Փաստ ինֆո

Ոստիկանությունը որոշ նոր մանրամասներ է հրապարակել հունիսի 6-ին՝ 23 :00-ին, Քանաքեռ- Զեյթուն համայնքի Ուլնեցու փողոցում տեղի ունեցած վիճաբանության և հնչած կրակոցների փաստով հարուցված քրեական գործի վերաբերյալ:

Ոստիկանության հաղորդագրությունից պարզ է դառնում, որ Երևան քաղաքի վարչության և Քանաքեռ-Զեյթունի բաժնի ծառայողների ձեռնարկած օպերատիվ-հետախուզական ու քննչական միջոցառումների և բացատրական աշխատանքների արդյունքում` հունիսի 10-ին՝ ժամը 23:10-ին, բաժին է ներկայացել 1990 թ. ծնված Սամվել Ք.-ն, ով թերևս  Քանաքեռ-Զեյթուն համայնքի նախկին թաղապետ, Քաղաքապետի ներկայիս խորհրդական Արայիկ Քոթանջյանի որդին է, և ներկայացրել առանց գործարանային համարի, 9 մմ տրամաչափի «Մակարով» տիպի ատրճանակը` հայտարարելով, որ հունիսի 6-ին Կ. Ուլնեցու փողոցի թիվ 74 շենքի բակում նշված ատրճանակից մի քանի անգամ կրակել է օդ: 

Նա ձերբակալվել է, ատրճանակն  ուղարկվել է փորձաքննության:

Բացի այդ, ձեռնարկված օպերատիվ-քննչական միջոցառումների արդյունքում պարզվել է, որ հանցագործությանը մասնակցել են նաև 1988թ. ծնված Հովհաննես Կ.-ն, 1987թ. ծնված Ռաֆայել Մ.-ն, 1974թ. ծնված Սեդրակ Փ.-ն և 1993 թ. ծնված Գոռ Հ.-ն: Տարված բացատրական աշխատանքների շնորհիվ` Հովհաննես Կ.-ն, Սեդրակ Փ.-ն և Ռաֆայել Մ.-ն ներկայացել են բաժին և տվել խոստովանական ցուցմունքներ: Սեդրակ Փ.-ն ձերբակալվել է: Իսկ Գոռ Հ.-ին ոստիկանությունը դեռ չի հայտնաբերել:

Նախաքննությունը շարունակվում է:

Հիշեցնենք՝ հունիսի 6-ին ոստիկանության Երևան քաղաքի վարչության օպերատիվ կառավարման կենտրոնից Քանաքեռ-Զեյթունի բաժնում հաղորդում է ստացվել, որ իրենց է զանգահարել անհայտ քաղաքացի և հայտնել, որ Պ. Սևակի և Կ. Ուլնեցու փողոցների խաչմերուկում կրակում են:

Մեկնած օպերատիվ խումբը պարզել է, որ ժամը 22.50-ին Կ. ՈՒլնեցու փողոցի թիվ 74 շենքի բակում, անհայտ անձանց միջև տեղի ունեցած վիճաբանության ժամանակ, դեռևս չպարզված անձը ատրճանակից մի քանի անգամ կրակել է օդ, ինչից հետո վիճաբանողները դիմել են փախուստի: 

Դեպքի վայրի զննությամբ հայտնաբերվել են 9 մմ տրամաչափի ատրճանակի 3 պարկուճ և 1 գնդակ:Հարուցվել էր քրեական գործ` ՀՀ քրեական օրենսգրքի 258 հոդվածի 4-րդ մասի և 235 հոդվածի 1-ին մասի հատկանիշներով, այն է` ապօրինի կերպով հրազեն ձեռք բերելը, իրացնելը, պահելը, փոխադրելը կամ կրելը և խուլիգանությունը՝ դիտավորությամբ հասարակական կարգը կոպիտ կերպով խախտելը, որն արտահայտվել է հասարակության նկատմամբ բացահայտ անհարգալից վերաբերմունքով: