Փաստ ինֆո

Ադրբեջանը պարբերաբար, օրինաչափորեն լարվածություն է ստեղծում հայ ադրբեջանական սահմանի ամենատարբեր տեղամասերում:  «Փաստինֆո»-ի թղթակցի հետ զրույցում նշեց ՀՀ պաշտպանության նախարարի խորհրդական Դավիթ Ջամալյանը՝ մենաբանելով օրեր առաջ հայ-ադրբեջանական սահմանագոտու հարավ-արևմտյան ուղղությամբ տեղակայված զորամասերից մեկի պահպանության տեղամասի մարտական հենակետում հակառակորդի դրսևորած ակտիվությունը, որի հետևանքով մահացել է երկու հայ պայմանագրային զինածառայող։

Նրա դիտարկմամբ՝ Ադրբեջանը նախևառաջ փորձում է աշխարհին ցույց տալ, որ  հակամարտությունը Հայաստանի Հանրապետության հետ է, այլ ոչ թե Արցախի: Այդ է պատճառը, որ Բաքուն  հենց Հայաստանի հետ պետական սահմանին է ստեղծում լարվածություն։ Երկրոդ՝ եթե խնդիրը դիտարկենք բանակցային գործընթացի համատեքստում, ապա Ադրբեջանն այս կերպ ցանկանում է ի ցույց դնել իր չհամակերպվելը տարածաշրջանում ձևավորված իրողությունների, Արցախի՝ հայապատկան լինելու հետ:

Դավիթ Ջամալյանի խոսքով՝հակառակորդի ակտիվությունն ունի նաև քարոզչական նպատակ՝ հայաստանաբնակ հայության շրջանում ձևավորել Արցախը հանձնելու դիրքորոշում։ «Բաքվում շատ լավ գիտեն, որ զինվորի կորուստը մենք շատ ցավոտ ենք տանում, և կորուստներ պատճառելով՝ փորձում են մեզանում ստեղծել տագնապային հոգեվիճակ, հոգեբանորեն ճնշող մթնոլորտ, որի ֆոնին ձգտում են պատճառահետևանքային կապ ստեղծել կորուստների և Արցախի հայապատկանության միջև»,- նշեց մեր զրուցակիցը` ավելացնելով, որ ադրբեջանական քարոզչական ակտիվությանը հարկավոր է հակադարձել:

«Մեր հանրության շրջանում հարկավոր է ամրապնդել այն աներկբա ճշմարտության գիտակցությունը, որ տարածք զիջելով խաղաղություն չենք ստանա, որովհետև Ադրբեջանի նպատակները հեռահար են. Բաքվի հավակնությունները չեն սահմանափակվում միայն Արցախի տարածքով»,- ընդգծեց Դ.Ջամալյանը:

Ինչ վերաբերում է նախիջևանյան ուղղությամբ ևս լարվածության ստեղծմանը, որը մինչև այժմ դիտարկվում էր համեմատաբար հանգիստ սահմանային գոտի, ապա, պարոն Ջամալյանի խոսքերով, «հնարավորինս մեծ թվով լարվածության օջախներ ստեղծելով թշնամին փորձում է ջլատել մեր ուժերը, շեղել ուշադրությունը հիմնական՝ արցախյան ուղղությունից՝ ստիպելով ավելի մեծ ռեսուրսներ ծախսել պաշտպանություն կազմակերպելու համար»։

«Բայց մենք Նախիջևանում ունենք շատ մարտունակ զորամիավորում, որն ունակ է տևականորեն ավտոնոմ ռեժիմով ակտիվ պաշտպանություն իրականացնել: Այս ուղղությունը հուսալիորեն պաշտպանված է: Ինչ վերաբերում է ընթացիկ լարվածությանն, ապա՝ իհարկե անցանկալի է այդ ուղղությամբ իրավիճակի ապակայունացումը, բայց եթե Ադրբեջանը գնա այս ճանապարհով, ապա մենք ունենք բավարար ուժեր, հնարավորություններ զսպելու և պատժելու թշնամուն»,- վստահեցրեց  Դավիթ Ջամալյանը՝ փաստելով, որ տարիներ շարունակ նախիջևանյան ուղղությամբ հարաբերական անդորր է եղել, բայց թուրք-ադրբեջանական տանդեմը Նախիջևանը վերջին շրջանում վերածել է Հայաստանի դեմ ագրեսիայի պլացդարմի։ Նախիջևանում  Ադրբեջանական ռազմական ներկայությունը ավելի հարաճուն է դառնում, այնտեղ տեղակայված 5-րդ բանակային կորպուսը նախորդ տարի վերակազմավորվեց որպես առանձին համազորային բանակ, ինչը թվաքանակի մեծացում է ենթադրում, լրացուցիչ սպառազինություն ներմուծվեց: Ակնհայտ է, որ տվյալ հատվածում թշնամու ուժերը մեծաթիվ են դառնում: Ահա այս իրողություններով է պայմանավորված նաև նախարար Օհանյանի արտահայտած դիրքորոշումն առ այն, թե մեր ծրագրերում տարածքներ հանձնել չկա, և որ Ադրբեջանի հետ հակամարտության կարգավորման ցանկացած սցենար պետք է հիմնված լինի զինվորականների և ռազմական փորձագետների եզրակացությունների վրա: Երկրի ճակատագրի համար պատասխանատվության գիտակցումն է ընկած այս հայտարարության հիմքում, քանզի նման պայմաններում տարածքային զիջումները վտանգելու են ոչ միայն Արցախն այլև Հայաստանի Հանրապետությունը:

Բանախոսի գնահատմամբ՝ սկզբունքորեն նորություն չէ, որ Ադրբեջանը պատրաստվում է պատերազմի, սակայն այժմ տեսնում ենք, որ այդ պատրաստությունը ոչ միայն ընթանում է «բուն Ադրբեջանի» տարածքում,այլև արդեն նախիջևանում, ինչն, իհարկե, մտահոգիչ է: Սակայն այս ուղղության հուսալի պաշտպանության նպատակով մեր ջանքերը հարաճուն բնույթ ունեն,- վստահեցրեց նախարարի խորհրդականը՝ ավելացնելով, որ «առկա լարվածությունը մեծ պատերազմի չի հանգեցնի, քանի որ մեծ պատերազմի համար Ադրբեջանի ուժերը այնուամենայնիվ բավարար չեն, քանզի մեզ հաջողվում է պահպանել ուժերի հավասարակշությունը: Հայաստանի Հանրապետությունն ու Արցախն այսօր Ադրբեջանի համար անմատչելի հակառակորդներ են: Եթե այդպես չլիներ ռազմական լայնամասշտաբ գործողությունները վաղուց վերսկսված կլիներին»:

Ըստ Դավիթ Ջամալյանի՝ միջազգային զսպման մեխանիզմները Ադրբեջանի հանդեպ կարծես թե չեն գործում և  այս պարագայում ստիպված ենք ապավինել մեր ուժերին և սեփական հնարավորություններով ստիպել Ադրբեջանին հարգել հրադադարի ռեժիմը:

«Բարի կամք հանդես բերելով՝ ձեռնպահ ենք մնում կտրուկ քայլերից, բայց, թե՛ Բաքվում և թե՛ մեր գործընկեր երկրներում պետք է հստակ գիտակցեն, որ եթե Ադրբեջանը շարունակի նաև նախիջևանյան հատվածում լարվածություն ստեղծել, ապա մենք զսպող, կտրուկ հակընդդեմ ուժ կբանեցնենք»,- հավելեց Պաշտպանության նախարարի խորհրդականը: