Փաստ ինֆո

Ֆինանսների նախարարությունը պաշտոնապես հաստատեց մամուլում տարածված լուրերը, որ Ֆինանսների 2 ամիս առաջ նշանակված նախարար Գագիկ Խաչատրյանն այս գերատեսչության որոշ ստորաբաժանումներում կադրային ջարդ է իրականացնում:

Ֆինանսների նախարարությունն այսօր լրատվամիջոցների հրապարակումների վերաբերյալ պարզաբանում է տարածել` անդրադառնալով մասնավորապես «Ֆինանսական վերահսկողության տեսչության» վերակազմավորման թեմային: Ի դեպ վերակազմավորված տեսչության նոր կանոնադրության առանձնահատկություններին անդրադարձել էր նաև «Փաստինֆո»-ն երեկվա` «Ֆինանսական վերահսկողության տեսչության աշխատակիցներն այլևս քաղծառայող չեն»  թեմայով հրապարակման մեջ (http://pastinfo.am/node/43771 ):

Նախարարության պարզաբանման մեջ  մասնավորապես ասվում է, որ «ՀՀ կառավարության 2014 թվականի մայիսի 8-ի թիվ 500-Ն որոշման 2-րդ կետի համաձայն  «Ֆինանսական վերահսկողության տեսչություն» առանձնացված ստորաբաժանումը վերակազմակերպվել է «Ֆինանսաբյուջետային վերահսկողության տեսչություն» առանձնացված ստորաբաժանման»:

Միաժամանակ հայտնվում է, որ Ֆինանսական վերահսկողության տեսչության կանոնադրությունը և կառուցվածքը ուժը կորցրած ճանաչելու  և Ֆինանսաբյուջետային վերահսկողության տեսչության կանոնադրությունը հաստատելու կապակցությամբ նախարարության քաղաքացիական ծառայողների պաշտոնների անվանացանկում կատարվել են փոփոխություններ, իսկ որ ամենաուշագրավն է` այդ փոփոխությունների արդյունքում տեսչության «քաղաքացիական ծառայողների պաշտոնները հանվել են պաշտոնների անվանացանկից, ինչի արդյունքում  աշխատակիցներն ազատվել են աշխատանքից»:

Փաստորեն, տեսչության քաղծառայող հանդիսացող աշխատակիցները, ովքեր Քաղծառայության մասին ՀՀ օրենքի տրամաբանությամբ, պետք է ապահովված լինեին իրենց ղեկավարների ցանկացած կամայականություններից, այս դեպքում ոչ միայն կորցրել են իրենց քաղծառայողի կարգավիճակը, այլև` ընդհանրապես ազատվել են աշխատանքից:

Մեկ այլ ուշագրավ հանգամանք ևս. Ինչպես երեկ էլ տեղեկացրել էինք, սա առաջին դեպքը չէ, երբ  ֆինանսների նորանշանակ նախարարը հեշտությամբ աշխատանքից ազատում է մի ամբողջ ստորաբաժանման աշխատակիցների:

Այսպես` օրեր առաջ` ֆինանսների նախարարության տեղեկատվության և հասարակայնության հետ կապերի բաժնի նախկին պետ Սոֆի Սիմոնյանը ֆեյսբուքյան իր էջում տեղեկացրել էր, որ հունիսի 10-ին տեղեկացվել են, որ հունիսի 6-ից բաժնի բոլոր աշխատակիցները կրճատվել են:

Իսկ այսօր Ֆինանսների նախարարությունից ուղարկված պարզաբանումը ստորագրված է` «ՀՀ ֆինանսների նախարարության տեղեկատվության և հասարակայնության հետ կապերի բաժին»:

Փաստորեն, օրեր առաջ կրճատված մի ամբողջ բաժնի փոխարեն արդեն ձևավորվել է նորը: Իսկ թե ովքեր են այս նոր բաժնի աշխատակիցներն ու ղեկավարը, ֆինանսների նախարարության պաշտոնական կայքից պարզել հնարավոր չէ: Կայքում հրապարակված չեն նաև համապատասխան փոփոխությունների մասին ֆինանսների նախարար Գագիկ Խաչատրյանի հրամանները, ընդ որում` ոչ միայն այս, այլև մյուս կրճատված ու վերակազմավորված ստորաբաժանումների մասին: Ընդհանրապես, կայքում հրապարակված վերջին հրամանները 2 ամսվա վաղեմություն ունեն և ստորագրված են նախկին նախարար Դավիթ Սարգսյանի կողմից: