Փաստ ինֆո

ՀՀ վերաքննիչ քրեական դատարանը  հունիսի 18-ին  անփոփոխ  է  թողել գողության գործով Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության դատարանի ապրիլի 25-ի արդարացման դատավճիռը: Այս մասին «Armenian Lawyers» ֆեյսբուքյան խմբում գրառում է թողել «Հանրային պաշտպանը»՝ նշենք, որ ամբաստանյալների պաշտպանությունը առաջին ատյանի և վերաքննիչ դատարաններում իրականացրել է հանրային պաշտպան Արտակ Գարոյանը:

Այսպես,  առաջին ատյանի դատարանը ճանաչել և հռչակել էր  ամբաստանյալներ  Մանվել  Մակյանի, Մուշեղ  Մակյանի և Սեյրան Առուշանյանի  անմեղությունը ՀՀ քրեական օրենսգրքի 177-րդ հոդվածի 2-րդ մասի 1-ին կետով՝ մի խումբ անձանց կողմից նախնական համաձայնությամբ գողության համար առաջադրված մեղադրանքում` նրանց  արարքում հանցակազմի բացակայության պատճառաբանությամբ: Նրանց նկատմամբ  որպես խափանման միջոց կիրառված չհեռանալու մասին ստորագրությունը վերացվել էր:

Ըստ մեղադրանքի, ամբաստանյալները  ուրիշի գույքի գաղտնի հափշտակություն կատարելու դիտավորության շուրջ նախնական համաձայնության գալով ու գործելով մեկ միասնական դիտավորությամբ, 2013թ. հոկտեմբերի 23-ին ժամը 04:00-ից մինչև 07:20-ն ընկած ժամանակահատվածում, գաղտնի հափշտակել են Երևան քաղաքի Ա.Խաչատրյան փողոցում կայանված, գործով չպարզված անձանց պատկանող  «Օպել», «Դեյվու»   և գործով չպարզված ևս մեկ այլ մակնիշի և անհայտ պետհամարանիշերի ավտոմեքենաների թվով 12 հատ, ընդհանուրը 8.000 ՀՀ դրամ արժողության պլաստմասե անվասկավառակների կափարիչները: Ընդ որում, նրանց  մեղավորությունը նախաքննության մարմինը հաստատված է համարել  նրանց իսկ նախաքննական` խոստովանական ցուցմունքներով, ապրանքագիտական փորձաքննության փորձագետի եզրակացությամբ, անձին բերման ենթարկելու մասին 23.10.2013թ.-ի արձանագրություններով, ավտոմեքենայի զննություն կատարելու մասին 23.10.2013թ.-ի արձանագրությունով, անվասկավառակները զննելու մասին 16.12.2013թ.-ի արձանագրությունով, ռետինե ձեռնոցները զննելու 15.01.2014թ.-ի արձանագրությունով և իրեղեն ապացույցների առկայությամբ:

Գործով ձեռք բերված բոլոր ապացույցները հետազոտելուց հետո մեղադրանքը պաշտպանող դատախազ Գ. Աղաջանյանը հայտարարել էր  երեք ամբաստանյալների դեմ  ՀՀ քրեական օրենսգրքի 177-րդ հոդվածի 2-րդ մասի 1-ին կետով առաջադրված մեղադրանքից հրաժարվելու մասին: Մեղադրանքից իր հրաժարվելը  նա պատճառաբանել էր, թե սույն դատաքննությամբ չի հիմնավորվել ընդհանուր 8.000 ՀՀ դրամ արժողության 12 հատ անվասկավառակները գողանալու շուրջ ամբաստանյալների միասնական դիտավորության առկայությունը, այլ հիմնավորվել է 2  դրվագ 4.000 ՀՀ դրամ արժողության անվասկավառակների գողության շուրջ նրանց նախնական համաձայնությունը և դիտավորությունը, իսկ տվյալ դեպքում հանցակազմը առկա չէ, քանի որ ՀՀ քրեական օրենսգրքի 177-րդ հոդվածի 1-ին մասով նախատեսված հանցակազմը պարունակում է 5.000 ՀՀ դրամ արժեք ունեցող գույքի հափշտակությունը:

Նկատի ունենալով, որ ՀՀ քրեական դատավարության օրենսգրքի 366-րդ հոդվածի 4-րդ մասի համաձայն` «Դատարանում մեղադրանքը պաշտպանող դատախազը մեղադրանքից հրաժարվելու դեպքում դատարանը մեղադրանքի այդ մասով կայացնում է արդարացնող դատավճիռ»,  ուստի դատարանը գտել էր,  որ պետք է ճանաչել և հռչակել ամբաստանյալներ Մանվել Մակյանի, Մուշեղ Մակյանի և Սեյրան Առուշանյանի անմեղությունը ՀՀ քրեական օրենսգրքի 177-րդ հոդվածի 2-րդ մասի 1-ին կետով մեղսագրված հանցանքի կատարման մեջ, նրանց արարքներում հանցակազմի բացակայության պատճառաբանությամբ:

Գործը վերաքննիչ դատարանում քննվել է մեղադրող Գ. Աղաջանյանի բողոքի հիման: Մեղադրողը միջնորդում էր բեկանել և փոփոխել Արաբկիր և Քանաքեռ Զեյթուն վարչական շրջանների ընդհանուր իրավասության առաջին ատյանի դատարանի 25.04.2014թ. դատավճիռը և մեղադրողի կողմից մեղադրանքից հրաժարվելու պատճառաբանությամբ կարճել քրեական գործի վարույթը և դադարեցնել քրեական հետապնդումը: