Փաստ ինֆո

Ազգային ժողովի  այսօրվա նիստի մեկնարկը բավականին բուռն էր: Պատճառը նախօրեին Ազգային ժողովում տեղի ունեցած հայ-ռուսական խորհրդարանական ակումբի հերթական նիստում հնչած արտահայտություններն էին:

«Հայ ազգային կոնգրես» խմբակցության անդամ Նիկոլ Փաշինյանը՝ անդրադառնալով նախօրեին Ազգային ժողովում տեղի ունեցած հայ-ռուսական խորհրդարանական ակումբի հերթական նիստին, նշեց, որ երեկ անթույլատրելի իրադարձություն է տեղի ունեցել Հայաստանի խորհրդարանում: Ըստ նրա՝ «Ռուսաստանն այսօր» միջազգային տեղեկատվական գործակալության գլխավոր տնօրեն Դմիտրի Կիսելյովը «խորհրդարանական ակումբի նիստի ժամանակ անհարգալից տոնով և ենթատեքստով հայտարարություններ է արել  Հայաստանի Հանրապետության, հայ ժողովրդի, հայ ժողովրդի նահատակների և հայոց լեզվի հասցեին»:

«Ես կարծում եմ, որ Հայաստանի Հանրապետության Արտաքին գործերի նախարարությունը պետք է քննարկի Դմիտրի Կիսելյովին ՀՀ տարածքում «պերսոնա նոն գրատա»՝ անցանկալի անձ, հայտարելու մասին հարցը: Խստորեն դատապարտում եմ նաև նիստին ներկա Հայաստանի Ազգային ժողովի պատգամավորների պահվածքը, որոնք չեն գտնվել անհրաժեշտ բարձրության վրա, և կարծում եմ, որ Հայաստանը պետք է բոլոր օտարերկրացիներին հստակ ուղերձ հղի, որ նման պահվածք ունեցող յուրաքանչյուր օտարերկրացի արժանանալու է հստակ հակահարվածի»,-հայտարարեց Ն.Փաշինյանը:

ԱԺ նախագահ Գալուստ Սահակյանն անմիջապես արձագանքեց. «Միշտ մտածեք՝ Հայաստանը, հայոց լեզուն հայերի համար բավականին լուրջ հոգևոր արժեք է: Այնպես որ, եթե նման իրողություններ կան, մենք կփորձենք տեսնել, թե ինչի հետ է կապված»:  

Այդ նիստին մասնակցած՝ ՀՀԿ խմբակցության անդամ Հայկ Բաբուխանյանը հայտարարեց, թե այն, ինչի մասին ասաց Ն.Փաշինյանը, «նման բան տեղի չի ունեցել ընդհանրապես, որևէ վիրավորական արտահայտություն մեր ներկայությամբ չի եղել»: Ըստ նրա՝ եղել է քննարկում, որը վերաբերել է բազմաթիվ հարցերի՝ «հարգալից փոխադարձ մթնոլորտում, և մեր պատգամավորները, լսելով հյուրերի կարծիքները, ներկայացրել են իրենց կարծիքը»: Նաև նշեց, որ ԱԺ փոխնախագահ Հերմինե Նաղդալյանը շատ հստակ և կոռեկտ ներկայացրել է իրավիճակը:

Հ.Նաղդալյանն էլ իր հերթին հայտարարեց, թե ցանկանում է փարատել բոլորի անհանգստությունը, որովհետև ակումբը բանավիճային հարթակ է, որտեղ կարող են տարբեր կարծիքներ հնչել: Նա վստահեցրեց, որ ներկա պատգամավորները, ՀԿ-ների և ԶԼՄ ներկայացուցիչները  շատ ակտիվ մասնակցել են, և այնտեղ չի եղել վիրավորական որևէ խոսք նահատակների նկատմամբ՝ ընդգծելով, որ որևէ մեկը նման բան թույլ չէր տա:

ՀՅԴ խմբակցության քարտուղար Աղվան Վարդանյանն էլ՝ դիմելով ԱԺ նախագահին, նկատեց, որ Հայաստանում պետական լեզուն հայերենն է և խնդրեց ու պահանջեց, որ հետայսու ԱԺ-ում որևէ քննարկման, որևէ միջոցառման ժամանակ «պահպանել պետական լեզվի կարգավիճակը և ապահովել թարգմանություն»: Նա նաև անդրադարձավ արարողակարգային խնդրի, երբ նախօրեին ռուսաստանցի լրագրողին ԱԺ բերած մեքենան կայանել էր շենքի գլխավոր մուտքի մոտ, ինչպես նախատեսված է բարձրաստիճան հյուրերի դեպքում. «Եթե ԱԺ փոխնախագահի ղեկավարած պատվիրակությունը Հայաստանի Մոսկվայում օդակայանից հասնում է հյուրանոց 2,5 ժամում, բոլորովին այլ կարգի պատվիրակությունը կարող է Դեմիրճյան փողոցից ոտքով հասնել մինչև ԱԺ շենք»:

Նախկին արտգործնախարար Ալեքսանդր Արզումանյանը հայտարարեց, թե «պարոն Բաբուխանայնն ուղղակի ստում է», որովհետև այդ հանդիպման տեսագրությունը տեղադրված է համացանցում, որտեղ «հստակ երևում է, որ հայ ժողովրդի հասցեին մի շարք վիրավորական և հայոց պետականությանը սպառնացող ցինիկ արտահայտություններ են արվել»: Ապա պատգամավորը հիշեցման կարգով նկատեց, որ «ցինիկ» կամ «կինիկ» բառի արմատը «շուն» բառն է: «Հին Հունաստանում ցինիկ էին անվանում մարդկանց, որոնք շան պես հաչում էին հասարակության վրա՝ վիրավորելով վերջինիս: Պահանջում ենք հետայսու զերծ պահել հայոց խորհրդարանը նման հաչոցներից»,-հայտարարեց Ա.Արզումանյանը:

«Ես կարծում եմ՝ ձեր խոսքն արդեն բավարար է քննարկման համար: Համենայնդեպս, ես լրացուցիչ կուսումնասիրեմ»,- հայտարարեց ԱԺ նախագահը՝ վստահեցնելով, որ խորհրդարանում յուրաքանչյուր միջոցառում կընթանա հայոց լեզվով: