Փաստ ինֆո

 

«Ես կարծում եմ՝ Հայաստանն իսկապես բավականին լուրջ իրավիճակում է հայտնվել և պետք է կարողանա ճիշտ քայլեր ձեռնարկել` ընդհուպ մինչև իր պայմանները թելադրել: Արդյունքում ինչի՞ կհանգենք, սա ժամանակի հարց է»,-Ազգային ժողովում` ի պատասխան լրագրողների հարցերի, ասաց «Ժառանգություն» խմբակցության ղեկավար Ռուբիկ Հակոբյանը` անդրադառնալով  նախօրեին Աստանայում Եվրասիական տնտեսական միության ստեղծման մասին համաձայնագրի ստորագրման ընթացքին: 

 

Ըստ նրա` Հայաստանը բավականին լուրջ իրավիճակում է հայտնվել, որովհետև մեր անդամակցության համար Աստանայում ժամկետ է նշվել, սակայն հայտնի չէ, թե այդ ժամկետում ի՞նչ պետք է արվի: 

 

«Բայց ես ենթադրում եմ` ինչ պետք է արվի: Առնվազն հստակ է, որ Ղազախստանը պետք է հավաստիացում ստանա, որ Ղարաբաղը չպետք է մաս կազմի որևէ կառույցի, որտեղ Հայաստանը պետք է լինի, և, երևի թե, դա պետք է ինչ-որ տեղ արձանագրվի փաստաթղթով: Որովհետև բոլոր այն մոտեցումները, որ կարող են փաստաթղում դա չարձանագրեն, բայց Արցախը մեզ հետ է, և որտեղ մենք` այնտեղ Արցախը, դա մենք ասում ենք ուղղակի մեզ բավարարելու համար, բայց միջազգային հարթության վրա ինչ-որ տեղ անհասկանալի է, որ կարելի է ընդամենն այս տրամադրությամբ համաձայնվել կառույցի մաս կազմել»,-ընդգծեց Ռ.Հակոբյանը:

 

Նրա համոզմամբ` Հայաստանը պետք է իր հստակ դիրքորոշումը արտահայտնի, և քանի որ «այլոց պայմաններով են խոսում Հայաստանի հետ, Հայաստանը պետք է իր պայմանները թելադրի»:

 

«Համենայնդեպս մի բան հստակ է. եթե Արցախն անտեսվում է  այս կառույցում, եթե ասվում է, որ Հայաստանն ինչ-որ կառույցի մաս պետք է կազմի ՄԱԿ-ի ճանաչած շրջանակներում,  Հայաստանը պետք է որոշակիորեն իմանա իր անելիքները»,-նշեց Ռ.Հակոբյանը: 

 

Հարցին, թե հնարավոր է ինքը համարում է, որ դա պատճառ հանդիսանա ու Հայաստանը չանդամակցի ԵՏՄ-ին, Ռ.Հակոբյանը հայտնեց, որ հիմա չի կարող ասել, թե ինչ արդյունք կունենանք: Ըստ նրա` պետք չէ հոյհոյել որևէ մեկին, պետք չէ քննադատել. յուրաքանչյուրը առաջնորդվում է իր պետական շահով: 

 

Ինչ վերաբերում է քննադատություններին, ըստ որոնց Նախագահ Սերժ Սարգսյանը երեկ, լսելով Ադրբեջանի նախագահի ուղերձը, պետք է հենց այնտեղ խոսեր, ապա Ռուբիկ Հակոբյանն ասաց. «Ես չեմ կարող ասել՝ այդ պահին ինչ տրամադրությունն է ունեցել, ինչպես է եղել արձագանքը: Ինչ-որ արձագանք եղած պիտի լինի, դա չէր կարող անակնկալ լինել: Մինսկի գագաթնաժողովում էլ այդ մասին խոսք եղավ, մենք ընդգրկված ենք ԱՊՀ կառույցներում, որտեղ բազմիցս եղել է այդ հարցը, Ղազախստանը բարձրացրել է այդ հարցը: Հայաստանը պետք է պատրաստ լիներ, պետք է ակտիվ քաղաքականությունն տանել, մանավանդ հստակ է՝ այս պետությունների համար առաջնահերթությունը որն է, Ղազախստանը չի թաքցնում, որ պաշտպանելու է և ինչ-որ տեղ ներկայացնելու է Ադրբեջանի պետական շահը»: