Փաստ ինֆո

Վերնիսաժի մոտ մայիսի 17-ին տեղի ունեցած միջադեպի կապակցությամբ հարուցված քրեական գործի շրջանակներում հունիսի 6-ին ձերբակալված Ներսես Մելքոնյանի ձերբակալման օրենքով նախատեսված առավելագույն ժամկետը` 72 ժամը լրանում է այսօր 15:00: Այս մասին «Փաստինֆո»-ին հայտնեց նրա փաստաբան Արմեն Խաչատրյանը:

Նրա տեղեկություններով, քննիչն արդեն իսկ իր պաշտպանյալին կալանավորելու  միջնորդությամբ դատարան դիմելու որոշում է կայացրել: Իսկ թե ինչ կորոշի դատարանը պարզ, կդառնա այսօր ցերեկը` 15 :00-ին:

Ինչպես մամուլին հայտնել էր Ներսես Մելքոնյանի մյուս պաշտպան, Փաստաբանների պալատի անդամ Վարդուհի Էլբակյանը, նրան նախաքննական մարմինը ձերբակալել էր ուրբաթ օրը, անմիջապես հարցաքննությունից հետո: Ներսես Մելքոնյանը կասկածվում է Քրեական օրենսգրքի 258-րդ հոդվածի 3-րդ մասի 1-ին կետի հատկանիշներով հանցագործություն կատարելու մեջ, այն է` Խուլիգանությունը՝ դիտավորությամբ հասարակական կարգը կոպիտ կերպով խախտելը, որն արտահայտվել է հասարակության նկատմամբ բացահայտ անհարգալից վերաբերմունքով, որը կատարվել է մի խումբ անձանց կամ կազմակերպված խմբի կողմից:

Հիշեցնենք, մայիսի 17-ին, ժամը 13:30-ի սահմաններում, Վերնիսաժի մոտ գործող «Պրոգրեստեխ Արմենիա» ընկերության շենքի մուտքի դիմաց կրակոցների հետևանքով հրազենային վնասվածքներով հիվանդանոց էր տեղափոխվել 5 անձ:

Ավելի ուշ պարզվել էր, որ կրակողը ԱԺ ԲՀԿ խմբակցության պատգամավոր Կարո Կարապետյանի փեսան՝ 28-ամյա Գոռ Առաքելյանն է եղել, ով ներկայում կալանավորված է դեպքի առթիվ հարուցված քրեական գործի շրջանակներում: Նրան մեղադրանք է առաջադրվել՝ ՀՀ Քրեական օրենսգրքի 34-104-րդ հոդվածի 2-րդ մասի 1-ին, 6-րդ, 10-րդ կետերի, ինչպես նաև՝ 235-րդ հոդվածի 1-ին մասի հատկանիշներով, այն է` խուլիգանական դրդումներով, շատերի կյանքի համար վտանգավոր եղանակով երկու կամ ավելի անձանց սպանության փորձ կատարելը և ապօրինի կերպով հրազեն ձեռք բերելը, իրացնելը, պահելը կամ կրելը:

Ինչ վերաբերում է նույն գործի շրջանակներում ձերբակալված Ներսես Մելքոնյանին, ով, ի դեպ, դեպքից հետո հիվանդանոցում գրանցված էր Նորայր Հարությունյան անուն-ազգանունով, նա կրակոցների արդյունքում ստացել էր ձախ ազդրի միջնային մակերեսի փափուկ հյուսվածքների թափանցող հրազենային վնասվածք: Ներսես Մելքոնյանը ոստիկանություն էր հրավիրվել` հարցաքննության, անմիջապես հիվանդանոցից դուրս գրվելուց հետո, և փաստաբան Վարդուհի Էլբակյանի խոսքով, նրա առողջական վիճակը լավ չէ և բժիշկների ցուցումով, պետք է լինի բժշկական հսկողության ներքո:

Փաստաբանները գտնում են, որ Ներսես Մելքոնյանին մեղադրանք առաջադրելով, նախաքննական մարմինը փորձում է ԲՀԿ-ական պատգամավորի փեսա Գոռ Առաքելյանի գործողությունները ներկայացնել որպես ինքնապաշտպանություն։ Ուստի պատահական չէ, որ դեպքից անմիջապես հետո ԲՀԿ-ական պատգամավոր Կարո Կարապետյանը հայտարարել էր, թե Գոռին կնոջ, երեխայի ներկայությամբ ծեծել, ջարդել են, դրա համար էլ նա կրակել: Ավելի ուշ նրա հասարակական վայրում կրակելն ու պատահական անցորդներին վիրավորելը նման կերպ արդարացրեց նաև նախկին ոստիկանապետ Ալիկ Սարգսյանը:

Ի դեպ, «Փաստինֆո»-ի հարցին, թե կա արդյոք, գործով տուժաղ ճանաչված անձ, ՀՀ Ոստիկանության տեղեկատվության և հասարակայնության հետ կապերի բաժնում հրաժարեցին պատասխանել` պատճառաբանելով նախաքննական գաղտնիք լինելով: Փաստորեն, այս գործով տուժող ճանաչելու-չճանաչելու միայն  փաստը հույժ գաղտնի է։