Փաստ ինֆո

Կառավարությունը որոշել է խստացնել անզգուշությամբ մարդու մահ առաջացրած ծանր մարմնական վնասվածք հասցնելու հանցակազմի համար նախատեսված քրեական պատասխանատվությունը:

Նման առաջարկով կառավարություն են դիմել ՀՀ գլխավոր դատախազությունն ու Արդարադատության նախարարությունը:

Հիշեցնենք՝ ներկայում գործող համապատասխան դրույթն ընդունվել է ավելի քան 10 տարի առաջ` 2003 թվականին, և այլևս փոփոխության չի ենթարկվել: Այդ հանցակազմը նախատեսված է ՀՀ քրեական օրենսգրքի 112-րդ հոդվածի 2-րդ մասի 14-րդ կետով և նախատեսում է 5-10 տարի ազատազրկում:

Կառավարություն ներկայացված օրինագծով հիշյալ կառույցներն առաջարկում են պատժաչափն ավելացնել 7-12 տարի ժամկետով, ընդ որում՝ համապատասխան դրույթը սահմանել ոչ թե 2-րդ մասի 14-րդ կետով, այլ առանձին` 3-րդ մասով:

Օրենսդրական նախաձեռնության հեղինակները դա պայմանավորում են նրանով, որ մարմնական ծանր վնասվածքի դեպքում, եթե այն անզգուշությամբ առաջացրել է մարդու մահ, պետք է առանձնացվի ծանրացուցիչ հանգամանքներից և դիտվի՝ որպես առանձնապես ծանրացնող հանգամանք:

«Անզգուշությամբ մահ առաջացնելու դեպքերը որպես առանձնապես ծանր հանցագործություններ դիտելը, դրանց համար ավելի խիստ պատիժ նախատեսելն ավելի տրամաբանական են, քանի որ, երկու անձանց մարմնական վնաս պատճառելը և մահվան ելքով ծանր մարմնական վնասը, ըստ վտանգավորության աստիճանի և հետևանքների, անհամատեղելի են»,- ասված է նախագծի հիմնավորման մեջ:

Կառավարությունն այսօր հավանության արժանացրեց այս նախագիծը: Դրա ընդունումն արդեն վերապահված է ԱԺ-ին: