Փաստ ինֆո

ՀՀ արդարադատության նախարարության քրեակատարողական վարչության այլընտրանքային պատիժների կատարման բաժնի Արմավիրի բաժանմունքի պետ Սահակ Հարությունյանի  պաշտպան Ինեսսա Պետրոսյանը  դիմում-միջնորդություն է ներկայացրել ՀՀ գլխավոր դատախազ Գևորգ Կոստանյանին: Ինչպես «Փաստինֆո»-ի թղթակցին հայտնեց Ինեսսա Պետրոսյանը, ՀՀ գլխավոր դատախազին ներկայացրել է իրականությունը և հույս հայտնել, որ գլխավոր դատախազը ցուցում կտա մասնակցող դատախազին անհիմն մեղադրանքից  հրաժարվել:

Ինեսսա Պետրոսյանը նշեց, որ դատաքննությամբ էլ պարզվել է, որ որևէ ապացույցով չի հիմնավորվում իր պաշտպանյալին առաջադրված մեղադրանքը՝ տուժողի նկատմամբ համաներման գործընթացը սկսելու համար մի խումբ անձանց կողմից նախնական համաձայնությամբ, շորթմամբ, խոշոր չափերով կաշառք ստանալը:

Սահակ Հարությունյանի մասով մեղադրանքի մեխը, ըստ պաշտպանի, տուժող Բաբկեն Բուդաղյանի ցուցմունքներն էին՝ նախաքննության ընթացքում նա երեք անգամ առերեսվել էր Սահակ Հարությունյանի հետ: Ընդ որում առաջին անգամ նա առերեսվել էր  օրենքի կոպիտ խախտմամբ՝ Սահակ Հարությունյանը ցուցմունք չի տվել,  իսկ առերես հարցաքննություն անց է կացվում հակասությունների առկայության դեպքում: Պաշտպանական կողմի  բողոքը բավարարվել էր, կրկին առերեսում էր անցկացվել, որի ժամանակ Բուդաղյանը հստակ նշել էր, որ Սահակ Հարությունյանն իրենից որևէ գումար չի պահանջել:

2014թ. հունվարի 30-ի այս առերես հարցաքննությունից հետո հաջորդ օրն իսկ քննիչը ցուցում է տվել ոստիկանության կազմակերպված հանցավորության դեմ պայքարի վարչությանը ճշտել, թե «ինչու տուժողն եկավ և այդպիսի ցուցմունք տվեց», հետո նրա նկատմամբ սկսվել են  հետապնդումները: Պաշտպանական կողմն արձանագրում է, որ  բերման ենթարկվելուց հետո տուժողի աչքի տակ առկա էր  մեծ կապտուկ՝ արդյունքում նա ցուցմունք է տալիս Սահակ Հարությունյանի դեմ, որը գործով միակ ապացույցն է:

Դատարանում քրեական գործի հենքը, ըստ Ինեսսա Պետրոսյանի,  միայն Բաբկեն Բուդաղյանի իրարամերժ ցուցմունքներն էին, նախաքննության ժամանակ առերես հարցաքննությունները, որոնք հակասում էին իրար: Դատարանում, սակայն, տուժողը երեք անգամ հարցաքննվել է և բոլոր երեք անգամները նույն ցուցմունքն է տվել՝ տուժողը պնդել է, որ Սահակ Հարությունյանն իրենից գումար չի պահանջել, Սահակ Հարությունյանն իրենից միայն  բնակության վայրի մասին տեղեկանք  ու լուսանկար էր ուզում, որոնք ինքը չի ներկայացրել  այդ ամբողջ ընթացքում: Տուժողը  նշել է նաև, որ իրենից գումար ուզել է  Ալեքսանդր Խաչատրյանը:  Ըստ պաշտպանի, քրեական գործով հաստատված փաստ է,  որ Սահակ Հարությունյանը դրանից ընդհանրապես տեղյակ չի եղել, նա  այդ օրը նույնիսկ  աշխատանքի վայրում չի եղել, մասնակցել է իր հորեղբոր հուղարկավորությանը Շիրակի մարզի Լանջիկ գյուղում:

«Իմ պաշտպանյալի մասով որևէ ապացույց գոյություն չունի»,- ասաց Ի.Պետրոսյանը՝ հավելելով, որ գործում առկա է Խաչատրյանի և Բուդաղյանի միջև հեռախոսային խոսակցության գաղտնալսում, ինչի կապակցությամբ Խաչատրյանն իր ցուցմունքներում նշել է, որ ինքը վստահություն ներշնչելու համար է  օգտագործել Սահակ Հարությունյանի անունը: «Իմ կարծիքով՝  այստեղ ոչինչ չի մնում մեղադրանքի կողմին քան գալ ու այդ անհիմն ու անօրինական մեղադրանքից հրաժարվել՝ իմ պաշտպանյալ Սահակ Հարությունյանի մասով, իսկ մյուս ամբաստանյալի մասով  խարդախության փորձի մասին պետք է խոսք գնա»,- ասաց պաշտպանը:

Ինեսսա Պետրոսյանը նշեց նաև, որ տուժողի նկատմամբ կիրառվել է պաշտպանության միջոց՝ նա գալիս է դատարան ոստիկանների ուղեկցությամբ: «Դուք դիմե՞լ եք, որ Ձեր նմատմամբ պաշտպանության միջոց կիրառվի» հարցին տուժողը պատասխանել է՝ «ինձ ասել են, թելադրել են, ես նույնիսկ չեմ իմացել, որ նման բան գոյություն ունի»: Ի.Պետրոսյանի կարծիքով, դա  ուղղակի  պարտադրվել է Բուդաղյանին, որպեսզի նա  գտնվի ոստիկանության հսկողության ներքո, որ ոչ մի պարագայում չկարողանա գալ ու այլ բան ասել: Պաշտպանը նկատեց, որ  Բուդաղյանի նկատմամբ համաներումը կիրառվել է միայն մայիսին: Ըստ գործով վկաների, ովքեր հիշյալ  ստորաբաժանման աշխատակիցներ են և իրենք  պետք է կիրառեին համաներումը, իրենք  հետագայում պարզել են, որ  Բուդաղյանի նկատմամբ համաներում կիրառելի չէր, որովհետև նրա դեմ քաղաքացիական հայցեր են եղել: Հայտնի է, որ համաներումն ունի սահմանափակում, եթե առկա է քաղաքացիական հայց, մինչև այն չմարվի, համաներում չի կարող կիրառվել: Գումարը մարելուց հետո միայն Բուդաղյանի  նկատմամբ կիրառվել է համաներում:  «Այսինքն՝ ակնհայտ է, որ իմ պաշտպանյալը ոչ մի պարագայում նրա նկատմամբ չէր կարող կիրառել համաներում»,- ասաց Ի.Պետրոսյանը: