Փաստ ինֆո

«Մեկ տարի առաջ Ադրբեջանի պատվիրակությունն այստեղ նստած իր լոբբիստներով արեց հնարավորը, որպեսզի  Լեռնային Ղարաբաղի Հանրապետությունում գտնվող Սարսանգի ջրամբարի վերաբերյալ ընդունվի բանաձեւ: Մեկ տարի առաջ բյուրոն սթափ որոշում կայացրեց՝ ընդամենն ի գիտություն ընդունելով ադրբեջանական կողմի՝ որեւէ փաստարկից զուրկ պնդումները: Սակայն, ապրիլյան  նստաշրջանում  ԵԽԽՎ բյուրոն, հայտնի չէ, թե ինչո՞ւ, կամ գուցեեւ հայտնի է, թե ինչու, փոխեց իր դիրքոշորումն ու հանձնարարեց սոցիալական հանձնաժողովին նախապատրաստել բանաձեւ՝ ադրբեջանական մոտիվներով»,- մասնավորապես ասված է Եվրոպայի խորհրդի Խորհրդարանական վեհաժողովում հայկական պատվիրակության անդամ Նաիրա Զոհրաբյանի ելույթում:

Ինչպես Ստրասբուրգից հայտնում է հայ պատվիրակը, նա այսօր մեկնարկած ԵԽԽՎ  լիագումար նիստի ընթացքում, Վեհաժողովի բյուրոյի հաշվետվության զեկույցի ժամանակ, ԵԽԽՎ քարտուղարություն է հանձնել իր ելույթը՝ Լեռնային Ղարաբաղի Հանրապետության Սարսանգի ջրամբարի հետ կապված:

Հայ պատվիրակը նշել է, որ իրապես բարձր է գնահատում ԵԽԽՎ բյուրոյի գործունեությունը, սակայն, վերջին շրջանում բյուրոյի որոշ որոշումներ օբյեկտիվ հարցեր են առաջացնում:

«Ես պաշտոնապես հայտարարում եմ, որ Լեռնային Ղարաբաղի իշխանությունները բազմաթիվ անգամներ հայտարարել են, որ պատրաստ են  Ադրբեջանի իշխանությունների հետ երկխոսություն սկսել՝ փոխշահավետ գործակցության պայմաններում Սարսանգի ջրամբարից Ադրբեջանին ջուր մատակարարելու շուրջ: Ավելին, թե՛ Կարմիր Խաչի, թե՛Մինսկի խմբի համանախագահների միջոցով բազմիցս այդ առաջարկը փոխանցվել է ադրբեջանական կողմին: Սակայն Ադրբեջանի իշխանությունը մշտապես մերժել է երկխոսության ցանկացած առաջարկ, ինչից կշահեին երկու կողմերը:

Ես չեմ ուզում պնդել տեսակետը, թե տարբեր վերլուծաբաններ բյուրոյի այս որոշումը համարում են ժեստ Ադրբեջանին՝ ԵԽԽՎ-ում իր  նախագահությանն ընդառաջ, բայց եւ չեմ կարող հերքել նման կասկածները:

Հարգելի գործընկերներ, մեր պատվիրակությունը պատրաստում  է առաջարկություն, որը վերաբերում է Ադրբեջանին սահմանակից հայկական գյուղերին: Ադրբեջանական կողմից ամենօրյա ռմբակոծության պատճառով սահմանամերձ հայկական գյուղերի  բնակիչները չեն կարողանում մշակել իրենց հողն ու ստիպված են ամեն օր ու րոպե ապրել ադրբեջանական հենակետերից սուրացող կրակահերթերի տակ:

Սա փաստ է, սա իրականություն է, եւ ես հույս ունեմ, որ բյուրոն մեր առաջարկը  կհամարի փաստարկված հիմք՝ ԵԽԽՎ բանաձեւ նախապատրաստելու  համար: Այլապես, այս ամենից, անկեղծ ասած, սկսում է երկակի ստանդարտների ու սուբյեկտիվության խիստ սուր հոտ գալ:

Ինչ վերաբերում է Սարսանգի ջրամբարին, ապա ես կրկին անգամ Ադրբեջանին եմ փոխանցում եմ Սարսանգի ջրամբարի փոխշահավետ օգտագործման վերաբերյալ Լեռնային Ղարաբաղի իշխանության առաջարկը: Եթե Ադրբեջանը կրկին մերժի, վստահեցնում եմ, որ  Ղարաբաղի  իշխանություններն ունեն  խնդրի իրենց լուծումը: Իսկ  դա նշանակում է, որ Ադրբեջանի հետ երկխոսության անհրաժեշտություն այլեւս կարող է չլինել: Ուստի Ադրբեջանը, ԵԽԽՎ-ում, Եվրանեսթում ու միջազգային այլ հարթակներում ջղաձիգ շարժումներ եւ քայլեր անելու փոխարեն՝ կարող է ուղղակի երկխոսություն սկսել Ղարաբաղի իշխանությունների հետ: Եթե, իհարկե, այդ երկրի նպատակը ընդամենը  աղմուկը չէ»,-ասված է Ն.Զոհրաբյանի ելույթում: