Փաստ ինֆո

Կառավարությունն այսօր կայացած նիստում ֆինանսների նախարարի առաջարկով հաստատել է ֆինանսների նախարարության աշխատակազմի ֆինանսաբյուջետային վերահսկողության տեսչության նոր կանոնադրությունը: Նշենք, որ սա նույն Ֆինանսական վերահսկողության տեսչությունն է, պարզապես արդեն նոր անունով:

Առաջին հայացքից տեսչության կանոնադրության մեջ մեծ փոփոխություններ չեն կատարվել: Բայց` միայն առաջին հայացքից: Հին ու նոր կանոնադրությունների համեմատությունից պարզ է դառնում, որ կատարված փոփոխություններով, փաստորեն, տեսչության պետն ու աշխատակիցներն այլևս զրկվել են քաղծառայողի կարգավիճակից ու, բնականաբար, նաև «Քաղաքացիական ծառայության մասին» ՀՀ օրենքով վերապահված իրավունքներից ու պաշտպանվածությունից, այլ կերպ ասած` նրանց դիրքերն ուղղակի թուլացվել են:

Այսպես, օրինակ, եթե նախկին կանոնադրության համաձայն, տեսչության պետը պաշտոնի էր նշանակվում և պաշտոնից ազատվում Քաղծառայության օրենքի համաձայն, նոր կանոնադրությամբ սահմանվել է, որ նրան «պաշտոնի է նշանակում և պաշտոնից ազատում է Հայաստանի Հանրապետության վարչապետը՝  նախարարի ներկայացմամբ»:

Բացի այդ եթե նախկինում տեսչության պետը հաշվետու էր վարչապետին, նախարարին, իսկ քաղաքացիական ծառայության մասին oրենսդրությամբ նախատեսված դեպքերում` նաև նախարարության աշխատակազմի ղեկավարին, ապա այսուհետ նա հաշվետու պետք է լինի միայն վարչապետին ու նախարարին:

Իսկ ամենակարևորը` նախկին կանոնադրության 17-րդ կետը սահմանում էր, որ «Տեսչության կառուցվածքային ստորաբաժանումների աշխատողները քաղաքացիական ծառայողներ են»: Այս կետը նոր կանոնադրությունից ուղղակի հանվել է:

Այս փոփոխություններից հետո պետական կառույցների, պետական բաժնեմասով ընկերությունների, ՊՈԱԿ-ների ֆինանսական պարտավորությունների կատարման, պետական բյուջեի ու վարկային, դրամաշնորհային գումարների ծախսման նկատմամբ վերահսկողություն իրականացնող այս կառույցի ոչ միայն աշխատակիցները, այլև պետը այսուհետ ենթակա են միմիայն ֆինանսների նախարարին և նրա հնարավոր կամայական հրամաններից ու որոշումներից որևէ օրենքով այլևս պաշտպանված չեն լինելու:

Թեեւ, քաղծառայող լինելն էլ առանձնապես ֆինանսների նախարարության արդեն նախկին աշխատակիցներին չփրկեց, ինչպես օրինակ լրատվական բաժնի աշխատակիցներին։ ՀՀ ֆինանսների նախարարության տեղեկատվության և հասարակայնության հետ կապերի բաժնի նախկին պետ Սոֆի Սիմոնյանը ֆեյսբուքյան իր էջում հունիսի 10-ին տեղեկացրել էր, որ բաժնի բոլոր աշխատակիցները կրճատման տակ են ընկել։