Փաստ ինֆո

Անգլիացիների նկատմամբ իտալացիների 2:1 հաշվով հաղթանակն ամփոփեց առաջին տուրը ֆուտբոլի աշխարհի առաջնության D խմբում:

«Արենա Ամազոնիա» ռոմանտիկ անվանումով մարզադաշտում տեղի ունեցած հանդիպման մանրամասներին կարող եք ծանոթանալ ներկայացվող տեսանյութից: Նշենք միայն, որ 35-րդ րոպեին Մարկո Վերատիի փոխանցումից Կլաուդիո Մարկիզիոն առաջ մղեց իտալացիներին, սակայն արդեն երկու րոպե անց Դանիել Սթարիջը դարպասն ուղարկելով Ուեյն Ռունիից ստացած գնդակը՝ վերականգնեց հավասարակշռությունը: Իսկ հանդիպման ելքը վճռեց 50-րդ րոպեին Մարիո Բալոտելիի խփած գոլը:

Ահա, թե հանդիպումից հետո ինչպիսի կարծիքներ են հայտնել կողմերի գլխավոր մարզիչները.

Չեզարե ՊՐԱՆԴԵԼԻ (Իտալիա). «Անմտություն կլիներ նման եղանակային պայմաններում առանց ընդհատումների խաղալը: Բացարձակապես անհնար էր ինտենսիվությունը բարձր մակարդակին պահել: Մեր թիմը շատ դժվարությունների դիմացավ, բայց շարունակեց վերահսկել դաշտի կենտրոնը: Մարզումների ժամանակ լավ ենք աշխատել, դա դրսևորվեց, երբ երկրորդ խաղակեսի միջնամասում անգլիացիների մոտ հոգնածություն զգացվեց: Դա նշանակում է, որ նախապատրաստության շրջանում մեր կատարած աշխատանքը պտուղ տվեց: Իսկ Բալոտելիին փոխարինեցի, որովհետև նա ներդրել էր բոլոր ուժերը, ինչպես, թերևս, մեզնից յուրաքանչյուրը»:

Ռոյ ՀՈՋՍՈՆ. (Իտալիա). «Երկրորդ խաղակեսում ամեն ինչ արեցինք, բայց գոլ չխփեցինք: Ենթադրում եմ, որ պետք է ատամներս սեղմած շարունակենք պայքարել: Այն թիմը չենք, որը ձեռքերը ծալած կնստի: Ցավոք, մրցակցին երկու գոլ խփելու հնարավորություն տվեցինք: Ռահիմ Սթեռլինգ շատ վտանգավոր էր գործում ողջ խաղի ընթացքում: Դարպասը գրավելու մի քանի հնարավորություն ուներ նաև Ուելբեկը, իսկ Ջերարդն ու Հենդերսոնն արեցին այն ամենը, ինչ պահանջվում էր իրենից: Գոհ եմ նաև Ուեյն Ռունիից: Շատ դժվար կլինի ընդունել այդ պարտությունը: Սակայն, ապագայի համար վստահություն է տալիս այն հանգամանքը, որ կարողանում էինք վտանգավոր պահեր ստեղծել մրցակցի դարպասի մոտ: Ամեն դեպքում, Անգլիան շարունակում է հավակնել հաջորդ փուլ անցնելուն»:

Հիշեցնենք, որ այս խմբի մյուս խաղում Կոստա Ռիկայի հավաքականը 3:1 հաշվով առավելության է հասել ուրուգվայցիների նկատմամբ: