Փաստ ինֆո

Ազգային ժողովի նախագահ Գալուստ Սահակյանի առաջարկությամբ խորհրդարանն այսօր արտահերթ նիստի սկզբում մեկ րոպե լռությամբ հարգեց օրերս մահացած` Գերագույն խորհրդի և Ազգային ժողովի նախկին պատգամավոր, «Ղարաբաղ» կոմիտեի անդամ Սամվել Գևորգյանի հիշատակը:

Գ.Սահակյանը տեղեկացրեց, որ այսօր առաջարկվում է գումարել երեք նիստ, իսկ վաղվանից` մեկուկես ժամ տևողությամբ չորս նիստ, ընդ որում` նիստերը կգումարվեն ժամը 11-ից, իսկ նիստերի միջև ընդմիջումը` կես ժամ:

ԱԺ նախագահը նաև տեղեկացրեց, որ կառավարությունն առաջարկել է օրակարգում ընդգրկված մի շարք հարցեր, որոնք կառավարությունն առաջարկում է  քննարկել հատուկ ընթացակարգով: Այն է` երկրորդ ընթերցմամբ քննարկումը կկազմակերպվի առաջին ընթերցումից հետո 24 ժամվա ընթացքում հետո, իսկ երրորդ ընթերցումը` երկրորդ ընթերցմամբ ընդունվելուց հետո  24 ժամվա ընթացքում:

Նշենք, որ ԱԺ նախագահի կողմից հրապարակված` նստաշրջանի անցկացման հատուկ ընթացակարգերի մասին որոշումները պետք է ընդունվեին խորհրդարանի որոշումներով, սակայն, ՀԱԿ խմբակցության ղեկավար Լևոն Զուրաբյանի նախաձեռնությամբ, հայտարարվեց 20 րոպե ընդմիջում, որից հետո միայն ԱԺ-ն շարունակեց իր աշխատանքը և քվեարկությամբ ընդունեց հիշյալ որոշումները, բացառությամբ մի շարք նախագծերի երրորդ ընթերցումը երկրորդ ընթերցմամբ ընդունվելուց հետո  24 ժամվա ընթացքում կազմակերպելու մասին:

Եթե նախորդ որոշումներն ընդունվել էին բացառապես ՀՀԿ-ի ջանքերթվ, իսկ ընդդիմությունը դեմ էր քվեարկել, ապա չընդունված որոշման քվեարկությանն ընդդիմությունը չմասնակցեց, և քաղաքական մեծամասնության ձայները չբավարարեցին` որոշում ընդունվելու համար, քանի որ քվորումը չապահովվեց` քվեարկությանը մասնակցեց անհրաժեշտ 66-ից քիչ թվով պատգամավոր:

Նույն բախտին արժանացավ նաև նախորդ քառօրյայի վերջում քննարկված` Տեղեկատվական տեխնոլոգիաների ոլորտի պետական աջակցության մասին կառավարության հեղինակած օրենսդրական փաթեթի ընդունումը:

Նիստին ՀՀԿ պատգամավորների ոչ բավարար մասնակցությունն առիթ  հանդիսացավ, որպեսզի ՀՀԿ խմբակցության ղեկավար Վահրամ Բաղդասարյանը 20 րոպե ընդմիջում վերցնի: