Փաստ ինֆո

ՀՀ արդարադատության նախարարության քրեակատարողական վարչության այլընտրանքային պատիժների կատարման բաժնի Արմավիրի բաժանմունքի պետ  Սահակ  Հարությունյանի և նույն բաժանմունքի առաջատար մասնագետ Ալեքսանդր Խաչատրյանի դեմ կաշառք ստանալու գործով պաշտպանական կողմը ներկայացրել է դատաքննությունը լրացնող միջնորդություններ:

Մասնավորապես, պաշտպանական կողմը խնդրել է անթույլատրելի ճանաչել գործով տուժող Բուդաղյանի և որպես կասկածյալ Սահակ Հարությունյանի ու Ալեքսանդր Խաչատրյանի առերես հարցաքննությունների արձանագրությունները. դրանք օրենքի խախտմամբ են անցկացվել՝ տուժողի ու կասկածյալների ցուցմունքների միջև հակասությունների բացակայության պարագայում, մասնավորապես, Սահակ Հարությունյանն այն ժամանակ ընդհանրապես ցուցմունք չէր տվել, ուստի և չէին կարող հակասություններ լինել: Դատախազ Պավել Գյուլումյանը այն ժամանակ բավարարել էր պաշտպանական կողմի բողոքը:

Մեղադրող Գյուլումյանն հայտարարեց, որ այս առերես հարցաքննությունների արձանագրությունները մեղադրական եզրակացությունում նշված չեն ապացույցների շարքում, այսինքն՝ մեղադրանքի հիմքում դրված չեն: Մեղադրողը նշեց, որ դատական վիճաբանությունների փուլում ինքը դրանց չի անդրադառնալու:

Սակայն քանի որ այդ առերեսումներին ինչ-ինչ հղումներ, այնուամենայնիվ, կատարվում են, և դրանք որպես ապացույցներ հետազոտվել են դատարանում, ապա պաշտպանական կողմը միջնորդեց, որպեսզի դատարանը դատավճռում չանդրադառնա և չհիմնվի դրանց վրա:

Դատարանը որոշում ընդունեց, ըստ որի ինքը կանդրադառնա այդ առերես հարցաքննությունների արձանագրություններին  վերջնական դատական ակտում:

Պաշտպանական կողմը միջնորդեց նաև վերարտադրել տուժողի 06.02.2014թ.  հարցաքննության տեսանյութը: Օրվա ավարտը մոտ լինելու պատճառով տեսագրությունը կվերարտադրվի արդեն հաջորդ դատական նիստում:

Ըստ մեղադրական եզրակացության, հիշյալ բաժանմունքի պետը նույն բաժանմունքի առաջատար մասնագետի հետ նախնական համաձայնությամբ իրենց լիազորությունների շրջանակում  դատապարտյալ   Բ.Բուդաղյանի օգտին գործողություն կատարելու` հայտարարված համաներումը վերջինիս նկատմամբ կիրառելու և սահմանված կարգով պատժի կրումից ազատելու օրինական գործընթացն սկսելու համար, շորթմամբ 2013թ. հոկտեմբերի 4-ին նրանից պահանջել և 2013թ. հոկտեմբերի 14-ին նշված բաժանմունքի  իրենց  նստավայրում ստացել են խոշոր չափերի` 400.000 ՀՀ դրամ կաշառք:

Պաշտպանական կողմը համաձայն չէ մեղադրանքի հետ, մասնավորապես, ըստ կողմի, Սահակ Հարությունյանը պետք է արդարացվի՝ նա որևէ գումար չի պահանջել, իսկ ըստ մեղադրական եզրակացության, մեղսագրվող արարք կատարելու օրն ինքն ընդհանրապես աշխատավայրում չի եղել, այլ գտնվել է հորեղբոր հուղարկավորությանը Շիրակի մարզի Լանջիկ գյուղում: Իսկ Ալեքսանդր Խաչատրյանին կաշառք ստանալու մեղադրանքի փոխարեն, ըստ պաշտպանական կողմի,   պետք է առաջադրվի խարդախության փորձի մեղադրանք: