Փաստ ինֆո

 

ՀՀ արդարադատության նախարարության քրեակատարողական վարչության այլընտրանքային պատիժների կատարման բաժնի Արմավիրի բաժանմունքի պետ  Սահակ  Հարությունյանն այսօր իր դատաքննական ցուցմունքներում  նորից հերքեց իրեն առաջադրված` կաշառք ստանալու մեղադրանքը: 

 

Ըստ մեղադրական եզրակացության, բաժանմունքի պետը նույն բաժանմունքի առաջատար մասնագետ Ալեքսանդր Խաչատրյանի հետ նախնական համաձայնությամբ իրենց լիազորությունների շրջանակում  դատապարտյալ   Բ.Բուդաղյանի օգտին գործողություն կատարելու` հայտարարված համաներումը վերջինիս նկատմամբ կիրառելու և սահմանված կարգով պատժի կրումից ազատելու օրինական գործընթացն սկսելու համար, շորթմամբ 2013թ. հոկտեմբերի 4-ին նրանից պահանջել և 2013թ. հոկտեմբերի 14-ին նշված բաժանմունքի  իրենց  նստավայրում ստացել են խոշոր չափերի` 400.000ՀՀ դրամ կաշառք:

 

Սահակ Հարությունյանը հայտնեց, որ  խարդախության  համար  900.000 ՀՀ դրամի չափով տուգանքի  դատապարտված Բուդաղյանը միակ դատապարտյալն էր, ում գործում չկար տեղեկանք բնակության վայրի մասին, ուստի իր աշխատասենյակում  դատապարտյալից պահանջել է ներկայացնել այդ տեղեկանքը:

 

Բաժանմունքի պետը նաև  տեղեկացրել է նախօրեին ընդունված համաներման որոշման մասին և ասել, որ եթե իր վերաբերյալ հարցում հղելով՝  որևէ սահմանափակում չլինի համաներման կիրառման համար, ապա այն կկիրառվի:    

 

Սահակ Հարությունյանը միաժամանակ նշեց, որ  դատավճռով Բուդաղյանի դեմ քաղհայց կար,  ինչը  համաներման կիրառման համար սահմանափակում է նախատեսում: Ահա այդ մասին է եղել խոսակցությունը, որից հետո Բուդաղյանն ու Ալեքսանդր Խաչատրյանը դուրս են եկել իր աշխատասենյակից,  ինքը ոչ հեռախոսային խոսակցություն, ոչ էլ որևէ հանդիպում չի ունեցել   Բուդաղյանի հետ:  Իսկ մեղադրական եզրակացությունում նշվող հոկտեմբերի 14-ին ինքը եղել է Շիրակի մարզում՝ իր հորեղբոր հուղարկավորությանը:  «Ես փող չեմ պահանջել, իմ աշխատասենյակում  Խաչատրյանն էլ չի պահանջել»,- ասաց  նա: 

 

Այն հարցին, թե ինչո՞վ  է  պայմանավորված նաև  իր դեմ Բուդաղյանի նախաքննական ցուցմունքը՝ ամբաստանյալը հայտարարեց՝   շփոթվել է, շփոթության մեջ են գցել,  ուղղորդել են, նախաքննությունն անց է կացվել միակողմանի,  ոչ օբյեկտիվ:

 

Մյուս ամբաստանյալը հրաժարվեց ցուցմունք տալուց  ու դատավարության մասնակիցների հարցերին պատասխանելուց՝ հայտարարելով, որ պնդում է իր նախաքննական ցուցմունքները: Ւսկ նախաքննության ընթացքում նա հայտնել էր, որ Սահակ Հարությունյանի աշխատասենյակից  դուրս գալուց հետո, Բուդաղյանն առաջարկել է «մաղարիչ անել» իրեն համաներման ցուցակում ընդգրկվելու համար, ինքն էլ որոշել է օգտվել ու գումար աշխատել, համաներում կիրառվելու դեպքում ինքը ոչինչ չէր ասի իր պետին և գումարը կդներ իր գրպանը, իսկ չկիրառվելու դեպքում՝ կվերադարձներ գումարը: Խաչատրյանը հայտնել էր, որ Սահակ Հարությունյանի անունը տվել է, որպեսզի վստահություն ձեռք բերի Բուդաղյանի մոտ, քանի որ ինքը որոշում կայացնող չէ:     

 

Բուդաղյանը ևս այսօր դատարանում ասաց, որ  Սահակ Հարությունյանը ճիշտ է ասում,  վերջինիս հետ իր խոսակցությունը  բնակության վայրի տեղեկանքի մասին է եղել, Հարությունյանի աշխատասենյակից   ինքն ու  Ալեքսանդր Խաչատրյանը դուրս են եկել,  խոսակցության ընթացքում պայմանավորվել են գումարի շուրջ՝ համաներում կիրառելու համար, թե ո՞վ է գումար առաջարկել, ինքը չի հիշում: 

 

Ամբաստանյալների պաշտպաններ Ինեսսա Պետրոսյանն ու Գիվի Հովհաննիսյանը դատարանից ժամանակ խնդրեցին դատաքննությունը լրացնող  միջնորդություններ պատրաստելու համար՝ դրանք կներկայացվեն արդեն հաջորդ դատական նիստում: