Փաստ ինֆո

Նոյեմբերյանի զորամասում շարքային Լյուքս Ստեփանյանին մահացու հրազենային վնասվածք պատճառելու մեջ մեղադրվող Դավիթ Խաչատրյանի գործով այսօրվա դատական նիստում պաշտպանական կողմը հանդես եկավ պաշտպանական ճառով:

Դավիթ Խաչատրյանի պաշտպան Երեմ Սարգսյանը նշեց, որ Լյուքս Ստեփանյանի մահն արդարացիորեն առաջացրել է նրա հարազատների դժգոհությունը, նրանք դիմել են ծայրահեղ միջոցի՝ փորձելով իրենց որդու դին բերել Երևան՝ Պաշտպանության նախարարության շենքի մոտ:   Ձեւավորված աննախադեպ իրավիճակում մի շարք բարձրաստիճան պաշտոնյաներ՝ ՀՀ պաշտպանության նախարար Սեյրան Օհանյանը, ներկայիս Գլխավոր դատախազ, այն ժամանակ ՀՀ զինվորական դատախազ Գևորգ Կոստանյանը, ՀՀ ոստիկանապետ Վլադիմիր Գասպարյանը ընդառաջ են գնացել Լյուքս Ստեփանյանի հարազատներին:

Փաստաբանի ներկայացմամբ` զինվորի հարազատները ՀՀ պաշտպանության նախարարից պահանջել են  հասարակության ինչպես նաև լրատվության ներկայացուցիչների ներկայությամբ հաստատել, որ Դավիթ Խաչատրյանը դիտավորությամբ է կրակել Լյուքս Ստեփանյանի վրա: Պաշտպանը նաև համոզմունք հայտնեց, որ գուցեև իրադրությունն է բերել այդ դրվագին, որպեսզի այդ լարված իրադրությունը հանդարտվի և գուցեև դրանով է պայմանավորված, որ  դեպքից ընդամենը երեք օր անց ՊՆ Սեյրան Օհանյանը ասաց,  «այո՛, միտումնավոր է կրակել՝ ըստ տեղեկությունների»:

Այսինքն՝ դեպքից երեք օր անց արդեն ամենաբարձր մակարդակով հայտարարվեց, որ Դավիթ Խաչատրյանը միտումնավոր կերպով է կրակել»,- ասաց պաշտպանը և հավելեց նաև որ վերը նշվածի վերաբերյալ համապատասխան տեսանյութերն առկա են համացանցում:

Պաշտպանի խոսքով, գուցե  այս տրամաբանությամբ համարեին, որ դա իրադրությունից դրդված քայլ է, որևէ կերպ անդրադարձ չկատարեին՝ հասկանալով, որ, ի վերջո, փորձ է արվել հանդարտեցնել կամ համոզել, որ այդպիսի ծայրահեղ քայլի չդիմեն: «Բայց, ինչպես պարզվեց, հետագա ամբողջ նախաքննությունը միտված է եղել միայն մի նպատակի. Պաշտպանության նախարարի ենթակայության ներքո գտնվող ՀՀ ՊՆ քննչական ծառայության համապատասխան ստորաբաժանումներն ամեն ինչ արել են, որ իրենց ամենաբարձր ղեկավարի խոսքն իրականություն դարձնեն: Այսինքն՝ այնպես չլինի, որ հարգելի նախարարը այնպիսի խոսք է ասել, որն իրականությանը չի համապատասխանում: Հենց այդ նպատակով էլ նրան համապատասխան մեղադրանք է առաջադրվել Քրեական օրենսգրքի 104-րդ հոդվածի 2-րդ մասի 6-րդ և 112-րդ հոդվածի 1-ին մասով»,- ասաց պաշտպանը:

Ըստ պաշտպանի՝ Պաշտպանության նախարարի հայտարարությունը կանխորոշել է քրեական գործի ընթացքը:

«Եթե դատախազությունն իրոք այս գործով անկողմնակալ էր, իրոք կաշկանդված չէր ոչ Պաշտպանության նախարարի հայտարարությամբ, ոչ սույն քրեական գործի հասարակական հնչեղությամբ, ոչ էլ տուժող կողմի ծայրահեղ ագրեսիվ վարքագծով, և եթե դատախազության միակ նպատակը հենց օբյեկտիվ իրականությունը բացահայտելն էր և արդարադատության իրականացմանը օժանդակելը, ապա ինչո՞վ էր պայմանավորված, որ հենց այս պահին, երբ դատաքննությունն ավարտվել է և պաշտպանական ճառից հետո արդեն դատարանը պետք է դատավճիռ կայացնի, ՀՀ գլխավոր դատախազ Գևորգ Կոստանյանը հեռուստատեսությամբ հայտարարում է, որ Դավիթ Խաչատրյանին առաջադրված մեղադրանքը միանշանակ հիմնավորվել է, այն հաստատվել է ձեռք բերված անհերքելի ապացույցներով և որ այդ գործով արդեն իսկ կայացվել է մեղադրական դատավճիռ», - հայտարարեց փաստաբանը:

Նշենք, որ պաշտպանն այս խոսքերը մեջբերեց «Արմնյուզ» հեռուտաընեկության եթերում Գևորգ Կոստանյանի հայտարարությունից, որտեղ հարց է հնչում «Դուք գո՞հ եք Լյուքս Ստեփանյանի նախաքննությունից» հարցին Գ. Կոստանյանը պատասխանում է  «Այո, ես կարծում եմ՝ մեղադրանքը բացարձակ հիմնավորված է, կատարվել են անհրաժեշտ բոլոր քննչական գործողությունները և ձեռք են բերվել անհերքելի ապացույցները, մեղադրանքը, մեղավորությունը հիմնավորելու համար և մենք, ինչպես գիտեք, ունեցանք մեղադրական դատավճիռ»: Մինչդեռ սույն գործով դատավճիռ դեռ չի եղել եւ գործը գտնվում է դատական վիճաբանությունների փուլում:

Վերլուծելով քննությամբ ձեռք բերված ապացույցները` փաստաբանները դատարանին խնդրեցին վերավորակել իրենց պաշտպանյալին առաջադրված մեղադրանքը. Դավիթ Խաչատրյանին ՀՀ քրեական օրեսգրքի 104-րդ հոդվածի 2-րդ մասի 6-րդ կետով և 112-րդ հոդվածի 1-ին մասով առաջադրված մեղադրանքը վերավորակել և նրան մեղավոր ճանաչել ՀՀ քրեական օրենսգրքի 373-րդ հոդվածի 2-րդ և 3-րդ մասերով (զենքի կանոնների խախտումը, որը մարդու առողջությանն անզգուշությամբ պատճառել է ծանր վնաս, ինչպես նաև անզգուշությամբ առաջացրել է մահ):

Ամբաստանյալի պաշտպան Երեմ Սարգսյանը նշեց, որ եթե դատարանը այնուամենայնիվ հաստատված կհամարի մեղադրանքի կողմից Դ. Խաչատրյանին առաջադրված մեղադրանքի փաստական հանգամանքները, ապա նրան մեղավոր ճանաչել ՀՀ քրեական օրենսգրքի 105-րդ հոդվածով (հոգեկան խիստ հուզմունքի վիճակում կատարված սպանություն) կամ վատագույն դեպքում վերավորակել ՀՀ քրեական օրենսգրքի 104-րդ հոդվածի 1-ին մասով որպես հասարակ սպանություն, ինչպես նաև ՀՀ քրեական օրենսգրքի 120-րդ հոդվածով (անզգուշությամբ մեկ ուրիշի ծանր վնաս պատճառելը):

Պաշտպանը նշեց, որ գործի բոլոր ապացույցների համակցությամբ հաստատված է, ինչը հաստատեցին նաև վկաները. առաջին վնասվածքը ստացել է Հրաչյա Սարգսյանը, գնդակը դիպել է պատին և միայն հետո հետացատկով Լյուքս Ստեփանյանի ետևի կողմից հարվածել:

«Մեկ կրակոցը այն էլ այս պայմաններում որևէ դեպքում չի կարող վկայել շատերի կյանքի համար վտանգավոր եղանակով կատարված սպանության մասին, եթե անգամ համարենք, որ զենքի կանոնների խախտում չէ, այլ դիտավորյալ կրակոցի մասին է խոսքը և Դավիթ խաչատրյանը ուզում էր Լյուքս Ստեփանյանին վնասել, սակայն ուրիշի է դիպել գնդակը», - նշեց փաստաբանը:

Ամբաստանյալ Դավիթ Խաչատրյանի պաշտպան Վաղինակ Գևորգյանն էլ նշեց, որ իրենց պաշտպանյալի պատասխանատվությունը և պատիժը ծանրացնող հանգամանքներ չկան, իսկ մեղմացնող հանգամանքներ են՝ մշտական բնակության վայր ունենալը, կատարածի համար իրեն մեղավոր ճանաչելը, զղջալը, իր, ցուցմունքով գործի բացահայտմանը օգնելը, նախկինում դատապարտված չլինելը, դրական բնութագրվելը, ֆիզիկապես վատառողջ լինելը, նախաքննության և դատաքննության ընթացքում պատշաճ վարքագիծ դրսևորելը:

Ամբաստանյալի մյուս պաշտպան Երեմ Սարգսյանն էլ մանեկենների միջոցով դատարանին ներկայացրեց իրենց դիրքորոշումը՝ կապված կրակոցից առաջ և դրա ժամանակ վիրավորված զինծառայողներ՝ Լյուքս Ստեփանյանի և Հրաչյա Սարգսյանի դիրքերի վերաբերյալ: Նշենք նաև, որ  տուժողի իրավահաջորդ ճանաչված Լյուքս Ստեփանյանի մայրը չցանկացավ ներկա գտնվել դատական նիստի այդ հատվածին և դուրս եկավ դատական նիստերի դահլիճից:

Ամբաստանյալ Դավիթ Խաչատրյանը պաշտպանական ճառով հանդես չեկավ. նա դատարանին տեղեկացրեց, որ իրեն վատ է զգում և մի քանի օր ժամանակ խնդրեց ճառին պատրաստվելու համար:

Հաջորդ դատական նիստը տեղի կունենա հուլիսի 4-ին: