Փաստ ինֆո

Այն, ինչ կատարվում է քաղաքացիների հանդեպ, այսինքն՝  բացարձակապես առանց վարչարարություն իրականացնելու  գումար բռնագանձելու պահանջները միանգամից գնում են Դատական ակտերի հարկադիր կատարումն ապահովող ծառայություն, սա բացահայտ սաբոտաժ է պետության կողմից իր քաղաքացիների հանդեպ:  Այս մասին «Փաստինֆո»-ի թղթակցի հետ զրույցում հայտարարեց միջազգային իրավունքի մասնագետ,  իրավապաշտպան Արա Ղազարյանը:

«Այլ բան է, որ վարչարարություն իրականացվեր, հետո նոր գործը գնար ԴԱՀԿ,  քաղաքացին կիմանար այդ վարույթների մասին, միջոցներ կձեռնարկեր, գումարները կվճարվեին»,- ասաց Ա.Ղազարյանը՝ փաստելով, որ  ամենատարբեր կամայականությունների շատ-շատ օրինակներ կան՝  օրինակ,   վարչական տույժի է ենթարկվել մահացած քաղաքացին: Շատ-շատ են հնգապատկված գումարները, որոնք  գնում են միանգամից ԴԱՀԿ, այսինքն՝ քաղաքացին ընդհանրապես չգիտե, որ ինքը չի վճարել ինչ-որ տույժ և այդ պատճառով գումարը հնգապատկվել է: «Տանը նստած գալիս, ասում են՝ պետք է գումարը վճարես, բայց նա կուզենար իմանալ ինչու և կուզենար վիճարկել դա, իրեն ասում են, դու գնա դատարանում վիճարկի հարկադիրի որոշումը, բայց դա շատ ավելի բարդ է, և ինչու ես պետք է գնամ վիճարկեմ հարկադիրի որոշումը, եթե իմ վեճը հարկադիրի հետ չէ, իմ վեճը այն մարմնի հետ է, որը որոշել է, որ ես իրավախախտում եմ թույլ տվել՝ ոստիկանության, քաղաքապետարանի հետ»: Ա.Ղազարյանը նկատեց, որ այդ մարմիններն ըստ երևույթին այնքան շատ են տույժեր կիրառում քաղաքացիների նկատմամբ, որ իրենց ռեսուրսները չեն բավականացնում, դրա համար նրանք շրջանցում են վարչարարության երեք փուլերը՝ հարուցում, ընթացիկ և  եզրափակիչ փուլեր, և արդեն կայացված տույժը  միանգամից ուղարկում են հարկադիր՝  ամբողջությամբ շրջանցելով  քաղաքացուն:

Ընդ որում, քաղաքացին ստիպված է վճարել նաև հարկադիրի վարույթի համար, այսինքն՝   վճարել  ավելին, քան պետք է: Դեպքեր կան, որ  մարդիկ թոշակառու են և տույժի պատճառով բանկային հաշիվն արգելափակվում է. «Սա արդեն  կենսական խնդիր է, սա արդեն խայտառակություն է»,- ասաց Ա.Ղազարյանը:

«Մենք չենք ասում, որ իրավունք չունեք վարչական տույժի ենթարկել, մենք ասում ենք, որ արհամարհվում է քաղաքացին, մի ամբողջ պրոցես է ադմինստրատիվ հզոր մեքենան իրականացնում նրա նկատմամբ՝ գաղտնի և ամենավերջին պահին է տեղեկացնում, երբ որ արդեն  պաշտպանվելու հնարավորություն նա չունի, որովհետև հասցեատերը հարկադիրը չէ, այլ այն մարմինն է, որն այդ որոշումը կայացրել է: Այս իրավիճակին պետք է վերջ դրվի,  թե չէ կարող է արդեն սոցիալական բունտի վերաճել»,- նշեց Արա Ղազարյանը՝ արձանագրելով, որ խնդրի լուծման ճանապարհը մեկն է՝  պետք է վարչարարություն իրականացվի, եթե ոստիկանությունն որոշում է քաղաքացուն տույժի ենթարկել,  օրինակ՝ որովհետև ստացվել է տվյալ,  որ նրա անունով գրանցված ավտոմեքենայով ինչ-որ մի տեղ այն վարողի կողմից խախտում է թույլ տրվել,      նա պետք է հարուցի վարույթ, կատարի փաստերի համադրում, ծանուցի քաղաքացուն, հնարավորություն տա նրան պաշտպանվել և  իրացնել լսվելու իր իրավունքը, և նոր դրա հիման վրա որոշի տույժի ենթարկել, թե ոչ, «այլ ոչ թե միանգամից թուղթը վերցնի վազի հարկադիր»:

Արա Ղազարյանն ընդգծեց, որ սա այնպիսի բան չէ, որի մասին իշխանությունները տեղյակ չեն, այս մասին շատ է  խոսվում. «Մի հատ էլ «Դե՛մ եմ»  շարժում այստե՞ղ  պետք է ծնվի, որ խնդրին լուծում տրվի»,- ասաց նա: