Փաստ ինֆո

ՀՀ Նախագահին առընթեր սահմանադրական բարեփոխումների մասնագիտական հանձնաժողովը բաց է քննարկումների համար և պատրաստ է անգամ անդրադառնալ իր համար ոչ հաճելի ձևով հնչած առաջարկներին:

Այս մասին այսօր Երևանում` կուսակցությունների ներկայացուցիչների մասնակցությամբ, սահմանադրական բարեփոխումների հայեցակարգի նախագծի քննարկման ժամանակ, նշեց ՀՀ Նախագահին առընթեր սահմանադրական բարեփոխումների մասնագիտական հանձնաժողովի նախագահ՝Սահմանադրական դատարանի նախագահ Գագիկ Հարությունյանը:

Նա վստահեցրեց, որ «կարծրացած որևէ բան չկա», այլ քննարկման ներկայցվածն  ընդամենը  նախագիծ է, և հետագայում ևս հանձնաժողով կհրավիրվեն առաջարկներ ներկայացրած բոլոր անձինք՝  մանրակրկիտ քննարկում իրականացնելու և ճիշտ լուծումներ գտնելու նպատակով:

«Մենք շատ լավ հասկանում ենք տարաբնույթ նաև քաղաքական դիրքորոշումները, դրանց դրդապատճառները: Ես չեմ կարծում, թե մենք այստեղ հարազատներ, թշնամիներ պետք է փնտրենք: Մենք  պետք է ձերբազատվենք այդպիսի հոգեբանությունից և կարողանանք ընդհանուր շահագրգռվածության դաշտ գտնել՝ իսկապես շտկելու այն, ինչ անհրաժեշտ է, որովհետև հակառակ պարագայում՝ մենք երանի ենք տալու նաև այս վիճակին: Աստված մի արասցե, որ գա այդ պահը»,- ընդգծեց Գ.Հարությունյանը՝ ակնարկելով հատկապես խորհրդարանական ոչ իշխանական քառյակի երեք կուսակցությունների՝ «Բարգավաճ Հայաստան»-ի, «Հայ ազգային կոնգրես»-ի, «Ժառանգության» այսօր հայտնած դիրքորոշումները:

Ինչպես «Փաստինֆո»-ն ավելի վաղ տեղեկացրել էր, այսօր քննարկման ժամանակ վերոհիշյալ երեք քաղաքական ուժերի ներկայացուցիչները շնորհակալություն հայտնելով քննարկման կազմակերպմանն աջակցած, իրենց բնորոշմամբ, իրենց եվրոպական գործընկերներին՝ ԵԱՀԿ երևանյան գրասենյակին, Հայաստանում Եվրամիության պատվիրակությանը և Գերմանական միաջզգային համագործակցության ընկերությանը` հրավերի համար, ընդգծել էին, որ չեն մասնակցելու իշխանությունների կողմից կազմակերպված սահմանադրական փոփոխությունների հայեցակարգի նախագծի բովանդակային քննարկումներին՝ առկա պայմաններում և երկրում տիրող իրավիճակում աննպատակահարմար համարելով սահմանադրական փոփոխությունների իրականացումը:

Ի տարբերություն իր երեք գործընկերների՝ ՀՅԴ-ն, ինչպես նշեց ՀՅԴ խմբակցության անդամ Արծվիկ Մինասյանը, ոչ միայն այն ուժն է, որ ողջունում է սահմանադրական փոփոխությունների մշակումը և հանրային քննարկման  անցկացումը, այլև «պատրաստ է ակտիվորեն ներգրավվել սահմանադրական բարեփոխումների գործընթացում՝ թե բովանդակային, թե ընթացակարգային և թե պահանջների առաջադրման ու իրացման առումով»:

Ըստ Ա.Մինասյանի, հայեցակարգի նախագծում բազմաթիվ հարցեր արծարծված են, բայց Դաշնակցության համար սահմանադրական փոփոխություններում «գլխավոր, հիմնարար, կարմիր թելի նման անցնող խնդիրը կապված է իշխանությունների բաժանման և հավասարակշռման սկզբունքի լիարժեք իրացումն ապահովող խորհրդարանական կառավարման ձևի հետ»: