Փաստ ինֆո

Մոսկվայի «Սպարտակը» պայմանագրեր չի կնքել մենեջեր Դմիտրի Սելյուկի ֆուտբոլային գործակալության հետ, ուստի չի կարող պատասխանող կողմ լինել անցյալ տարվա ամռանը Կրասնոդարի «Կուբանից» Հայաստանի ազգային հավաքականի կիսապաշտպան Արաս Օզբիլիսի տեղափոխության գործով:

Հետևաբար, «Սպարտակը» չի կարող այդ խնդրի պատճառով զրկվել Եվրոպայի լիգայի մրցաշարին մասնակցելու իրավունքից, ИТАР-ТАСС-ին հայտնել է ճանաչված մարզական իրավաբան Միխայիլ Պրոկոպեցը:

Հիշեցնենք, որ Սելյուկը հայտարարել է, թե իր իրավաբանները «Սպարտակի» և «Կուբանի» դեմ հայց են ներկայացնելու շվեյցարական դատարան, որի լսումների արդյունքում մոսկովյան ակումբը ֆինանսական «արդար խաղի» սկզբունքները խախտելու համար կարող է հեռացվել Եվրոպայի լիգայի հերթական խաղարկությունից: Հայցվոր կողմը պնդում է, որ իր հետ պայմանագրի համաձայն, «Կուբանն» իրավունք չուներ Օզբիլիսին վաճառել 6 մլն եվրոյից պակաս գումարով: Մինչդեռ, պաշտոնական տվյալներով տեղափոխության համար վճարվել է 2 միլիոն:

«Անկեղծ ասած, տվյալ դեպքում դժվար է որևէ բան մեկնաբանել: Գործի էությանը խորամուխ լինելու համար անհրաժեշտ է ծանոթանալ նյութերին, քանզի Սելյուկի բացատրություններն ակնհայտորեն բավարար չեն: Բացի այդ, նրա ամեն մի հերթական հայտարարություն հակասում է նախորդին: Ամեն դեպքում, հասկանալի չէ՝ եթե գործակալությունը պայմանագիր է ունեցել «Կուբանի» հետ, ապա ինչ կապ ունի «Սպարտակը»: Մոսկվացիները Սելյուկի նկատմամբ որևէ պարտավորություն չեն ունեցել և Օզբիլիսին գնել են այն գումարով, որի վերաբերյալ պայմանավորվել են «Կուբանի» հետ: Այնպես որ, եթե ինչ-որ մեկը պետք է պատասխանող լինի այս գործում, ապա հենց Կրասնոդարի ակումբը՝ «Սպարտակը» պատասխանող կողմ չի կարող լինել: Եթե մեքենան արժի, ասենք, 100 ռուբլի, բայց նրա տերը, չունենալով նման իրավունք, վաճառել է կես գնով, ապա որն է՞ այդտեղ գնորդի մեղքը: Նույն պատկերն էլ այստեղ է. Սելյուկի հետ պայմանագիր է ունեցել «Կուբանը», ուստի նա էլ պետք է պատասխանի: «Սպարտակը» մեղավոր չէ, եթե անգամ գիտեր, որ կրասնոդարցիները չեն կարող 6 միլիոն եվրոյից էժան վաճառել Օզբիլիսին: Իմ կարծիքով, մոսկվացիներին ոչ մի պատժամիջոց չի սպառնում»,- նշել է Պրոկոպեցը:

Հավելենք, որ Շվեյցարիայում գործի լսումը նախատեսված է հունիսի վերջին տասնօրյակում: