Փաստ ինֆո

Վարդան Պետրոսյանի գործով դատական նիստում այսօր կողմերի միջև բավական բուռն քննարկման առարկա դարձավ Վարդան Պետրոսյանի նկատմամբ Գյուղնախարարության «Գյուղատնտեսական ծրագրերի իրականացման գրասենյակ» պետական հիմնարկի կողմից դատարան ներկայացրած քաղաքացիական հայցը, որով վթարված «Նիվա» մակնիշի ավտոմեքենայի համար որպես փոխհատուցում Վարդան Պետրոսյանից պահանջում է 2.6 մլն դրամ. Արթուր Հակոբյանի վարած եւ վթարի ենթարկված «Նիվա» ավտոմեքենան պատկանել է Գյուղնախարարության հիշյալ կառույցին:

Վարդան Պետրոսյանի պաշտպան Նիկոլայ Բաղդասարյանն այսօր, քրեական գործի նյութերը վկայակոչելով, հայտարարեց, որ 2006թ-ի արտադրության Նիվա ավտոմեքենան, որի վազքը վթարի պահին կազմել է 163 000 կմ, գնահատվել է շուկայական արժեքով` 3 մլն դրամ, որից հանվել է Նիվայի մնացորդային արժեքը, և Վարդան Պետրոսյանի դեմ 2.6 մլն դրամի քաղաքացիական հայց է ներկայացվել դատարան:

Վկայակոչելով ավտոմեքենաների վաճառքի մասին համացանցում տեղադրված հայտարարությունները, Նիկոլայ Բաղդասարյանը հայտարարեց, որ այդ ժամանակահատվածում համարժեք ավտոմեքենաները շուկայում նման գին չեն ունեցել, «այդ գումարն ակնհայտ ուռճացված է»,- հայտարարեց փաստաբանը:

Նիկոլայ Բաղդասարյանը համոզմունք հայտնեց նաև, որ դա արվել է դիտավորյալ, որպեսզի պահանջվող գումարը գերազանցի 1.8 մլն դրամը, քանի որ ըստ ապահովագրական պայմանագրի, Վարդան Պետրոսյանի դեմ հայց կարող էր ներկայացվել դատարան միայն այդ գումարը գերազանցող պահանջի դեպքում:

«Եթե տվյալ տրանսպորտային միջոցը գնահատվեր շուկայական արժեքով` առավելագույնը` 2 մլն. 200 000 դրամ, հանեին 737 000-ը, ապա պատճառված վնասը չէր գերազանցելու 1 մլն 800 000-ը, և հարգարժան գյուղնախարարության ներկայացուցիչը հայց չէր կարող ներկայացնել ընդդեմ Վարդանի և պահանջեր, որ Վարդանի գույքը դնեին արգելանքի տակ»,- հայտարարեց Վարդան Պետրոսյանի պաշտպանը: Իսկ, թե ինչ նպատակ է հետապնդել Վարդան Պետրոսյանի գույքը արգելանքի տակ դնելու նախաքննական մարմնի գործողությունը, Նիկոլայ Բաղդասարյանն այսպես մեկնաբանեց. «նախաքննական մարմինը բավականին ջանասիրություն է դրևորում, ոչ թե այդ գումարի չափով է դնում, այլ ողջ հաշիվներն ու գույքը դնում է արգելանքի տակ, որը մի քանի անգամ գերազանցում է 2 մլն 262 000-ը, որ տեսնեն հետագայում ի՞նչ կարող են ապահովել տուժողների համար, բայց հայտնաբերում են, որ Վարդան Պետրոսյանը գրեթե ոչ մի բան չունի, և տուժողների համար ոչ մի բան չեն կարող ապահովել, այսինքն` ապօրինի ակտի արդյունքում էլ տուժողները ոչ մի բան չեն ստանա»:

Պաշտպանական կողմի այս հայտարարությունն անարձագանք չթողեց տուժողների շահերի պաշտպան Ռուբեն Բալոյանը: Փաստաբանը հայտարարեց, որ այդ հայտարարություններից հետո իր համար պարզ է դառում, որ «տուժողների հետ հանդիպումները ուղղակիորեն ձևական բնույթ են կրել»: «Ես զարմանում եմ` Վարդան Պետրոսյանը գույք չունի, տալու բան չունի, հիմա ինձ համար պարզ է դառնում, թե սա ուր է տանում` չունի’, չի’ տա»,- եզրափակեց Ռուբեն Բալոյանը:

Երկու կողմերի միջև այս բանավեճին անմասն չմնաց նաև ինքը` Վարդան Պետրոսյանը: «Ես իմ ընտանիքի անունից հայտարարում եմ, որ այդ հանդիպումները տուժոների հետ, որոնք կազմակերպվել են, արվել են սրտանց, և մինչ օրս էլ դրանք, այնուամենայնիվ օդում կախված են, վերջացած չեն»,- ասաց նա: Իսկ ինչ վերաբերում է Նիվայի գնին, ապա, դա իր համար ցավալի խոսակցություն է, և ինքը կցանկանար, որ այն շատ ավելի բարձր գնահատվեր, «բայց այս ամեն ինչը չարվեր  հոգեբանական ճնշումներ բանեցնելու համար, սա իմ սուբյեկտիվ կարծիքն է, ես դա գիտեմ, զգում եմ հրաշալի, որ սա հերթական հոգեբանական ճնշման մեթոդն է ինձ ճնշելու, անհաջող ճնշելու համար, ինչ-որ մի բան պլոկելու համար, հարցը այստեղ 3 մլն-ը չէ»,- ասաց Վարդան Պետրոսյանը: