Փաստ ինֆո

Անցյալ տարվա նոյեմբերի 5-ին Երևանի կենտրոնում տեղի ունեցած դեպքերի վերաբերյալ «Ցեղակրոն» կուսակցության առաջնորդ Շանթ Հարությունյանի և մյուսների դեմ գործով առաջին դատական նիստն այսօր  տեղի չունեցավ գործում ներգրավված մի շարք պաշտպանների բացակայության պատճառով:

Այդ կապակցությամբ դահլիճում ամբաստանյալների շարքերից դժգոհություններ հնչեցին, ինչպես նաև այս կամ այն բացակայող պաշտպանից հրաժարվելու հայտարարություններ:  

Շանթ Հարությունյանը գոհունակություն հայտնեց իր պաշտպան Ինեսսա Պետրոսյանի պաշտպանությունից, սակայն միաժամանակ նշեց, որ «փաստաբանները չեն կարող օգնել,  սա քաղաքական պրոցես է»: Շ.Հարությունյանը հայտարարեց նաև, որ երկրում չկա   արդարություն և արդարադատություն, «իրենք օրենքի դաշտից դուրս են գործում, ես համարժեք եմ գործել»:

Շանթ Հարությունյանն իր  ցավակցությունը հայտնեց օրերս մահացած Սմբատ Այվազյանի հարազատներին ու մերձավորներին, նշեց, որ ինքը մարտի մեկի գործով մեկ տարի  անազատության մեջ է գտնվել նրա հետ, և այդ օրերն ինքը համարում է երջանիկ օրեր: Շ.Հարությունյանը միաժամանակ առողջություն մաղթեց մարտիմեկյան գործերով նախկին մեղադրյալներին:   

Փաստաբանների բացակայության պատճառով դատարանը դեռևս չանցավ դատավարության կողմերին  ներկայացնելուն և նրանց լիազորությունները ճանաչելուն, սակայն դատարան էին ներկայացել մեղադրողներ Գևորգ Գևորգյանն ու Արթուր Երիցյանը, ովքեր ըստ ամենայնի պաշտպանելու են մեղադրանքը:

Ամբաստանյալները դատական նիստերի դահլիճ մուտք գործեցին ծափողջույնների, իսկ դատական նիստերի դահլիճից հեռացան «ազատությո՛ւն» վանկարկումների ներքո: Ամբաստանյալների հարազատները դժգոհեցին, որ ամբաստանյալների մերձավորներին թույլ չեն տվել մուտք գործել նիստերի դահլիճ, դատարանը խորհուրդ տվեց հերթագրվել և հավաստիացրեց, որ  ամբաստանյալների ընտանիքի անդամները ներկա կգտնվեն դատավարությանը: Փաստաբան Արա Զաքարյանը նաև դժգոհություն հայտնեց աշխատանքային պայմաններից՝  ինքը ցանկանում է, որ իր երկու պաշտպանյալները գտնվեն իր կողքին և ինքը սեղան ունենա, որպեսզի կարողանա աշխատել: Պաշտպանն առաջարկեց  դատական նիստերն անցկացնել  ավելի ընդարձակ դահլիճներ ունեցող դատարաններում: Սակայն դատարանը հավաստիացրեց, որ Կենտրոն և Նորք-Մարաշ վարչական շրջանների դատարանի շենքում այդ պայմանները կապահովվեն:

Դատական նիստն ընդմիջվեց մինչև հունիսի 25-ը:

Հիշեցնենք, որ գործով ամբաստանյալները 14-ն են: Մասնավորապես   Շանթ Հարությունյանը մեղադրվում է այն բանում, որ «մի խումբ անձանց հետ, որպես զենք օգտագործվող առարկայի գործադրմամբ, կատարել է խուլիգանություն` զուգորդված իշխանության ներկայացուցչին դիմադրություն ցույց տալով»: Ամբաստանյալների թվում է նաև Շ.Հարությունյանի անչափահաս որդին՝ Շահեն Հարությունյանը:

Հեղինակ` «Փաստինֆո»