Փաստ ինֆո

«Յունիբանկի» վարչության նախագահ Վ.Աթայանի նկատմամբ  սուտ մատնության հոդվածով քրեական գործ չհարուցելու որոշման համար վարույթն իրականացնող մարմնի դեմ «Հին Էրիվանի» սեփականատեր Մանվել Տեր-Առաքելյանի բողոքի գործով այսօր վերջապես կայացավ լիարժեք դատական նիստ` բոլոր կողմերի մասնակցությամբ:

Ավելի վաղ  դատական նիստերը հետաձգվել էին. նախ վարույթն իրականացնող մարմինն ու դատախազը դատարանից խնդրել էին գործի նյութերը,  ապա հաջորդ անգամ  ժամանակ էր պահանջվել գործի նյութերին մանրակրկիտ ծանոթանալու համար: Ավելի ուշ պարզվել էր, որ   դատախազ Հայկ Էյրամջյանի փոխարեն, ով, ըստ բողոքը ներկայացրած կողմի տեղեկությունների, դատախազության համակարգում այլ աշխատանքի է անցել, գործում պետք է նոր դատախազ ներգրավվի: Ապա դատական նիստը հետաձգվել էր նիստին ներկայացած  նոր ներգրավված դատախազ  Նիկոլայ Բարսեղյանի միջնորդությամբ՝ նա  ժամանակ էր   խնդրել իր դիրքորոշումը  հայտնելու համար:

Իր առարկություններում այսօր Վարդան Աթայանի ներկայացուցիչ Հայկ Հարությունյանը հայտարարեց, որ բանկի և «Հին Էրիվան»-ի միջև կնքված պայմանագրում կնիքի ու ստորագրությունների կեղծ լինելու մասին Վարդան Աթայանը սոսկ իր դատողություններն է արել: Մանվել Տեր-Առաքելյանի ներկայացուցիչ Հայկ Ալումյանն իր հերթին առարկեց առարկությունների դեմ՝ ընդգծելով, որ Վարդան Աթայանը անվերապահորեն հաղորդում է ներկայացրել հանցագործության մասին՝ իմանալով, որ իր տրամադրած «տեղեկություններն»  ակնհայտ կեղծ են:

Մանվել Տեր-Առաքելյանը դժգոհություն հայտնեց, որ  «Յունիբանկի» ներկայացուցիչ Հայկ Հարությունյանը փորձում է  վեճը քրեական դաշտից քաղաքացիաիրավական դաշտ տեղափոխել, դատարանը նրան հեռացրեց դատական նիստի դահլիճից, այդպիսով, Մանվել Տեր-Առաքելյանի գնահատմամբ, զրկելով իրեն դատական պաշտպանության իրավունքից:

Հունիսի 23-ին դատարանը՝ դատավոր Արմեն Բեկթաշյանի նախագահությամբ,  կհրապարակի բողոքի վերաբերյալ իր որոշումը:

Հիշեցնենք, որ բողոքի համար հիմք էին ծառայել հետևյալ հանգամանքները. 2009թ. մայիսի  25-ին «Յունիբանկի» և «Հին Էրիվանի» սեփականատիրոջ միջև կնքվել էր պայմանագիր՝ վճարումների հետաձգման մասին: Մանվել Տեր-Առաքելյանը զարմանքով հայտնաբերել է, որ վարկի գումարների վճարումը հետաձգվել է ոչ թե մինչև 2019թ., ինչի մասին կողմերը  բանավոր պայմանավորվել էին, այլ՝ մինչև 2017թ.: Մ.Տեր-Առաքելյանն այս մասին հայտնել է Աթայանին, վերջինս հավաստիացրել է, որ թյուրիմացություն է տեղի ունեցել, կշտկվի: Եվ,  իրոք, երկրորդ տարբերակում տեխնիկական սխալն ուղղված է եղել:  
 
Այդուհանդերձ, 2011թ. հուլիսի 13-ին Վարդան Աթայանը դիմել է ՀՀ ոստիկանության կազմակերպված հանցավորության դեմ պայքարի վարչություն՝ հայտարարելով, որ շտկված պայմանագրում ստորագրություններն ու կնիքը կեղծված են՝ իբրև Մ.Տեր-Առաքելյանի կողմից ֆինանսական շահույթ ստանալու նպատակով:
 
Փորձաքննության եզրակացությամբ, սակայն, հերքվել է այս պնդումը, այսինքն՝ որևէ կեղծիք չի հայտնաբերվել:

Մանվել Տեր-Առաքելյանը պահանջել էր քրեական գործ հարուցել Աթայանի նկատմամբ՝ զրպարտության  համար, սակայն քննիչը գտել էր, որ Աթայանի դեմ քրեական գործ հարուցելու համար հիմքեր չկան: Դատախազը  մերժել էր քննիչի որոշման դեմ ներկայացված բողոքը, իսկ դատական ատյանները՝ քննիչի ու դատախազի որոշումները վերացնելու պահանջի մասին Տեր-Առաքելյանի հայցը:

Ի դեպ,  երեկ կառավարության  ղեկավար Հովիկ Աբրահամյանը հանդիպել է Մանվել Տեր-Առաքելյանի հետ՝ հանդիպումը տեղի է ունեցել  վարչապետի  նախաձեռնությամբ: Վերջինս հավաստիացրել է, որ ջանքեր է գործադրելու, որպեսզի «հակամարտող կողմերը» նստեն կլոր սեղանի շուրջ և գտնեն երկարամյա կոնֆլիկտի խաղաղ լուծում: