Փաստ ինֆո

Հունիսի 10-ին Սահմանադրական դատարանը գրավոր ընթացակարգով քննության առնելով ՀՀ մարդու իրավունքների պաշտպանի դիմումի հիման վրա գործը, ըստ էության, այն մերժեց:
 
ՍԴ-ն որոշեց, որ Կարեն Անդրեասյանի կողմից վիճարկվող «Զինվորական ծառայություն անցնելու մասին» օրենքի 16-րդ հոդվածի 2-րդ մասի 3-րդ պարբերությունը ՍԴ այսօրվա որոշման մեջ արտահայտված իրավական դիրքորոշումների շրջանականերում համապատասխանում է Սահմանադրությանը:

ՀՀ վարչապետի 1996թ. նոյեմբերի 4-ի «Հայաստանի Հանրապետության բյուջետային հիմնարկների աշխատողների պաշտոնային դրույքաչափերի սահմանման մասին» որոշման մասով գործի վարույթը որոշվեց կարճել:

ՍԴ որոշումը վերջնական է և ուժի մեջ է մտնում հրապարակման պահից:

Ինչպես «Փաստինֆո»-ն ավելի վաղ տեղեկացրել էր, «Զինվորական ծառայություն անցնելու մասին» ՀՀ օրենքի 16-րդ հոդվածի 2-րդ մասի 3-րդ պարբերության համաձայն՝ զինվորական պաշտոնը համարվում է հավասար, եթե նախկին և նոր հաստիքային պաշտոններին համապատասխանում են նույն զինվորական կոչումն ու պաշտոնային դրույքը:

ՀՀ վարչապետի որոշման և համապատասխան հավելվածի մեջ սահմանված են բյուջետային հիմնարկների աշխատողների պաշտոնային դրույքաչափերը, որտեղ նաև առանձին սանդղակներում նախատեսված են ՀՀ պաշտպանության նախարարության կենտրոնական ապարատի և ՀՀ պաշտպանության նախարարության, ազգային անվտանգության նախարարության և արտակարգ իրավիճակների վարչության զինվորական միավորումների և ստորաբաժանումների աշխատողների պաշտոնային դրույքաչափերը:

Դիմողը նշել էր, որ 1992 թվականի մայիսի 15-ին Տաշքենդում ԱՊՀ մասնակից երկրների կողմից ստորագրված «Զինվորական և նրանց ընտանիքների անդամների կենսաթոշակային ապահովության և պետական ապահովագրության մասին» համաձայնագրի 1-ին հոդվածի համաձայն` մասնակից-պետությունների կողմից սահմանվող զինծառայողների և նրանց ընտանիքների կենսաթոշակային ապահովության մակարդակը, ըստ 1992 թվականի փետրվարի 14-ի զինծառայողների, զինվորական ծառայությունից ազատված անձանց և նրանց ընտանիքների անդամների սոցիալական և իրավական երաշխիքների համաձայնագրի, չի կարող Խորհրդային Միության կողմից նախկինում սահմանված օրենսդրական և այլ նորմատիվ ակտերի համեմատ ավելի ցածր մակարդակի լինել:


Ստորև կարող եք ծանոթանալ ՍԴ որոշմանն ամբողջությամբ.     

Որոշում՝ ՀՀ մարդու իրավունքների պաշտպանի դիմումի հիման վրա՝ «Զինվորական ծառայություն անցնելու մասին» օրենքի 16-րդ հոդվածի 2-րդ մասի 3-րդ պարբերության և ՀՀ վարչապետի 1996թ. նոյեմբերի 4-ի «Հայաստանի Հանրապետության բյուջետային հիմնարկների աշխատողների պաշտոնային դրույքաչափերի սահմանման մասին» որոշման՝ ՀՀ Սահմանադրությանը համապատասխանության հարցը որոշելու վերաբերյալ գործով