Փաստ ինֆո

Հասարակության որոշակի խավ փորձում է Վերնիսաժի գործով մեղադրյալ Ներսես Մելքոնյանին ներկայացնել  որպես  ագրեսիվ մարդ, մինչդեռ ճիշտ հակառակ նկարագրի մարդ է, շատ հանգիստ բնավորության տեր մարդ է, ով ապրում է իր գյուղի հոգսերով ու իր  գյուղին օգնելով: Այս մասին  լրագրողներին հայտնեց Ներսես Մելքոնյանի պաշտպան Վարդուհի Էլբակյանը՝ հավելելով, որ իր պաշտպանյալը գործարար ու բարեգործ է:

Ն.Մելքոնյանը Ախալցխայի տարածաշրջանի Նաուխրեբի գյուղից է, գյուղը գտնվում է Թուրքիայից ընդամենը 3 կմ հեռավորության վրա: «Նա այն անձնավորությունն է, ով հովանավորել է  եկեղեցու խաչի կառուցումը՝ խաչն ուղղված է դեպի Թուրքիա: Պատկերացնո՞ւմ եք, թե դա ինչ է նշանակում և դա ո՞նց են պահպանում այդ գյուղի մի քանի բնակիչներ»,- ասաց Վարդուհի Էլբակյանը:  Ն.Մելքոնյանը նաև հովանավորել է գյուղի վերաբերյալ գրքի հրատարակմանը:

Պաշտպանը նշեց, որ իր պաշտպանյալը «իհարկե, չի ընդունում մեղադրանքը»: «Մարդը ոչինչ չի արել, մարդն ընդամենը դուրս է եկել, ասել է՝ անցած լինի, նման բան է տեղի ունեցել ու մարմնական վնասվածքներ է ստացել, հրազենային վնասվածքներ է ստացել, դրանից հետո ի՞նչը ինքը պետք է ընդունի»,- ասաց Վարդուհի Էլբակյանը:

Այսօր, ինչպես արդեն «Փաստինֆո»-ն տեղեկացրել է, առաջին ատյանի դատարանը Ներսես Մելքոնյանի նկատմամբ խափանման միջոց ընտրեց երկամսյա կալանավորումը՝ այդպիսով բավարարելով նախաքննական մարմնի միջնորդությունը: Վ.Էլբակյանը բարձրաձայնեց մինչև դատարանի այդ որոշումը կայացնելը իր պաշտպանյալին երկու ժամ տասը րոպե ապօրինի կերպով անազատության մեջ պահելու մասին՝  նա ձերբակալվել է հունիսի  6-ին` ժամը  15-ին,  իսկ դատարանի որոշումը հրապարակվել է  այսօր, հունիսի 9-ին` ժամը 17.10-ին:

Նույնպիսի  խախտումներ են  արձանագրվել  նաև   մայիսի 17-ից  մինչև նրա ձերբակալվելը՝ հունիսի 6-ն,  ընկած ժամանակահատվածում. նա  այդ ամբողջ ժամանակ  հիվանդանոցում պառկած եղել է վկայի կարգավիճակում՝ 4  հրազենային վնասվածքով, սակայն ոստիկանության աշխատակիցները եղել են նրա հիվանդասենյակի դռան մոտ, այսինքն՝ փաստացի գտնվել է ձերբակալվածի կարգավիճակում: Հիվանդանոցից գնացել է ոստիկանության բաժին՝ առկա չէ բերման ենթարկելու որոշում կամ ծանուցում: Բացի այդ, ըստ պաշտպանի, հունիսի  2-ին էլ նրա քիթն են վիրահատել, ըստ տեղեկանքի, դեռ մեկ ամիս էլ նա պետք է գտնվեր համապատասխան  բժիշկների հսկողության տակ, այդուհանդերձ, նրան տարել են  Ձերբակալվածների պահման վայր, որտեղ գտնվելու ամբողջ ընթացքում շտապ օգնության մեքենան այնտեղ է  եղել, կամ տարել են հիվանդանոց վիրակապել, նորից հետ տարել: «Եթե նախաքննական մարմինն օբյեկտիվ լիներ,  նա բոլորովին այլ կարգավիճակ կունենար»,- վստահ է Վ.Էլբակյանը: