Փաստ ինֆո

ՀԺԿ նախկին անդամ Գրիշա Վիրաբյանի ներկայացուցիչ Արա Ղազարյանը հուսով է, որ Վերաքննիչ դատարանը կմերժի առաջին ատյանի դատարանի որոշման դեմ դատախազի կողմից  բերված բողոքը:  «Փաստինֆո»-ի թղթակցի հետ զրույցում Արա Ղազարյանը կարծիք հայտնեց, որ դատախազի բողոքն այնքան էլ հիմնավոր չէ, ավելին՝ անհասկանալի են բողոքի հիմքերը:

Մասնավորապես, դատախազը նշել է, որ 2004-2005թթ. քննիչն երկու որոշում էր կայացրել ոստիկանների կողմից Գրիշա Վիրաբյանին խոշտանգելու փաստով քրեական գործ չհարուցելու և կոնկրետ անձանց հարցաքննելու վերաբերյալ Վիրաբյանի միջնորդությունը մերժելու մասին: Դատախազի կարծիքով,  դատարանն այդ որոշումները պատշաճ գնահատման չի արժանացրել, այդ պատճառով անհնարին է դառնում ՄԻԵԴ վճռի կատարումը ազգային մակարդակով:

Նշենք, որ առաջին ատյանի դատարանը վերջերս որոշում էր կայացրել քննիչի` քրեական գործ չհարուցելու որոշումը վերացնելու և գործը կրկին նախաքննության ուղարկելու մասին, այսինքն, ըստ Ա.Ղազարյանի,  վերականգնվել է  «ստատուս քվոն»՝ մինչև խախտումն եղած  վիճակը:

Այդ որոշման ուժի մեջ մտելուց հետո` քննիչը, անկախ այն բանից, որ խոշտանգումներից  արդեն 9 տարի է անցել և որ ժամանակի ընթացքում հետքերը վերանում են, նորից պետք է քննություն անցկացնի: Քննիչը պետք է քննի Գրիշա Վիրաբյանի  այն պնդումները, որոնք նա 2004-2005թթ. ներկայացրել էր: Այն է`  ոստիկաններն իրեն խոշտանգել են իր քաղաքացիական ակտիվության համար, «այն բանի համար, որ ինքը Գրիշա Վիրաբյանն  է»: «Քննիչն այս անգամ կրկին նույն որոշումը չի կարող կայացնել»,- ասաց Արա Ղազարյանը:

Գրիշա Վիրաբյանի գործը վերաբացվել էր Եվրոդատարանի վճռի հիման վրա.  Վճռաբեկ դատարանը նոր հանգամանք ի հայտ գալու հիմքով  որոշեց  վերաբացել գործը, և այդ մասով բեկանել  իր նախկին որոշումը, ինչպես նաև առաջին ատյանի դատարանի որոշումը, որով օրինական ու հիմնավորված էր համարել քննիչի՝ քրեական գործ չհարուցելու որոշումը: Հիշեցնենք, որ Գրիշա Վիրաբյանը  2004թ. ապրիլի 12-ին՝ ՀՀ նախագահի նստավայրի մոտ ընդդիմության կազմակերպած ցույցից հետո, բերման էր ենթարկվել Ոստիկանություն, որտեղ էլ ենթարկվել էր դաժան ծեծի ու խոշտանգումների:

Եվրոդատարանն իր վճռում արձանագրել էր խտրականության բացառման իրավունքի խախտում` այն հիմքով, որ  քննիչը պատշաճ քննության առարկա չի դարձրել Գրիշա Վիրաբյանի` քննության ժամանակ հնչեցրած հայտարարություններն այն մասին, որ իրեն խոշտանգել են իր քաղաքական հայացքների, քաղաքացիական ակտիվության համար: Գործը քննվել էր որպես սովորական քրեական գործ, որ հարուցված էր ոստիկանին հարվածելու հիմքով: Մինչդեռ, ըստ Եվրոդատարանի, խտրականության գործերով  պետք է քննությունը տարվի մայր գործով քննությունից առանձին, եթե քաղաքացին ասում է, որ իրեն խոշտանգել են և խոշտանգել են իր հայացքների կամ կրոնական համոզմունքների համար, ապա քննիչը պետք է այդ փաստերը ստուգի: Եվ քանի որ քննիչն այդ փաստերը չէր ստուգել, դրանց կարևորություն չէր տվել, Եվրոդատարանն արձանագրել էր, որ արդյունավետ քննություն չէր ապահովվել խտրականության բացառման հիմքով: