Փաստ ինֆո

Արդեն շուրջ 1 շաբաթ ոստիկանները չեն կարողանում գտնել Երևանի փոխոստիկանապետ Վալերի Օսիպյանի եղբորորդուն` Սեդրակ Օսիպյանին, ով մեղադրվում է հուլիսի 2-ի գիշերը Նուբարաշենում 22- ամյա Վանուշ Ալեքսանյանին դանակահարելու մեջ` որովայնի հատվածում պատճառելով ծանր վնասվածքներ:

Դանակահարված երիտասարդը տեղափոխվել էր «Էրեբունի» հիվանդանոց, նրան վիրահատել էին, հեռացրել փայծաղը: Փաստի առթիվ հարուցվել է քրեական գործ՝ ՀՀ քրեական օրենսգրքի 112-րդ հոդվածի 1-ին մասով, այն է` մարմնական վնասվածք պատճառելը կամ առողջությանն այլ ծանր վնաս պատճառելը, որը վտանգավոր է կյանքի համար կամ առաջացրել է տեսողության, խոսքի, լսողության կամ որևէ օրգանի կամ օրգանի ֆունկցիայի կորուստ:

Ի դեպ, այն, որ դանակահարողը հենց Օսիպյանի եղբոր որդին է եղել, մամուլին հայտնի դարձավ անմիջապես դեպքից հետո, իսկ ոստիկանությունն այս տեղեկատվությունը հաստատեց միայն մի քամի օր անց ու մինչ օրս անարդյունք շարունակում է փնտրել նրան: Սեդրակ Օսիպյանին հայտնաբերելու մասին մեր հարցին ՀՀ Ոստիկանության տեղեկատվության և հասարակայնության հետ կապերի վարչությունից ասացին, որ եթե նորություն լինի, այդ մասին տեղեկատվությունը կհրապարակվի Ոստիկանության պաշտոնական կայքում:

Մեկ այլ պաշտոնյայի որդի` Քանաքեռ-Զեյթուն համայնքի նախկին թաղապետ, Երևանի քաղաքապետ Տարոն Մարգարյանի ներկայիս խորհրդական Արայիկ Քոթանջյանի որդին էլ հունիսի 6-ին երեկոյան Քանաքեռ- Զեյթուն համայնքում հնչած կրակոցների հեղինակն է՝ դարձյալ ըստ մամուլի: Ոստիկանությունում այս փաստը ո’չ հերքում են, ո’չ հաստատում: Դեպքից հետո ՀՀ Ոստիկանության տեղեկատվության և հասարակայնության հետ կապերի վարչությունից «Փաստինֆո»-ին հայտնել էին, որ  կատարողը հայտնի է, միջոցներ են ձեռնարկվում նրան հայտնաբերելու ուղղությամբ, սակայն, նրա ով լինելը չեն բացահայտում:

Արդեն 3 օր, փաստորեն, ոստիկանությունը չի կարողանում գտնել նաև այս պաշտոնյայի որդուն:

Ի դեպ, այս փաստով ևս կա հարուցված քրեական գործ` ՀՀ քրեական օրենսգրքի 258-րդ հոդվածի 4-րդ մասի և 235-րդ հոդվածի 1-ին մասի հատկանիշներով, այն է ապօրինի կերպով հրազեն ձեռք բերելը, իրացնելը, պահելը, փոխադրելը կամ կրելը և խուլիգանությունը՝ դիտավորությամբ հասարակական կարգը կոպիտ կերպով խախտելը, որն արտահայտվել է հասարակության նկատմամբ բացահայտ անհարգալից վերաբերմունքով: