Փաստ ինֆո

ՀՀ քրեական դատավարության նոր օրենսգրքի նախագծի աշխատանքային խումբը մտադիր է մինչև աշուն ավարտին հասցնել իր աշխատանքը, որպեսզի նախագիծը հնարավոր լինի արդեն սեպտեմբերից մեկնարկելիք աշնանային նստաշրջանում ներկայացնել Ազգային ժողովի լիագումար նիստի քննարկմանը:

Այս մասին «Փաստինֆո»-ի թղթակցին հայտնեց ԱԺ պետական-իրավական հարցերի մշտական հանձնաժողովի նախագահ Հովհաննես Սահակյանը:

Ինչպես ավելի վաղ տեղեկացրել էինք, արդեն տևական ժամանակ է, ինչ հանձնաժողովի մասնագիտությամբ  իրավաբան անդամներից և նախագիծը հեղինակած՝ Արդարադատության նախարարության ներկայացուցիչներից կազմված աշխատանքային խումբն աշխատում է ՀՀ քրեական դատավարության նոր օրենսգրքի նախագիծն ավարտուն տեսքի բերելու ուղղությամբ:

Ըստ Հ.Սահակյանի, իրենք աշխատանքները կազմակերպել են ըստ վարույթների՝ մինչդատական և դատական: Օրենսգրքի մինչդատական վարույթին վերաբերող բաժինների վրա աշխատանքներն ամբողջովին ավարտված են,  և, ըստ հանձնաժողովի նախագահի, անցել են դատական վարույթին վերաբերող բաժիններին: Աշխատանքային խումբն արդեն իսկ պայմանավորվել է ԱԺ ընթացիկ քառօրյա նիստերի ավարտից հետո՝ ուրբաթ օրը, շարունակել աշխատանքները օրենսգքի մինչդատական վարույթին վերաբերող բաժինների քննարկումները:

«Կարծում եմ՝ քառօրյան ավարտվելուց հետո աշխատանքային խումբն ավելի ինտենսիվ կաշխատի, որպեսզի ավելի արագ կարողանանք ավարտին հասցնել այս նախնական աշխատանքները, որից հետո պայմանավորվել ենք, որպեսզի հեղինակները մեզ ներկայացնեն քննարկումների ընթացքում ձևավորված բոլոր առաջարկությունները: Դրանից հետո արդեն կփորձենք համադրել և երբ մեկ-երկու կարևոր սկզբունքային հարցերի շուրջ գանք համաձայնության, ապա կներկայացնենք նաև քառօրյա լիագումար նիստեր: Կարծում եմ՝ նախագիծն արդեն կքննարկվի աշնանային նստաշրջանում»,-ասաց Հ.Սահակյանը։

Լուսանկարը` Ֆոտոլուրի