Փաստ ինֆո

Հայաստանի եզդիները կարծում են, որ հայաստանյան օրենսդրությունը ոտնահարում է իրենց ազգային ավանդույթներն ու սովորույթները: Նման տեսակետ այսօր «Փաստինֆո»-ի թղթակցի հետ զրույցում հայտնեցին ՀՀ նախագահի նստավայրի դիմաց բողոքի ակցիա իրականացնող եզդիները: «Մենք ամուսնանում ենք 15-16 տարեկանում, մեր ազգի մոտ աղջիկ փախցնելը ադաթ է»,- ասում են նրանք ու հավելում` «բերել օրենք են ընդունել, մեր տղերքին տանում նստացնում են»:

Եզդիներն այսօր իրենց այս բողոքն են նամակով փոխանցել նաև ՀՀ նախագահ Սերժ Սարգսյանին, ՀՀ գլխավոր դատախազ Գևորգ Կոստանյանին ու ՄԻՊ Կարեն Անդրեասյանին` պահանջելով ազատ արձակել աղջիկ փախցնելու համար 4 տարվա ազատազրկման դատապարտված 24-ամյա Էդիկ Արզամանյանին ու Գոռ Գալստյանին:

Հիշեցնենք, Կոտայքի մարզի առաջին ատյանի դատարանը 4 տարվա ազատազրկման էր դատապարտել իր սիրած աղջկան առևանգած երիտասարդին ու նրա ծանոթին, ում մեքենայով կատարվել էր առևանգումը: Երեկ ՀՀ վերաքննիչ քրեական դատարանն անփոփոխ թողեց առաջին ատյանի դատարանի վճիռը:

Այսօր նախագահական նստավայրի դիմաց հավաքված եզդիները մեզ պատմեցին, որ իրականում երիասարդները փոխադարձ սեր են տածել միմյանց նկատմամբ, սակայն տղան, չցանկանալով սպասել, մինչև աղջիկը կավարտի դպրոցը, որոշել է փախցնել նրան:

Էդիկ Արզամանյանի հայրը` Քարամ Արզամանյանը պատմեց, որ երբ իր որդին փախցրել է սիրած աղջկան, նրան տարել է ծանոթ տաքսու վարորդի ավտոմեքենայով: Արագությունը գերազանցելու համար ճանապարհային ոստիկանությունը կանգնեցրել է մեքենան, և երբ իմացել է, որ աղջիկ են փախցրել, երեքին էլ բերման է ենթարկել ոստիկանության բաժին: Այստեղ հարսնացուն գրել է, որ իրեն փախցրել են: Սա էլ հիմք է հանդիսացել քրեական գործի հարուցման համար:

«Աղջիկը դատարանում 20 անգամ ասեց, որ սիրում է տղիս, բողոք չունի, բայց դատավորը չլսեց, դատավորը պիտի ձգտի, որ ընտանիքը մերվի, ոչ թե աղջիկը մեր տանը լինի, տղեն բանտում»,- ասաց դատապարտված երիտասարդի հայրը:

Ի դեպ, նախագահի նստավայրի դիմաց հավաքվածների թվում էին նաև առևանգված աղջկա հարազատները, ովքեր հայտնեցին, որ ոչ մի բողոք չունեն, հատկապես որ իրենց աղջիկը խոստովանել է, որ իր կամքով է գնացել Էդիկի հետ:

Հավաքվածները նաև վստահեցրեցին, որ շարունակելու են արդարություն փնտրել նաև դատական հաջորդ` Վճռաբեկ ատյանում, և հուսով են, որ վերին ատյանի դատարանը կհարգի իրենց ազգային ավանդույթներն ու չի խոչընդոտի նոր երիտասարդ ընտանիքի կայացմանը: