Փաստ ինֆո

Վարդան Պետրոսյանի գործով դատական այսօրվա նիստում  հրապարակվեց քննչական փորձարարության արձանագրությունը:

Վարդան Պետրոսյանի պաշտպան Նիկոլայ Բաղդասարյանը հայտարարեց, որ արձանագրությունը վկայում է, որ «Նիվա» մակնիշի ավտոմեքենան վթարին նախորդող պահին կատարել է հետընթաց` դեպի Եղվարդ, իսկ  քննչական փորձարարությամբ հիմնավորվում է, որ ավտոմեքենայի փոխանցման տուփը դրված է եղել հետընթաց ռեժիմի վրա: «Ընդունվել է Արթուր Հակոբյանի կողմից, որ իր ավտոմեքենան կամ շարժվել է հետընթաց դեպի Եղվարդ, կամ ուզել է շարժվել դեպի Եղվարդ»,- ասաց պաշտպանը:

Նրա այս հայտարարությանն արձագանքելով` մեղադրող դատախազ Արթուր Սարգսյանն իր հերթին հայտարարեց, որ պաշտպանի այդ ենթադրությունը հիմնված է այն բանի վրա, որ «վթարի պահին վառված են եղել Նիվայի և’ հետընթացի և’ կանգառի լույսերը»: «Դա նորություն չէ, որ մեքենան գտնվել է հետընթաց դիրքում, և դա արձանագրվել է փորձագիտական կազմակերպության կողմից»,- ասաց դատախազը: Այս դիտարկմանն էլ Նիկոլայ Բաղդասարյանը տվեց հետևյալ պարզաբանումը. «Նիվա մեքենան հետընթաց կատարելիս, վարորդը ոտքը դրել է արգելակի վրա, արդեն ինքը արգելակում էր, երբ որ Վարդան Պետրոսյանը հետևից եկել հարվածել է: Դրա համար հարվածի պահին, շատ ճիշտ արձանագրվել է փորձագետի կողմից, վառվել են և’ արգելակման և’ հետընթացի լույսերը»: Պաշտպանական կողմի վարկածով, «Նիվայի» վարորդն անցել է դեպի Աշտարակ թեքվող ճանապարհը, կանգնել, հետընթաց կատարել, որպեսզի կարողանա ճանապարհը շարունակել դեպի Աշտարակ, և հենց այդ պահին էլ, ըստ պաշտպանի, ճանապարհի բանուկ հատվածում տեղի է ունեցել վթարը:

Դատարանում այսօր հրապարակվեցին նաև վթարի օրը Վարդան Պետրոսյանի հեռախոսային զանգերի վերծանումները: Դրանց համաձայն, Վարդան Պետրոսյանը վթարին նախորդող ժամանակահատվածում 3 հեռախոսազանգ է ստացել, որոնցից առաջինը` 20:18-ին, խոսակցությունը տևել է 25 վայրկյան, երկրորդը` 22:09-ին, և, ըստ փաստաթղթի տևել 00 վայրկյան, երրորդ զանգը ստացվել է 22:10-ին և տևել 40 վայրկյան: Նիկոլայ Բղդասարյանը խոսքով, դա նշանակում է, որ Վարդան Պետրոսյանի հեռախոսը 2 անգամ անջատվել է, քանի որ տվյալ տարածքում կապը լավը չէ, իսկ տուժող կողմը պնդում է, որ վթարը տեղի է ունեցել հենց հեռախոսով խոսելու պահին:

Ի դեպ, հիշեցնենք, ըստ քրեական գործի նյութերի, վթարը տեղի է ունեցել «2013թ. հոկտեմբերի 20-ին՝ ժամը 22:10-ի սահմաններում»:

Փաստաբանների հայտարարություններից հետո այս հարցի վերաբերյալ իր խոսքն ասաց նաև Վարդան Պետրոսյանը. «Ես հեռախոսային խոսակցություն ունեցել եմ Օնիկի Հակոբյանի հետ, շատ կարճ, որովհետև ասել եմ, կհասնեմ քաղաք, կխոսենք, այդտեղ անջատվել է հեռախոսը, հեռախոսային խոսակցությունը եղել է մոտավորապես 5-6 կմ վթարի վայրից հեռու: Վթարի պահին, վթարից առաջ ես հեռախոսով չեմ խոսել»