քանդման աշխատանքները` հայտնելով, որ «Միլենիում քոնստրաքշն» ընկերության ներկայացրած փաստաթղթերը թերի են, և հարկ է դադարեցնել աշխատանքները մինչև լրացուցիչ փաստաթղթեր ներկայացնելը: Բայց նախարարության ներկայացուցչի այս պնդումը ևս կառուցապատող ընկերությունն անտեսել էր: