Փաստ ինֆո

Երևանի Տերյան փողոցում ուսանող Տիգրան Հայրապետյանի սպանությանը հանգեցրած արյունոտ «պարզաբանումների» գործով այսօր հարցաքննվեցին ծեծկռտուքի մասնակիցներ, ովքեր ներկայումս բանակում ծառայություն են անցնում:  Բոլոր երեք զինծառայողներն էլ հիշողության մասնակի կամ ամբողջական  կորուստներով էին տառապում:

Այսպես, վկա  Ռոբերտ Խաչատրյանը,  ով հայտարարեց, որ տուժողն իր ամենամտերիմ ընկերն է եղել, չէր հիշում, թե ինչի՞  համար է սպանությունից հետո տուժողի տուն  պլանշետ տարել և ի՞նչ լուսանկար է ցույց տվել  տուժողի հորը՝ Պատվական Հայրապետյանին: Փոխարենը վկան հիշեց, որ  «դանակով մարդն» ու Տիգրան Հայրապետյանին քաշքշող մարդը տարբեր մարդիկ էին՝  առաջինն ավելի բոյով էր ու  մուգ հագուստով: Իսկ հարցին, թե ո՞վ է դանակով հարվածել Տիգրանին՝ հնչեց «չգիտեմ» պատասխանը:

Վկան հայտնեց, որ ծեծկռտուքի ժամանակ առաջին հարվածը ստացել է քթին, որի հետևանքով քիթն այտուցվել է, իսկ աչքի շրջանում կապտուկ է առաջացել,  «ձեռքը ճղվել էր»:  Տարօրինակ է, բայց գործի փաստական տվյալ է, որ որովայնի շրջանում վնասվածքը շատ ավելի ուշ է նկատել: 
Էական հակասությունների պատճառով հրապարակվեցին վկայի նախաքննության ընթացքում ցուցմունքները, ծեծկռտուքի մասնակիցները  20-25 հոգի էին, որոնցից  մեկի ձեռքում կար 10 սմ երկարությամբ դանակ: Ըստ վկայի, ավելի ուշ է նկատել, որ  Տիգրանը դանակահարվել է՝ կրծքավանդակի աջ կողմից արյուն էր եկել: «Մի քանի քայլ վազեցինք, որից հետո  Տիգրանը թուլացավ ու ընկավ»,- նշել է  վկան, ապա լսվել է  մասնակիցներից մեկի գոռոցը՝ «Հայկո, էս ի՞նչ արեցիր, Կոմիտասը կտրաքցնեմ»:

Վկա Արտավազդ Դավթյանը դատարանում հայտնեց, որ ծեծկռտուքի վայրից փախչելուց հետո տաքսիում տեսել է  մի սև բան, բարձրացրել է, տեսել է՝ դանակ է,  դրել է նույն տեղը, մինչդեռ նախաքննության ընթացքում վկան հայտնել էր, որ իրեն անծանոթ մեկը Կարենին է փոխանցել դանակը, վերջինս այն գցել է ոտքերի տակ:

Ըստ մեղադրական եզրակացության, 11-րդ դասարանցի Հայկ Աղամալյանը Տերյան փողոցում մի խումբ անձանց հետ, դանակի գործադրմամբ բռնություն գործադրելով, կատարել է խուլիգանություն, որի ընթացքում նույն դանակով հարվածել է տուժող Տիգրան Հայրապետյանի կրծքավանդակին և նրան ապօրինաբար զրկել կյանքից:  Իսկ Դավիթ Մանուկյանը մեղադրվում է «բռնության գործադրմամբ` խմբի կազմում» խուլիգանություն կատարելու մեջ, ինչպես նաև՝ առանձնապես ծանր հանցագործության կատարման գործիք հանդիսացող դանակը (որից նախապես չորացվել էին արյան  հետքերը) պարտակելու մեջ: