Փաստ ինֆո

Այսօր ասուլիսում հրապարակվեց ոչ իշխանական չորս խորհրդարանական խմբակցությունների համատեղ հայտարարության տեքստը:

Ինչպես հայտնեց «Ժառանգություն» խմբակցության ղեկավար Ռուբիկ Հակոբյանը, սա, ըստ էության, քառյակի հերթական նիստն է, որի ընթացքում համատեղ հայտարարությունը կստորագրվի:

Հայտարարության տակ ստորագրեցին «Բարգավաճ Հայաստան» խմբակցության քարտուղար Նաիրա Զոհրաբյանը, «Հայ ազգային կոնգրես» խմբակցության ղեկավար Լևոն Զուրաբյանը, ՀՅԴ խմբակցության ղեկավար Արմեն Ռուստամյանը, «Ժառանգություն» խմբակցության ղեկավար Ռուբիկ Հակոբյանը:

Հայտարարության մեջ ամրագրված են իշխանություններին ներկայացվելիք առաջնահերթ լուծում պահանջող 12 կետերը, որոնց կատարման համար ժամկետ է սահմանված մինչև ընթացիկ տարվա սեպտեմբերի վերջը: Աշնանը քառյակը կհրավիրի համապետական հանրահավաք, որտեղ կամփոփվեն այս պահանջենրի կատարման արդյունքները:

Ըստ այդմ, մասնավորապես, պահանջվում է վերացնել պարտադիր կոտակային բաղադրիչը, վերադարձնել մինչ այդ գանձված գումարները, վերացնել տեսանկարահանող սարքերը և «կարմիր գծերը», սահմանել տուգանքների առավելագույն չափերը` նվազագույն աշխատավարձի տասը տոկոսի չափով, առաջիկա երեք տարիների համար շրջանառության հարկի չափերը զրոյացնել, հանել սահմանի վրա ԱԱՀ-ի գանձումը, Սուբսիդիաների սահմանները ավելացնել ոռոգման ջրի, գյուղատնտեսական մյուս պարագաների համար սուբսիդիաների չափերը, գյուղատնտեսական վարկերը արտարժույթից վերածել դրամի, հաստատել «Նաիրիտ» գործարանի վերագործարկման ծրագիր: Հայտարարության մեջ ներառված է նաև «Որոտան» ՀԷԿ-երի կասկադի հետ կապված, նաև տրանսպորտի սակագնի բարձրացումը բացառելու պահանջ:

Նաև` «Ընտրական օրենսգրքում» կատարել փոփոխություններ, հաջորդ ընտրություններն անցկացնել բացառապես 100 տոկոս համամասնական ընտրակարգով, քվեարկությունից հետո ԿԸՀ-ի կայքում հրապարակել ընտրողների կողմից ստորագրված ընտրական ցուցակները, ապահովել ընդդիմության մասին օրենսդրական փաթեթի ընդունում ու ընդդիմությանը վերահսկողական գործառույթների վերապահում:

Հայտարարության մեջ ամրագրված է նաև պահանջ` չստորագրել այնպիսի որևէ միջազգային համաձայնագիր, որով կփոփոխվեն Հայաստանի և Արցախի միջև առկա, այդ թվում` տնտեսական հարաբերությունները: