Փաստ ինֆո

Խոհանոցային դանակով կնոջը դանակահարելու համար 51-ամյա Ավետիս Մանուկյանը Ավան և Նոր  Նորք վարչական շրջանների ընդհանուր իրավասության դատարանի դատավճռով դատապարտվեց 4 տարվա  ազատազրկման:

Ըստ մեղադրանքի` Ավետիս Մանուկյանն իր  կնոջ` Մախովայի  հետ հեռախոսային խոսակցության ընթացքում կենցաղային հարցերի շուրջ տեղի ունեցած վեճից վիրավորված միայնակ օգտագործել է մեծ քանակությամբ ոգելից խմիչք, հարբել եւ, վերցնելով խոհանոցային դանակը,  ուղևորվել կնոջ աշխատավայր` «Հայաթ» հյուրանոցային համալիր: Կնոջը հանդիպել է առաջին հարկում, որի ժամանակ էլ, ըստ գործի նյութերի,  դանակով 1 անգամ հարվածել է նրան: Կնոջը պատճառված մարմնական վնասվածքը,  դատաբժշկական փորձաքննությամբ, գնահատվել է որպես կյանքին վտանգ սպառնացող: Ավետիս Մանուկյանին մեղադրանք է առաջադրվել ՀՀ քրեական օրենսգրքի 112-րդ հոդվածի 1-ին մասով:

Այսօրվա դատական նիստում ամբաստանյալը,  օգտվելով իր վերջին խոսքի իրավունքից, հայտարարեց, որ կնոջ հետ ապրել է 20 տարի և այդ ընթացքում ոչ մի անգամ նրան չի դավաճանել, բայց կինը «ստախոս դավաճան է»: «Թող գնա իր հայրենիքում ապրի, «ազգիս մոտ խայտառակ եմ եղել,  կնոջս պատճառով ոչ ոք իմ  հետ չի շփվում», հայտարարեց ամբաստանյալը: Ամբաստանյալի խոսքով` ինքը միայն «փոշմանել է, որ կինը ողջ դատարանում նստած է»:

Դատարանը ամբաստանյալի պատիժը ծանրացնող հանգամանք է դիտել այն,  որ նա արարքը կատարել է ալկոհոլի ազդեցության տակ, իսկ մեղմացնող հանգամանքներ՝ դատարանը չի հայտնաբերել:

Նշենք նաև տուժողի պահելաձևի և ամուսնուն ուղղված վիրավորական արտահայտությունների համար նախագահող դատավոր Դավիթ Հարությունյանը նրան դիտողություն արեց և խորհուրդ տվեց հիշել, թե որտեղ է նա գտնվում: