Փաստ ինֆո

2001-2006 թթ.  որպես ՀՀ արդարադատության նախարարության քրեակատարողական վարչության պետ պաշտոնավարած Սամվել Հովհաննիսյանի պաշտպան Վահագն Մարտիրոսյանը դիմում  է ներկայացրել  դատարան` բողոքարկելով ՀՀ գլխավոր դատախազության կողմից հանցագործության մասին հաղորդման հիման վրա քրեական գործ հարուցելուց անհիմն հրաժարվելու գործողությունը:

Ս.Հովհաննիսյանի պաշտպանը հանցագործության մասին հաղորդում էր ներկայացրել  ՀՀ գլխավոր դատախազ Գ․Կոստանյանին  առ այն, որ Ս․Հովհաննիսյանի նկատմամբ իրականացված քրեական հետապնդման ընթացքում դատախազության և նախնական քննության մարմնի մի շարք աշխատակիցների կողմից թույլ են տրվել ապօրինություններ, որոնք պարունակում են ՀՀ քրեական օրենսգրքի 308-րդ հոդվածի 1-ին ամսով, 309-րդ, 314-րդ, 348-րդ հոդվածի 1-ին մասով և 349-րդ հոդվածի 2-րդ մասով նախատեսված հանցագործություններ (պաշտոնեական լիազորությունները չարաշահելը, պաշտոնեական լիազորություններն անցնելը, պաշտոնեական կեղծիքը, ապօրինի ձերբակալելը կամ կալանավորելը, ապացույցներ կեղծելը): Ուստի, փաստաբանի կարծիքով, դիմումը պետք է  քննության առնվեր ՀՀ քրեական դատավարության օրենսգրքի 177-րդ (ֆիզիկական անձանց հաղորդումները), 180-181-րդ հոդվածների (հանցագործությունների  մասին  հաղորդումների քննարկման կարգը և դրանց քննարկման արդյունքում ընդունվող որոշումները), պահանջների հիման վրա։
 
ՀՀ գլխավոր դատախազության ՀՀ ԱԱԾ մարմիններում քննվող և կիբեր հանցագործությունների գործերով վարչության դատախազ Հ․Հակոբյանը 29․05․2014թ. գրությամբ հայտնել է, որ  հանցագործության հաղորդման մեջ նշված հանգամանքները վերաբերում են Սամվել Հովհաննիսյանի դեմ  քրեական գործին, որոնք դատական քննության ընթացքում գնահատվել են դատարանի կողմից, ուստի ենթակա են քննարկման վերաքննության կարգով ներկայացված բողոքի  շրջանակներում։

Դատարանի 05․05․2014թ.  դատավճռով, Սամվել Հովհաննիսյանը ճանաչվել է մեղավոր ՀՀ քրեական օրենսգրքի 178-րդ հոդվածի 3-րդ մասի 1-ին կետով՝ առանձնապես խոշոր չափերով խարդախություն  և 38-35-104-րդ հոդվածի 2-րդ մասի 8-րդ կետով՝ պատվերով սպանության նախապատրաստության կազմակերպում և դատապարտվել ազատազարկման 12 տարի ժամանակով, իսկ 38-35-104-րդ հոդվածի 2-րդ մասի 7-րդ կետով՝ մի խումբ անձանց կամ կազմակերպված խմբի կողմից սպանության նախապատրաստության կազմակերպում,  արդարացվել:

Նշենք, որ հիշյալ դատավճիռն արդեն բողոքարկվել է Վերաքննիչ քրեական դատարան:  Վերաքննիչ բողոքում Ս.Հովհաննիսյանի պաշտպան Վահագն Մարտիրոսյանը միջնորդում է Սամվել Հովհաննիսյանին ՀՀ քրեական օրենսգրքի 178-րդ  հոդվածի  3-րդ մասի 1-ին կետով և 38-35-104-րդ  հոդվածի  2-րդ մասի 8-րդ կետով նախատեսված հանցանքներ կատարելու մեջ ճանաչել անպարտ և հռչակել նրա անմեղությունը՝  արդարացնելով նրան և ազատ արձակել դատարանի նիստերի դահլիճից, կամ վերադարձնել ստորադաս դատարան` այլ կազմով ողջ ծավալով նոր քննության, կամ իր պաշտպանյալի մեղքը ապացուցված համարելու դեպքում նրա նկատմամբ նշանակել արդեն իսկ նշանակվածից առավել մեղմ պատիժ, իսկ հնարավորության դեպքում կիրառել նաև ՀՀ քրեական օրենսգրքի 70-րդ  հոդվածը, այսինքն՝ պայմանականորեն չկիրառելով այն: