Փաստ ինֆո

Շվեյցարացի գլխավոր մարզիչ Բեռնար Շալանդի նորամուտը ֆուտբոլի Հայաստանի ազգային հավաքականի ղեկին առնվազն արդյունքի տեսակետից կարելի է հաջողված համարել: Հայկական ընտրանին մարզչի հայրենիքում անցկացված ստուգողական խաղում հանդես գալով փորձնական կազմով՝ կարողացավ 4:3 հաշվով հաղթել Արաբական Միացյալ էմիրությունների թիմին:

Սա Հայաստանի հավաքականի ստուգողական երկրորդ հանդիպումն էր այս մրցաշրջանում: Հիշեցնենք, որ մարտին մեր թիմը Կրասնոդարում 0:2 հաշվով պարտվել էր ռուսներին: Չնայած այս անգամվա մրցակիցն ուշեղագույնների շարքին չի դասվում, սակայն խաղը հետաքրքիր էր մի շարք առումներով: Օրինակ, արդյոք Շալանդը մարտավարական շտկումներ կկատարի մեր թիմի խաղաոճում, ինչպե՞ս իրենց կդրսևորեն նորեկները, և ի՞նչ հեռանկարներ կարող է ունենալ փոփոխությունների շեմին հայտնված Հայաստանի հավաքականը:

Ինքնին հասկանալի է, որ մեկ խաղով անհնար է ստանալ այդ հարցերի պատասխանը, բայց նախնական պատկերացում կազմել հաջողվեց: Օրինակ, նկատելի էր, որ մեր ֆուտբոլիստները փորձում են գրոհի կազմակերպման ուղղությունները փոխել անկյունագծով երկար փոխանցումների միջոցով, ինչը լրացուցիչ սրություն էր հաղորդում հարձակողական գործողություններին: Ինչ վերաբերում է նորեկներին, ապա հեռուստացույցով խաղը դիտելիս դժվար է ամբողջական պատկերացում ստանալ նրանց հնարավորությունների մասին, առավել ևս, որ այդ ֆուտբոլիստներից մեծ մասը փոխարինման մտավ խաղավերջում և փաստորեն հաշված րոպեներ անցկացրեց դաշտում: Փոխարենը, մեծ ակտիվությամբ առանձնացավ Ռումյան Հովսեփյանը, որն, ինչպես երևում է, դաշտ էր մտել ընձեռված հնարավորությունից օգտվելու նպատակով: Նա այնքան ներդաշնակորեն ներգրավվեց հավաքականի կազմում, որ կողմնակի դիտորդը ոչ-մի դեպքում չէր մտածի, թե այդ տղան նորեկ է: Հովսեփյանը  օժտված է ատլետիկ տվյալներով, իսկ ամենակարևորը՝ տիրապետում է գլխով խաղալու վարպետությանը, ինչը շատ օգտակար կլինի մեր հավաքականին: Ի դեպ, Հովսեփյանը դարձավ մեր հավաքականի գոլերից մեկի հեղինակը՝ հենց գլխով եզրափակելով Օզբիլիսի իրացրած տուգանային հարվածը:

Հայաստանի հավաքականում Մաուրո Գեւգեոզյանի նորամուտի մասին դժվար է որևէ բան ասել, քանզի նա շատ քիչ ժամանակ անցկացրեց խաղադաշտում: Իհարկե, պետք է ընդգծել հավաքականի հնաբանակների՝ Յուրա Մովսիսյանի, Հենրիկ Մխիթարյանի, Արազ Օզբիլիսի լավ մարզավիճակը և հիանալի համագործակցությունը: Հավաքականին լավ համալրում կլինեն Տարոն Ոսկանյանը, գուցե նաև Նորայր Ասլանյանը:

Մտահոգում է, թերևս, մեր թիմի աքիլեսյան գարշապարը հանդիսացող պաշտպանության անհուսալի խաղը, որի կարգավորումը փորձաքար է դառնալու Շալանդի համար:

Շատ բան պարզ կդառնա մայիսի 31-ին և հունիսի 6-ին նախատեսված Ալժիրի ու Գերմանիայի հավաքականների հետ հանդիպումներից հետո: Բայց արդեն իսկ զգացվում է, որ բոլոր նախադրյալները կան ավելի ուժեղ և կատարելագործված խաղով հավաքական ունենալու համար:

Հեղինակ` Հրայր Նազարյան