Փաստ ինֆո

«Այո', կան դեպքեր, երբ քաղաքացին բացակայել է ՀՀ-ից, կամ ներկա չի գտնվել իր հաշվառման հասցեում: Հայաստանում բավական տարածված է այն իրավիճակը, երբ քաղաքացիները հաշվառված են մի հասցեում, սակայն փաստացի բնակվում են մեկ ուրիշ հասցեում, և այստեղից ստեղծվում է մի իրավիճակ, որ վարչական ակտերի մի զգալի քանակություն չեն ծանուցվել: Սակայն, այդ դեպքերի համար օրենսդրությունը նախատեսել է ընթացակարգ, և Ճանապարհային ոստիկանությունն այդ ընթացակարգով ղեկավարվում է»,- պատասխանելով վերջին շրջանում վարչական տուգանքների մասին քաղաքացիների՝ ոչ պատշաճ ծանուցման մասին բողոքների վերաբերյալ «Փաստինֆո»-ի հարցի՝ ասաց Հայաստանի Ճանապարհային ոստիկանության պետի տեղակալ Արմեն Խաչատրյանը:

Հիշեցնենք՝ բազմաթիվ քաղաքացիներ բողոքում են, որ անակնկալ կերպով պարզել են, որ իրենց բանկային հաշիվների վրա արգելանք է դրվել ԴԱՀԿ ծառայության կողմից՝ ճանապարհային երթևեկության կանոնների խախտման համար նախատեսված տուգանքը չվճարելու հիմքով: Բայց իրենք տուգանքի մասին չեն էլ իմացել:

Մեր հարցին, թե ո՞ւմ մեղավորությունն է, որ քաղաքացին պատշաճ չի ծանուցվել, Արմեն Խաչատրյանն ասաց. «Վարչական ակտը կազմելուց հետո 3-օրյա ժամկետում ՃՈ-ն այն հանձնում է համապատասխան փոստային ծառայություններին, որոնք առաքում են վարչական ակտերը հասցեատերերին: Փոստային ծառայություններն արդեն իրենց համար սահմանված նորմերով կատարում են այդ գործառույթը»:

Ի դեպ, սահմանված կարգով, անգամ սխալ հասցեով ուղակված վարչական տույժերի մասին ծանուցումները, որոնց մասին անձը չի էլ իմանում, միևնույն է՝ համարվում են անձին հանձնված, և ուժի մեջ են մտնում: Իսկ օրենքը նախատեսում է, որ ծանուցումը ստանալուց հետո 30 օրյա ժամկետում տուգանքը պետք է վճարվի: Ի դեպ, նախկինում նախատեսված էր նաև 30-օրյա ժամկետից հետո գումարի եռապատկում, ավելի ուշ՝ նաև հնգապատկում: Այսօր, սակայն, այս կարգից ոստիկանությունը հրաժարվել է:

«Կարղ եմ հստակ ասել, որ ոստիկանությունն իր գործառույթները կատարում է հստակ, սահմանված նորմերին համապատասխան, և 2014թ. արդեն իսկ չկատարված որոշումները, այսինքն՝ չվճարված տուգանքների մասով, ուղարկվում են ԴԱՀԿ ծառայություն, այլևս վարչական դատարան չի ուղարկվում: Եվ, բնականաբար, կան վարչական ակտեր, որոնց հասցեատերերը չեն ստացել այդ վարչական ակտերը, և սահմանված ժամկետն անցնելուց հետո մենք ուղարկում ենք ԴԱՀԿ ծառայություն, և եթե չեն ծանուցվել, գումարը ներկայացնում ենք մայր գումարով, չի եռապատկվում և չի հնգապատկվում»,- ասաց ՃՈ պետի տեղակալը:

Ի դեպ, լինում ենք դեպքեր, երբ քաղաքացին վճարում է տուգանքը, սակայն այն ինչ-ինչ պատճառներով ՃՈ չի հասնում: Նման դեպքերում, ըստ Արմեն Խաչատրյանի, բավական է, որ քաղաքացին նույնիսկ հեռախոսազանգով իրենց տեղյակ պահի, և իրենք, համապատասխան բանկի հետ ճշտելուց հետո, հրաժարվում են ԴԱՀԿ իրենց պահանջից:

Իսկ թե որքան շատ են նման դիմում-բողոքները, Արմեն Խաչատրյանը չհստակեցրեց՝ պատճառաբանելով, որ նման հաշվառում ՃՈ-ն չի կատարել, բայցև հայտնեց, որ քաղաքացիներից օրական 2-3 դիմում-բողոք են ստանում:

Իսկ, որպեսզի քաղաքացիներն ավելի տեղեկացված լինեն՝ իրենց նկատմամբ կիրառված վարչական տուգանքների մասին, ՃՈ պետի տեղակալը նշեց. «Ոստիկանության պաշտոնական կայքում մենք տեղադրում ենք բոլոր իրավախախտումները, ցանկացած քաղաքացի կարող է հավաքել իր տրանսպորտային միջոցի հաշվառման տվյալները և պետհամարանիշը, և տվյալ տրանսպորտային միջոցով թույլ տված իրավախախտումներին ծանոթանալ»:

Հեղինակ՝ Նելլի Դանիելյան

Լուսանկարը՝ Armenpress-ի