Փաստ ինֆո

Ազգային ժողովի «Ժառանգություն» խմբակցությունը դեմ է քվեարկելու Սահմանադրական դատարանի անդամի թափուր պաշտոնում առաջադրված` ՀՀ նախագահի աշխատակազմի իրավաբանական վարչության պետ Արայիկ Թունյանի թեկնածությանը:

Այս մասին հայտարարեց խմբակցության ղեկավար Ռուբիկ Հակոբյանը, ում չբավարարեցին նախագահական ընտրությունների ընտրությունների արդյունքերի բողոքարկման հարցերով, կենսաթոշակային պարտադիր բաղադրիչի վերաբերյալ ՍԴ-ի որոշումների գնահատականների, ՍԴ-ի վարկանիշի մասին թեկնածուի պատասխանները:

Ա.Թունյանը, մասնավորապես, հայտնեց, թե «կոնկրետ պատասխան կարելի է տալ, երբ նյութին ամբողջական տիրապետում ես, երբ կարող ես կոնկրետ հետևություն անել»:

Ինչ վերաբերում է ՍԴ աշխատանքի գնահատականին, ապա Ա.Թունյաը նշեց. «Քաղաքական հարցերով ես երբևիցե չեմ զբաղվել: Ինձ դա առանձնապես չի էլ հետաքրքրել: Ես այդ գործերի վերաբերյալ չեմ ուսումնասիրել, բայց գտնում եմ, որ եթե ՍԴ-ն որոշում է կայացրել, ապա առաջնորդվել է Սահմանադրությամբ և օրենքներով»: ՍԴ-ի գործունեության կապակցությամբ էլ թեկնածուն նշեց, որ «իրականում դրական է համարում», քանի որ ի պաշտոնե ծանոթանում է ՍԴ բոլոր որոշումներին տեսնում է «լուրջ վերլուծություն` իրավական տեսանկյունից, շատ դժվար, պատասխանատու աշխատանք»:

«Ես Ձեզ առաջին անգամ եմ տեսնում: Այս 10 րոպե համոզեցիք, որ չի կարելի Ձեզ «կողմ» քվեարկել, բարեկամս»,-հայտարարեց «Ժառանգություն» խմբակցության ղեկավարը` հավելելով. «ՍԴ-ն միշտ քաղաքական որոշումներ է ընդունել, օրվա իշխանության քմահաճության տակ է եղել: Հիմա Դուք Ձեր պատասխաններով, պահվածքով գնում եք այնտեղ շատացնել այն մարդկանց քանակը, ովքեր իսկապես միշտ իշխանության երաժշտության տակ պարել են»:

«Բարգավաճ Հայաստան»  խմբակցության քարտուղար Նաիրա Զոհրաբյանն էլ հայտարարեց, որ խմբակցությունը քվեարկությանը չի մասնակցի:

«Այսօր մենք հանդիպեցինք ԱԺ նախագահի կողմից ներկայացված թեկնածուի հետ: Կներեք, տպավորությունն այնպիսի է, որ Դուք համալրելու եք ՍԴ-ի այս միաձույլ անդամներին, որոնք վախենում են ունենալ սեփական տեսակետ, որոնք իրենց մտքով անգամ համարձակություն չունեն ունենալու սեփական կարծիքը»,-նշեց Ն.Զոհրաբյանը` նկատելով, որ թեկնածուն բոլոր հարցերի շուրջ տալիս էր նույն պատասխանը, թե քաղաքականությանը չի խառնվում:

Ըստ Ն.Զոհրաբյանի, թեկնածուն իր պատասխաններով ապացուցեց, որ համալրելու է «այն մարդկանց շարքը, ովքեր առաջնորդվում են նույն կարծիքով` հնարավորինս լինել զգույշ, չունենալ սեփական տեսակետ»: Նա ընդգծեց, որ իրենց պետք են «համարձակ մարդիկ» և ԲՀԿ-ն չի մասնակցելու քվեարկությանը: