Փաստ ինֆո

Պահեստազորի գնդապետ Վոլոդյա Ավետիսյանի գործով այսօրվա դատարան նիստին ներկա են գտնվել միայն դատավարության կողմերը և լրագրողները. գնդապետի հարազատներին և  ընկերներին թույլ չեն տվել մուտք գործել նիստերի դահլիճ:

Վ. Ավետիսյանի պաշտպան Արա Զաքարյանը «Փաստինֆո»-ի թղթակցին փոխանցեց իր պաշտպանյալի հարազատներից ստացած տեղեկությունները, ըստ որոնց կարգադրիչները թույլ չտալով նրանց ներս մտնել և մասնակցել նիստին` պատճառաբանելով, թե նման կարգադրություն են ստացել նիստը նախագահող դատավորից:

Եթե դռնփակ նիստի մասին որոշում լիներ, ապա դա պետք է կայացվեր դատական նիստի ժամանակ, իսկ կայացված որոշման դեպքում միայն դատավարության մասնակիցները իրավունք կունենային ներկա գտնվելու դատական նիստին,- նշեց պաշտապանը եւ բացահայտ ապօրինություն որակեց տեղի ունեցածը: Փաստաբանի դիտարկմամբ` տեղի է ունեցել է  ձևական դռնբաց դատական նիստ: «Խախտվել է, թե սահմանադրության և թե կոնվենցիայով երաշխավորված հրապարակային դատաքննության իրավունքը», - ասաց Ա.Զաքարյանը:

Նշենք, որ նախորդ դատական նիստի ժամանակ տհաճ միջադեպ էր գրանցվել. դահլիճում նստածներից մեկը տեղից հանդես էր եկել ռեպլիկով, ինչին արձագանքելով դատավորն ասել էր. «ով էր, թող ոտքի կանգնի և չթաքնվի կանաց փեշի տակ»: Այս արտահայտությունից վիրավորված ազատամարտիկները դատավոր Լևոն Ավետիսյանից պահանջեցին, որ ներողություն խնդրի ազատամարտիկից` հայտարարելով, որ հակառակ պարագայում կդիմեն Արդարադատության խորհրդին:

Փաստաբանը «Փաստինֆո»-ի թղթակցի հետ զրույցում եւս կարծիք հայտնեց, որ դատավորը թույլ է տվել նախագահող դատավորին ոչ հարիր արտահայտություններ եւ պետք է ավելի զսպվածություն ցուցաբերեր: Պաշտպանը ենթադրում է, որ ազատամարտիկները կդիմեն, որ Արդարադատության խորհուրդը  դատավորին ենթարկի պատասխանատվության՝ թույլ տված արտահայտության համար:

Ինչ վերաբերում է դատաքննությանը, ապա նշենք, որ այսօր ավարտվել է նաեւ գրավոր ապացույցների հետազոտումը և դատարանն անցել է դատական վիճաբանությունների փուլին:
Սակայն մինչ այդ պաշտպանը հանդես է եկել մի քանի միջնորդություններով, որոնք բոլորը դատարանը մերժել է:

Մասնավորապես՝ պաշտպանը միջնորդել է որպես վկա հրավիրել և հարցաքննել ՀՀ պաշտպանության նախարար Սեյրան Օհանյանին, քանի որ նախարարը լրատվամիջոցներին տված իր հարցազրույցներում նշել է, որ հանդիպումներ է ունեցել Վոլոդյա Ավետիսյանի հետ,  և քանի որ Վ. Ավետիսյանը խախտել է իրենց պայմանավորվածությունը դրա համար էլ «այս ամբողջը ստեղծվել է»: Ըստ պաշտպանի՝ Սեյրան Օհանյանի այս հայտարարությունից  հետևում է, որ այդ հանդիպումները ուղղակիորեն կամ անուղղակիորեն պատճառահետևանքային կապի մեջ են գտնվում քրեական գործի հարուցման հետ:

Պաշտպանի հաջորդ միջնորդությունը վերաբերում էր քննիչին դատարան հրավիրելուն և հարցաքննելուն` թույլ տված խախտումների և չարաշահումների վերաբերյալ:

Հաջորդ միջնորդությամբ փաստաբանն առաջարկել է պահանջել օպերատիվ հետախուզական միջոցառումների իրականացնելու հիմքում դրված տեղեկություները և հիմքերը: Այս միջնորդությունը եւս դատարանը մերժել է՝ պատճառաբանելով, որ այդ գործողությունները, գաղտնալսումները արվել են դատարանի որոշման հիման վրա, հետևապես օրինական է:

«Իսկ թե ինչու պետք է Ազգային անվտանգության ծառայության ահաբեկչության դեմ պայքարի վարչությունը Սեյրան Օհանյանի հետ տեղի ունեցած հանդիպումներից հետո հետաքրքրվեր Վ. Ավետիսյանով` մնաց փակ, ինչ է Վ. Ավետիսյանը ահաբեկչություն էր պատրաստվում անել, որ այդ վարչությունը սկսել էր նրանով հետաքրքրվել»,- նշեց է Արա Զաքարյանը:

Պաշտպանական կողմը առանձնապես մեծ հույսեր չունի մեր դատական համակարգից. գործը «շինծու» համարելով հանդերձ պաշտպանը կարծիք հայտնեց, որ «երևի թե չեն գնա ստորության գագաթնակետի և չեն տա այնպիսի պատիժ, որպեսզի համաներման կիրառմամբ հնարավոր չլինի Վ. Ավետիսյանին պատժից ազատել»:

Հաջորդ դատական նիստը տեղի կունենա հունիսի 30-ին: