Փաստ ինֆո

Երևանի Տերյան փողոցում ուսանող Տիգրան Հայրապետյանի սպանության գործով այսօրվա նիստում սպանության մեջ մեղադրվող անչափահաս ամբաստանյալ Հայկ Աղամալյանը հայտարարեց, որ ինքը կյանքից չի զրկել Տ.Հայրապետյանին, իսկ այդ մասին հայտարարող վկաները պարզապես սուտ ցուցմունք են տվել: Մեղադրյալը նշեց, թե  «հնարված պատմություններով իմ դեմ են տրամադրել տուժողի հարազատներին»:

Մասնավորապես, նա հայտարարեց, որ վկա Մարտին Գևորգյանի հետ ինքը գտնվում է թշնամական հարաբերությունների մեջ. ժամանակին կռիվ է տեղի ունեցել, մինչև հիմա զգացնել են տալիս մեջքին հասցված հարվածների հետևանքները:

Ամբաստանյալն ընդունեց, որ «չգիտեմ ինչու գոռացել եմ՝ ո՞վ է խփել իմ ընկերոջը» ու դանակով հարվածել է  ոչ թե Տիգրան Հայրապետյանին, այլ սև կուրտկայով տղայի աջ ուսին, արյուն է տեսել, վախեցել է, փախել: Իսկ երբ իմացել է, որ Տիգրանը մահացել է, կարծել է,  որ ինքն է նրան սպանել, սակայն տեսնելով տուժողի դիակի լուսանկարները, համոզվել է, որ նա սև կուրտկայով տղան չէ: «Ոչ մոտեցել եմ, ոչ ճանաչել եմ Տիգրանին»,- ասաց նա: Ի պատասխան մեղադրող Հակոբ Մելքոնյանի հարցերի՝ ամբաստանյալը պնդեց, որ սև կուրտկայի վրա տեսել է արյան կարմիր հետքեր: «Արյունո՞տ էր դանակը» հարցին ի պատասխան հնչեց «չեմ նայել»,  գցել է, թե տվել  դանակը, չի կարող ասել ինչպես է այն հայտնվել ամբաստանյալ Դավիթ Մանուկյանի մոտ:

Պատասխանելով հարցերին, ամբաստանյալը հայտնեց, որ սև կուրտկայով տղայից վտանգ չէր սպառնում և ինքը նրա ձեռքում որևէ առարկա  չի տեսել,  ամբաստանյալը տեղյակ չէր, թե ծեծկռտուքի մասնակից յուրայինների, թե՞ հակառակորդների խմբից էր նա, «այդ դեպքում ինչո՞ւ խփեցիք» հարցին պատասխանեց՝ «կռվի մասնակից էր»: Տեսանյութից պարզ երևում է, որ «դեպի  մարտի դաշտ» խմբի առջևից անչափահաս Հայկ Աղամալյանն է գնում հարցին վերջինս պատասխանեց՝ կապ չունի, իսկ տուժողի իրավահաջորդի ներկայացուցիչ Ռուբեն Բալոյանը գտնում է, որ կապ ունի և դա նշանակում է, որ Հայկ Աղամալյանն է խումբը ղեկավարել:

Տուժողի իրավահաջորդ Պատվական Հայրապետյանը ամբաստանյալի այս ցուցմունքը որակեց որպես «կասկածելի ու անհավաստի»:

Նախաքննական ու դատաքննական ցուցմունքների միջև էական հակասությունների պատճառով դատարանում հրապարակվեցին ամբաստանյալի նախաքննական ցուցմունքները:

Պաշտպանական կողմը, հակառակը, գտնում էր, որ էական հակասություններ չկան, պարզապես ամբաստանյալը դատարանում լրացուցիչ պարզաբանումներ տվեց այն հարցերի շուրջ, որոնք նախաքննության ժամանակ իրեն չէին տրվել:

Նախաքննության ընթացքում առերես հարցաքննության ընթացքում վկա Մարտին  Գևորգյանը հայտնել էր, որ ինքը նորմալ հարաբերությունների մեջ է Հայկ Աղամալյանի հետ, իսկ վերջինս հայտարարել է, որ չի ճանաչում իր հետ առերեսվողին և որևէ փոխհարաբերություններ չունի: Վկան հստակ նշել է, որ «մոտ 20 հոգի տղա» և Հայկը՝ դանակը ձեռքին, գոչել է՝ ո՞վ է իմ ընկերոջը խփել ու դանակով հարվածել տուժողի կրծքավանդակի աջ հատվածին, իսկ Հայկ Աղամալյանն էլ հայտնել էր՝ «ես եմ հարվածել ու մահ պատճառել, սպանելու դիտավորություն չեմ ունեցել»:  Ապա ավելի ուշ, մեկ այլ ցուցմունքում հայտարարել է, որ տեսնելով սպանված ուսանողի լուսանկարները՝ համոզվել է, ի՛նքը  չի սպանել Տիգրան Հայրապետյանին: Նախաքննության ժամանակ Հայկ Աղամալյանը բարձրաձայնել է 4-5 ոստիկանների կողմից իր նկատմամբ բռնությունների գործադրման մասին, սակայն փորձաքննությամբ «վնասվածքների օբյեկտիվ հատկանիշներ չեն հայտնաբերվել»:

Տուժող կողմն այսօր քաղհայց ներկայացրեց դատարանին՝  Հայկ Աղամալյանից ու նրա ծնողներից համապարտության կարգով հանցագործությամբ պատճառված վնասի հատուցման պահանջով: Տուժող կողմը պահանջում է նրանցից բռնագանձել ընդհանուր առմամբ 3 մլն 430  հազար ՀՀ դրամ, որից  1 մլն 430 հազար ՀՀ դրամը որպես հուղարկավորության ծախսերի հատուցում և  2 մլն-ը՝ որպես փաստաբանի վարձատրության գումար: Տուժողի իրավահաջորդ Պատվական Հայրապետյանը ներգրավվեց որպես քաղհայցվոր, իսկ ամբաստանյալն ու իր ծնողները՝ որպես քաղպատասխանատողներ: Վերջիններս իրենց դիրքորոշումը կհայտնեն քաղհայցին ծանոթանալուց հետո, սակայն այսօր իսկ ամբասատանյալի հայրը՝ Ստեփան Աղամալյանը առարկեց քաղհայցի դեմ՝ պնդելով, որ իր որդին չէ «դա արել»:

Դատարանը բավարարեց տուժող կողմի միջնորդությունը որպես հայցի ապահովման միջոց քաղպատասխանողների գույքի վրա հայցագրի չափով արգելանք դնելու մասին՝  գույքի հնարավոր բռնագրավումն ապահովելու համար: